استانا. قازاقپارات - مەملەكەتتىك حاتشى گ. ءابدىقالىقوۆانىڭ توراعالىعىمەن قازاقستان حالقى اسسامبلەياسى سولتۇستىك قازاقستان وبلىستىق كەڭەسىنىڭ كەڭەيتىلگەن وتىرىسى ءوتتى. كەڭەس جۇمىسىنا قازاقستان حالقى اسسامبلەياسى ءتوراعاسىنىڭ ورىنباسارى - حاتشىلىق مەڭگەرۋشىسى ە.توعجانوۆ، قازاقستان حالقى اسسامبلەياسى كەڭەسىنىڭ مۇشەسى - ا.باشماكوۆ، سونىمەن قاتار ەتنو-مادەني بىرلەستىكتەر مەن جۇرتشىلىق وكىلدەرى قاتىستى، دەپ حابارلايدى اقوردانىڭ باسپا ءسوز قىزمەتىنەن. 
گ.ءابدىقالىقوۆا ءوز سوزىندە سولتۇستىك قازاقستان وبلىسىنىڭ اسسامبلەياسى ەلىمىزدە اسسامبلەيا جىلى، ۇلت جوسپارى، «ماڭگىلىك ەل» جالپىۇلتتىق پاتريوتتىق يدەياسى، «ۇلى دالا ەلى» ەلدىك برەندىن ىلگەرىلەتۋ اياسىنداعى مىندەتتەردى جۇزەگە اسىرۋ جونىنەن لايىقتى ورىن الاتىنىن اتاپ ءوتتى.
كەڭەستىڭ كەڭەيتىلگەن وتىرىسىنا قاتىسۋشىلار نۇرسۇلتان نازاربايەۆ ۇسىنعان بەس ينستيتۋسيونالدىق رەفورمانى، ەتنوسارالىق قارىم-قاتىناس سالاسىنداعى مەملەكەتتىك ساياساتتى، قازاقستاندىق بىرتەكتىلىك پەن بىرلىكتى كۇشەيتۋ جانە دامىتۋ جونىندەگى كەشەندى جۇمىستى ىسكە اسىرۋ، جاڭا قازاقستاندىق ءپاتريوتيزمدى قالىپتاستىرۋ ماسەلەلەرىن تالقىلادى. «قازاقستان حالقى اسسامبلەياسى - 20 يگى ءىس» اكسياسى بارىسىندا وبلىستا 260-تان استام ءىس-شارالار جۇرگىزىلدى، 9 مىڭعا جۋىق ادام 28 ميلليون تەڭگەدەن استام سوما مولشەرىندە كومەك الدى.

مەملەكەتتىك حاتشى م.قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە «سەرپىن-2050» باعدارلاماسىنا قاتىسۋشىلارمەن كەزدەستى. كەزدەسۋ بارىسىندا گ.ءابدىقالىقوۆاعا باعدارلامانى ىسكە اسىرۋ بارىسى تۋرالى ماعلۇمات ۇسىنىلىپ، ستۋدەنتتەردىڭ بەيىمدەلۋى مەن شىعارماشىلىق الەۋەتىن دامىتۋ ماسەلەلەرى تالقىلاندى. «سەرپىن-2050» باعدارلاماسى اياسىندا وبلىستا 600-دەن استام ستۋدەنت، ونىڭ ىشىندە وڭتۇستىك قازاقستان، قىزىلوردا، ماڭعىستاۋ، الماتى وبلىستارىنان كەلگەن جاستار ءبىلىم الادى.

قازاق حاندىعىنىڭ 550 جىلدىعىنا ارنالعان ءىس-شارا اياسىندا مەملەكەتتىك حاتشىنىڭ نازارىنا مۇراجاي قورى جانە ۇلى ابىلاي حاننىڭ ءومىرى تۋرالى ەكسپوزيسيالىق كورمە ۇسىنىلدى. 

جۇمىس ساپارى اياسىندا گ.ءابدىقالىقوۆا «جەزقازعان-پەتروپاۆل» اۆتوموبيل جولىنىڭ ۋچاسكەسىن قايتا جوندەۋ جانە «نۇرلى جول» مەملەكەتتىك باعدارلاماسى بويىنشا سالىنىپ جاتقان 320 ورىندىق بالاباقشا قۇرىلىسىنىڭ بارىسىمەن تانىستى. مەملەكەتتىك حاتشى، سونداي-اق مۇز ايدىنى جانە جەڭىل اتلەتيكالىق مانەجى بار سپورت سارايىنىڭ سالتاناتتى اشىلۋىنا قاتىستى.

ساپار سوڭىندا گۇلشارا ءابدىقالىقوۆا قاتارىن ءماسليحات دەپۋتاتتارى، مەملەكەتتىك ورگانداردىڭ باسشىلارى، بيزنەس قاۋىمداستىق پەن ۇەۇ وكىلدەرى قۇرايتىن ايەلدەر قاۋىمىمەن كەزدەستى. كەزدەسۋدە «100 ناقتى قادام» ۇلت جوسپارىن جۇزەگە اسىرۋ ىسىنە ايەلدەردىڭ قاتىسۋ بەلسەندىلىگىن ارتتىرۋ، ايەلدەر كاسىپكەرلىگىن قولداۋ، رۋحاني-وتباسىلىق قۇندىلىقتاردى نىعايتۋ، وتباسىلىق-دەموگرافيالىق ساياساتتى ىسكە اسىرۋ ماسەلەلەرى قارالدى.

جۇمىس ساپارىنىڭ قورىتىندىسى بويىنشا گ.ءابدىقالىقوۆا مەملەكەتتىك ورگاندارعا ءبىرقاتار ناقتى تاپسىرما بەردى.

دەرەككوز: قازاقپارات