استانا. قازاقپارات - 16 قازان كۇنى باتىس قازاقستان وبلىستىق قازاق دراما تەاترىندا «ايەل. ساياسات. قوعام» دەگەن تاقىرىپتا حالىقارالىق كونفەرەنسيا بولىپ، وعان باتىسقازاقستاندىقتارمەن قاتار رەسەيدىڭ كورشىلەس ورىنبور، سامارا جانە قازاقستاننىڭ ماڭعىستاۋ، اتىراۋ وبلىستارىنان بەلسەندى ايەلدەر قاتىستى.
جيىندا وبلىس اكىمىنىڭ ءبىرىنشى ورىنباسارى ارمان وتەعۇلوۆتىڭ اتاپ وتكەنىندەي، قازىرگى تاڭدا ايەلدەر قوعام مەن ساياساتتا بەلسەندى كۇشكە اينالىپ، ولاردىڭ اراسىنان شىققان باسشىلار مەن كاسىپكەرلەر سانى دا كوبەيىپ كەلەدى. بۇل جاعىنان العاندا، باتىس قازاقستان وبلىسى ەل وڭىرلەرى ىشىندە الدىڭعى قاتاردا.

ءماجىلىس دەپۋتاتى، ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى ەلەنا تاراسەنكونىڭ ايتۋىنشا، بيلىك پەن ساياسات تۇتقاسىن ۇستايتىنداردىڭ اراسىندا ايەلدەردىڭ بارىنشا كوبىرەك بولۋى قوعامداعى تۇراقتىلىق پەن كەلىسىمدى نىعايتادى. ستاتيستيكا كورسەتىپ وتىرعانىنداي، پارلامەنتى مەن ۇكىمەتىندە ايەلدەر سانى 25-35 پايىزدان از ەلدەردە انا مەن بالانى قورعاۋ، بالالار قۇقىعىن، وتباسى قۇندىلىقتارىن ساقتاۋ ماسەلەلەرى جەتكىلىكتى شەشىلمەيدى. ۇلتتىق كوميسسيا قىزمەتى ناتيجەسىندە قازاقستاندا وتباسىلىق-دەموگرافيالىق جانە گەندەرلىك ساياساتتى شەشۋدى مەملەكەتتىك قولداۋدىڭ ءبىرىڭعاي جۇيەسى جاسالعان. ەلباسى جارلىعىمەن 2006 جىلى 10 جىلعا ەسەپتەلگەن گەندەرلىك تەڭدىك ستراتەگياسى بەكىتىلگەنى ءمالىم. كۇنى بۇگىن اتالعان ستراتەگيانىڭ نەگىزگى باعىتتارى ورىندالدى دەپ ايتۋعا بولادى. قازاقستان سونداي-اق ايەلدەرگە قاتىستى زورلىق-زومبىلىقتى جويۋ جونىندەگى حالىقارالىق تالاپتاردى دا ساقتاپ كەلەدى.

ق ر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتورايىمى، تۇڭعىش ايەل گەنەرال ساۋلە ايتپايەۆا ءوز سوزىندە وتباسىنداعى ۇرپاق تاربيەسى، جاسوسپىرىمدەر قۇقىعىن قورعاۋ ماسەلەلەرىنە دە ەرەكشە ءمان بەردى.

ورىنبور وبلىسى الەۋمەتتىك دامۋ ءمينيسترىنىڭ ورىنباسارى روزا پالاتوۆانىڭ سوزىنە قاراعاندا، قازاق ەلىندە گەندەرلىك تەڭدىك ماسەلەسى ءوز دەڭگەيىندە شەشىلگەن. 1997 جىلعى قاراشادا الماتىدا وتكەن ءۇشىنشى حالىقارالىق ورتالىق ازيا كونفەرەنسياسىندا قازاقستاندا وسى ماسەلە كەڭىنەن تالقىلانىپ، باستاپقى قادامدار جاسالعان بولاتىن. سودان بەرگى ون سەگىز جىل مەرزىمدە بۇل ءىس ءوز جەمىسىن بەردى. ساۋاتتى دا ىسكەر ايەلدەر سانى الدەقايدا ارتىپ، ولار ماڭىزدى مەملەكەتتىك شەشىمدەردى قابىلداۋعا اتسالىسۋدا.

كونفەرەنسيا دەلەگاتتارى ايەلدەردىڭ كوشباسشىلىق ءرولى، ەلباسىنىڭ «نۇرلى جول» باعدارلاماسىنا سايكەس جاڭا مۇمكىندىكتەر مەن تىڭ جوبالار، ونداعى نازىك جاندىلاردىڭ ۇلەسى، گەندەرلىك تەڭدىكتى جۇزەگە اسىرۋدىڭ باسەكەگە قابىلەتتىلىكتى ارتتىرۋعا ىقپالى توڭىرەگىندە وي-پىكىرلەرى مەن ۇسىنىستارىن ورتاعا سالدى. سونىمەن قاتار ىسكەر ايەلدەر ءوز بيزنەسىن اشۋ مەن دامىتۋ باعىتىندا ترەنينگتەرگە دە قاتىسىپ، پايدالى اقىل-كەڭەستەرگە قانىقتى.

دەرەككوز: قازاقپارات