ورال. قازاقپارات - ق ر ۇلتتىق ۇلانى «باتىس» وڭىرلىك قولباسشىلىعى باسقارماسىندا ورال گارنيزونىنىڭ اسكەري پروكۋرورى، ادىلەت پولكوۆنيگى التىنباي رايەۆتىڭ ءتوراعالىق ەتۋىمەن قىلمىستىق قۇقىقبۇزۋشىلىقتى تىركەۋ مەن قىلمىستىق ىستەردى تەرگەۋ كەزىندە زاڭدىلىقتىڭ ساقتالۋى، اسكەري بولىمدەر مەن مەكەمەلەردە جەكە جانە زاڭدى تۇلعالار شاعىمدارىن قاراۋدى جەتىلدىرۋ ماقساتىندا ق ر باس پروكۋراتۋراسىنىڭ «ايقىن» يننوۆاسيالىق جوباسىن قولدانۋ ماسەلەلەرى تالقىلاندى.
«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، التىنباي رايەۆتىڭ اتاپ وتكەنىندەي، بيىل ورال گارنيزونى قىلمىستىق ىزدەستىرۋ ورگاندارىنىڭ جاڭا قىلمىستىق ۇدەرىس جاعدايىنا بەيىمدەلۋى قامتاماسىز ەتىلدى. سوتقا دەيىنگى ءوندىرىس ساپاسىن ارتتىرۋ ماقساتىندا ءتيىستى شارالار الىندى.
جيىنعا قاتىسقان ق ر باس اسكەري پروكۋراتۋراسى قۇقىقتىق ستاتيستيكا جانە ارنايى ەسەپكە الۋ كوميتەتى باسقارماسى باستىعىنىڭ ورىنباسارى، ادىلەت پولكوۆنيگى باقىت نۇرمانوۆتىڭ ايتۋىنشا، «ايقىن» جوباسىن ەنگىزۋدىڭ ماڭىزدىلىعى سوندا، كەيبىر اسكەري بولىمدەر مەن مەكەمەلەر ازاماتتاردىڭ ارىز-شاعىمىنا جەتكىلىكتى ءمان بەرمەيدى، مازمۇنىنا ءۇڭىلىپ، قاراۋ مەرزىمىن ساقتامايدى. بۇل ارىز-شاعىمنىڭ كوبەيۋىنە اسەر ەتۋدە.
باس اسكەري پروكۋراتۋرانىڭ اعا پروكۋرورى، ادىلەت اعا لەيتەنانتى ەرنۇر ماعازوۆتىڭ سوزىنە قاراعاندا، ازاماتتار مەن ۇيىمدار ءوز ارىزدارىنىڭ قارالۋ بارىسىن «ايقىن» جوباسى بويىنشا عالامتور ارقىلى باقىلاپ وتىرا الادى. سونىمەن قاتار اسكەري پروكۋراتۋرانىڭ قاداعالاۋىنان بولەك، مەملەكەتتىك ورگانداردىڭ ارىز-شاعىمداردى قاراۋىنا تۇراقتى الەۋمەتتىك باقىلاۋ دا ورناتىلادى. ەڭ باستىسى، «ايقىن» جوباسى سىبايلاس جەمقورلىقتىڭ الدىن الىپ، ازاماتتاردىڭ كونستيتۋسيالىق قۇقىعىن قورعايدى.
