الماتى. قازاقپارات - بۇگىن الماتى قالاسىنىڭ «استانا» الاڭىندا الماتى وبلىسىنىڭ اۋىل شارۋاشىلىعى تاۋارلارىن وندىرۋشىلەرىنىڭ جارمەڭكەسى ءوتىپ جاتىر. وعان 16 اۋدان مەن تالدىقورعان، قاپشاعاي جانە تەكەلى قالالارىنان جالپى سوماسى 110 ميلليون تەڭگە بولاتىن، ەكولوگيا جاعىنان تازا ءارى ساپالى 300 توننا ءونىم جەتكىزىلدى.

«الماتى وبلىسىندا ءقازىر كوكونىستەردىڭ، جەمىس-جيدەكتەردىڭ ناعىز پىسكەن كەزى عوي. سوندىقتان بۇل جولى ولار كوپ اكەلىندى. جالپى، تاۋارلاردىڭ ىشىندە ەت ونىمدەرى - 67 توننا، كارتوپ - 37 توننا، كوكونىس - 27 توننانى قۇرايدى. سونىمەن قاتار، ازىق-تۇلىك تاۋارلارى اراسىندا الماتى وبلىسىنىڭ برەندىنە اينالعان -  قوعالىنىڭ كارتوبى، الاكولدىڭ بالىعى، لەپسى ءوڭىرىنىڭ بالى بار. تاۋار وندىرۋشىلەر ءوز ونىمدەرىن وزدەرى، ياعني دەلدالسىز ساتىپ جاتىر. سايكەسىنشە، بارلىق تاۋارلاردىڭ باعاسى بازار نارقىنان 15-20 پايىزعا ارزان»، - دەدى الماتى وبلىستىق اۋىل شارۋاشىلىعى باسقارماسى باسشىسىنىڭ ورىنباسارى قۇدايبەرگەن بەكبوسىنوۆ.

سونىمەن قاتار، ول الماتىعا جاقىن ورنالاسقان اۋدانداردىڭ تاۋار وندىرۋشىلەرى الماتى قالاسى مەن وبلىسى اكىمدىكتەرىنىڭ كەلىسىمى بويىنشا،الماتىدا اپتا سايىن جارمەڭكە وتكىزىپ تۇراتىندىعىن ايتتى. 

«تالعار اۋدانى «جۇلدىز» بازارىندا، ىلە اۋدانى «قازاقفيلم» مولتەكاۋدانىندا جانە ەڭبەكشىقازاق اۋدانىنىڭ تاۋار وندىرۋشىلەرى تۇركىسىب اۋدانىندا اپتا سايىن جارمەڭكە وتكىزىپ تۇرادى. ال ءىرى اگروحولدينگتەر مەن اگروفيرمالار قالاداعى مەيرامحانالار، قوناق ۇيلەر جانە ساۋدا ۇيلەرىمەن تاۋار جەتكىزىپ تۇرۋ بويىنشا دەربەس كەلىسىم-شارتتار جاساسقان»، - دەدى ق. بەكبوسىنوۆ.

ايتا كەتەلىك، الماتى وبلىسىنىڭ تاۋار وندىرۋشىلەرى «استانا» الاڭىندا بيىلعا وسىمەن ءۇشىنشى رەت جارمەڭكە وتكىزىپ جاتىر. بۇعان دەيىن ۇيىمداستىرىلعان جارمەڭكەگە 280 توننا ءونىم جەتكىزىلگەن بولاتىن.

جارمەڭكە ادەتتەگىدەي 16:00-گە دەيىن جالعاسادى.

وسى ۋاقىت ارالىعىندا تولە بي كوشەسىنىڭ ابىلاي حان داڭعىلىنان فۋرمانوۆ كوشەسىنە دەيىنگى ارالىعىندا جانە پانفيلوۆ كوشەسىنىڭ بوگەنباي باتىر كوشەسىنەن قازىبەك بي كوشەسىنە دەيىنگى ارالىعىندا كولىك قوزعالىسى ۋاقىتشا جابىلادى.

دەرەككوز: قازاقپارات