استانا. قازاقپارات - 17 قازاندا شىمكەنتتە «قالا كۇنى» مەرەكەسى اتاپ ءوتىلدى. وڭتۇستىك قازاقستان وبلىسىنىڭ اكىمى بەيبىت اتامقۇلوۆ شاھار تۇرعىندارى مەن قوناقتارىن اتاۋلى كۇنمەن قۇتتىقتاپ، وڭتۇستىكقازاقستاندىقتاردى بولاشاق ءۇشىنشى مەگاپوليستى بىرگە كوركەيتۋگە شاقىردى، دەپ حابارلايدى وبلىستىق اكىمدىكتىڭ باسپا ءسوز قىزمەتى.
تۇركىستان سارايىندا ۇيىمداستىرىلعان شارادا ايماق باسشىسى قالامىزدىڭ ءتۇرلى سالالار بويىنشا دامۋىنا ۇلەس قوسقان ءبىرقاتار ازاماتتاردى «شىمكەنت قالاسىنىڭ قۇرمەتتى ازاماتى» اتاعىمەن ماراپاتتادى.

شىمقالانىڭ تۇرعىندارى قالا كۇنىن ءبىر اپتادان بەرى كەڭ كولەمدە تويلاپ كەلەدى. اتاپ ايتساق، 10-17 قازان كۇندەرى ارالىعىندا وتكەن مەرەكەلىك شارالاردىڭ ءبىرىنشى كۇنى «جاڭارۋ مەن تازالىق»، ەكىنشى كۇنى «سالاماتتى ءومىر سالتى كۇنى»، ءۇشىنشى كۇنى «بولاشاقتاعى - شىمكەنت»، ءتورتىنشى كۇن «شىمكەنت - دوستىق مەكەنى»، بەسىنشى كۇن «عاسىرلار توعىسىنداعى قالا»، التىنشى كۇن «شۋاعىن شاشقان شىمقالا» شاتتىق كۇنى ايدارلارىمەن اتالىپ وتىلسە، بۇگىن «ىرىس الدى - ىنتىماق» تاقىرىبىندا تويلاندى.تاڭ سارىدەن شىمقالاداعى ساياباقتار مەن ورتالىق الاڭداردى مەرەكەلىك كوڭىل-كۇي جايلادى.

اۋا رايىنىڭ قولايسىزدىعىنا قاراماستان شاھار جۇرتشىلىعى قالاداعى اباي، جەڭىس، ورتالىق ساياباقتارى مەن ناۋرىز الاڭىندا تىگىلگەن كيىز ۇيلەردەن ءدام تاتىپ، التىباقانداردا اسىر سالسا، ورتالىق اتشاباردا بايگە، قىز قۋۋ سەكىلدى ۇلتتىق ويىندار ءوتتى.

شارادا كۇمىس كومەي انشىلەر مەن مىڭ بۇرالعان بيشىلەر كەلۋشىلەرگە شاتتىق كوڭىل كۇيىن سىيلادى. سونداي-اق، قازاق حاندىعىنىڭ 550 جىلدىعىنا ارنالعان مونۋمەنتتىڭ ماڭىندا وقو-نىڭ 15 اۋدان-قالاسىنىڭ كيىز ۇيلەرى تىگىلىپ، ءار اۋداننىڭ شىعارماشىلىق ۇجىمدارى مەرەيتويعا ارنالعان كونسەرتتىك باعدارلاما ۇيىمداستىرسا، ءتۇس اۋا ناۋرىز الاڭىندا «التىن كۇز» فەستيۆالى مەن «شىعىس بازارى» ۇلگىسىندەگى ەتنواۋىل ساۋدا قاتارى ۇسىنىلدى.

شىمكەنت قالاسىنىڭ مەرەيلى مەرەكەسى تۇركىستان سارايىنداعى گالا كونسەرتتە جالعاستى. وتاندىق جانە شەتەلدەن كەلگەن انشىلەر ونەر كورسەتكەن بۇل شارانى قالا حالقى عانا ەمەس، بۇكىل وڭتۇستىكقازاقستاندىقتار تىكەلەي ەفير ارقىلى «قازاقستان-شىمكەنت» تەلەارناسىنان تاماشالاي الدى.

دەرەككوز: قازاقپارات