بۇل قاراجات باسپانا ساتىپ الۋعا جۇمسالادى.
بىرنەشە كۇن بۇرىن سەمەيدە اياۋسىز سوققىعا جىعىلعان بالانىڭ وتباسىنا قازاقستاندىقتار 24 ملن تەڭگە جيناپ بەردى. بۇل تۋرالى اباي وبلىسىنداعى بالا قۇقىقتارى جونىندەگى ۋاكىل ەلزيرا سولتابايەۆا ايتتى.
ۋاكىلدىڭ ايتۋىنشا، تولىق مەديسينالىق تەكسەرۋدەن وتكەن بالاعا قاجەتتى پسيحولوگيالىق كومەك كورسەتىلۋدە. سونىمەن قاتار، وتباسىعا قۇقىقتىق كومەك بەرۋ ماسەلەسى دە قولعا الىنعان.
بۇگىن بەلگىلى بولعانداي، كوپشىلىكتىڭ قولداۋىمەن وتباسىنىڭ جاقىن تۋىسىنىڭ ەسەپشوتىنا 24 ميلليون تەڭگە جينالدى. بۇل قاراجات باسپانا ساتىپ الۋعا جۇمسالادى. قارجىنىڭ اشىق ءارى ءادىل جۇمسالۋىن قامتاماسىز ەتۋ ماقساتىندا وبلىستىق جانە قالالىق ءماسليحات دەپۋتاتتارى، ادۆوكات جانە قوعامدىق بىرلەستىكتەر وكىلدەرىمەن بىرلەسكەن ارنايى كوميسسيا قۇرىلىپ جاتىر.
«وتباسىعا كومەك كورسەتۋ جۇمىستارى اشىقتىق پەن ادىلدىك قاعيدالارىنا نەگىزدەلەدى. قوعامنىڭ زور قولداۋىن ەسكەرە وتىرىپ، تۇرعىن ءۇيدى تاڭداۋ جانە ساتىپ الۋ پروسەسى بارىنشا جاريالى تۇردە وتەتىن بولادى»، – دەپ مالىمدەدى ەلزيرا سولتابايەۆا.
سونىمەن قاتار، ول وتباسىنىڭ بارشا قازاقستاندىقتارعا بىلدىرگەن شىنايى العىسىن جەتكىزدى.
پىكىر قالدىرۋ