استانا. قازاقپارات - الماتى وبلىسىندا ق ر قورعانىس مينيسترلىگى اوسك-نىڭ وقۋ-جاتتىعۋ ورتالىعىندا شاقىرىلۋعا دەيىنگى جاستار اراسىنداعى سپورتتىڭ اسكەري-قولدانبالى تۇرلەرى بويىنشا رەسپۋبليكالىق تۋرنير باستاۋ الدى. بۇل تۋرالى ق ر قورعانىس مينيسترلىگىنىڭ باسپا ءسوز قىزمەتى حابارلادى. 
جاستاردى اسكەري-پاتريوتتىق تاربيەلەۋدى جەتىلدىرۋ قازاقستان قارۋلى كۇشتەرى قىزمەتىنىڭ ماڭىزدى قۇرامداسى، اسكەري-پاتريوتتىق كلۋبتاردىڭ جۇمىسىن ۇيلەستىرۋ، جاستاردى قارۋلى كۇشتەردە اسكەري قىزمەتكە دايىنداۋ، اسكەري قىزمەت وتكەرۋ كەزىندە قاجەت ولاردىڭ داعدىسى مەن شەبەرلىكتەرىن قالىپتاستىرۋ، سونداي-اق سالاۋاتتى ءومىر سالتىن ناسيحاتتاۋ، دەنە تۇرعىسىندا جەتىلدىرۋ، جاستاردى اسكەري-قولدانبالى جانە تەحنيكالدىق دايارلاۋ بولىپ تابىلادى. 

وسىنىڭ اياسىندا الماتى وبلىسىندا شاقىرىلىمعا دەيىنگى جاستار اراسىندا سپورتتىڭ اسكەري-قولدانبالى تۇرلەرى بويىنشا رەسپۋبليكالىق تۋرنير ءوتتى. اقتوبە، شىعىس قازاقستان، ماڭعىستاۋ، الماتى وبلىسى مەن الماتى قالاسىنان جينالعان كوماندالار پانفيلوۆوداعى سپورتتىق بازادا باس قوستى. 

ەكى جاس ەرەكشەلىگى توپتارىنىڭ بوزبالالارى 14-15 جاستان كىشى جانە 16-17 جاستان ۇلكەندەر وزدەرىنىڭ سپورتتىق شەبەرلىكتەرىن كورسەتتى. تۋرنير ءۇش كۇن بويى، ياعني، 16، 17 جانە 18 قازاندا وتەدى. ءار كۇنى سپورتتىڭ جەكەلەگەن اسكەري-قولدانبالى ءتۇرى، كەشەندى جەكپە-جەكپە ءتۋرنيرى، اسكەريلەندىرىلگەن كروسس جانە پنيەۆماتيكالىق ۆينتوۆكادان وق اتۋ ۇسىنىلاتىن بولادى.

اشىلۋ ءراسىمى كەشە 16 قازاندا بولدى. وعان جەڭىل اتلەتيكادان وليمپيادالىق چەمپيون ولگا شيشيگينا، سپورتتىڭ اسكەري-قولدانبالى تۇرلەرى بويىنشا ق ر مەملەكەتتىك باپكەرى مادەنيەت جاقىپوۆ، ق ر قم سك-اوسك-نىڭ تاربيە-يدەولوگيالىق جۇمىستارى ءبولىمىنىڭ باستىعى مەيىرجان جۇمابايەۆ پەن ق ر قم اوسك وقۋ-جاتتىعۋ ورتالىعىنىڭ باستىعى ميكايل كليماتوۆ قاتىستى.

بۇگىنگى تاڭدا قازاقستاندا وسكەلەڭ ۇرپاققا ۇلكەن كوڭىل بولىنۋدە. بارلىق وڭىرلەردە، قالالاردا جاستارىمىزدىڭ وقۋىنا، سپورتپەن شۇعىلدانۋىنا جانە ءوز وتانىنىڭ لايىقتى ازاماتىنىڭ بارلىق قاسيەتتەرىن ءسىڭىرۋى ءۇشىن قولايلى جاعدايلار جاسالۋدا. 

دەرەككوز:قازاقپارات