قىزىلوردا. قازاقپارات - قىزىلوردادا قازاق حاندىعىنىڭ 550 جىلدىعىنا جانە قازاقستان حالقى اسسامبلەياسىنىڭ 20 جىلدىعىنا ارنالعان ۇلتتىق سپورت تۇرلەرىنەن قازاقستان رەسپۋبليكاسىنىڭ IV فەستيۆالىنىڭ سالتاناتتى اشىلۋ شاراسى ءوتتى. 

ۇلى دالانىڭ ۇلىلىعىن ايشىقتايتىن شاراعا وبلىس اكىمى قىرىمبەك كوشەربايەۆ، ق ر سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى ءابىل دونباي جانە ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان قاتىستى.

ءتورت جىلدا ءبىر مارتە ۇيىمداستىرىلاتىن  فەستيۆال سپورتتىڭ 13 ءتۇرى بويىنشا وتەدى. اتاپ ايتساق، الامان بايگە، بايگە، قۇنان بايگە، كوكپار، اۋدارىسپاق، تەڭگە ءىلۋ، قىز قۋۋ، توعىزقۇمالاق، اسىق اتۋ، قازاق كۇرەسى، قۇسبەگىلىك، جامبى اتۋ، جەكپە-جەك. سونداي-اق، «ءساندى كيىز ۇيلەر»  بايقاۋى مەن  «كەرەمەت سايگۇلىك» سۇلۋ اتتار بايقاۋى دا  ۇيىمداستىرىلادى.

- ۇلتتىق سپورت - وتكەنىمىز بەن بۇگىنىمىزدى بايلانىستىرىپ، كەلەشەككە جەتەلەيتىن باعا جەتپەس بايلىعىمىز، اسىل قازىنامىز. سوندىقتان زەرتتەپ، زەردەلەپ جاس ۇرپاققا ۇيرەتۋ پارىزىمىز. بۇل باعىتتا وبلىسىمىزدا جاڭادان يپپودروم سالىنىپ، ۇلتتىق سپورت تۇرلەرى جانداندىرىلۋدا. بۇگىنگى ءباسى جوعارى باسەكەدە شىن مىقتىلاردىڭ جەڭىسكە جەتۋىنە تىلەكتەسپىن، - دەدى وبلىس اكىمى ق.كوشەربايەۆ.

- قاشاننان ۇلتىمىزدىڭ قايماعى بۇزىلماعان حالىق ەكەندىگىن وسىنداي فەستيۆالدەن بىلەمىز. ەلىمىزدىڭ قاي جەرىندە بولماسىن ۇلتتىق سپورت تۇرلەرىنەن وتەتىن باسەكەلەردە سىر سپورتشىلارى بەلسەندى قاتىسۋدا. بۇل ءوڭىردىڭ قانىمىزدا بار قاسيەتتى ۇلىقتاعانى. ۇلى دالانى اتا-بابامىز اتپەن باعىندىرعانىن جاقسى بىلەسىزدەر. سوندىقتان اتقا قونعان سپورتشىلارعا ساتتىلىك تىلەيمىن، - دەدى  ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان.

ەلىمىزدە 265 مىڭنان استام ادام ۇلتتىق سپورت تۇرلەرىمەن اينالىساتىن بولسا، سىر ەلىندەگى فەستيۆالگە بارلىق ايماقتان 2 مىڭعا جۋىق سپورتشى قاتىسۋدا.

سالتاناتتى شارا بارىسىندا فەستيۆالدىڭ جالاۋىن جامبى اتۋدان ەل چەمپيونى جارقىنبەك الماعامبەتوۆ ورتاعا اكەلىپ، ونى 15 دۇركىن تۇيە پالۋان ابىلاي جولدىبايەۆ جوعارىعا كوتەردى. ال جارىستىڭ الاۋىن ەستافەتامەن يسلام ساليموۆ، رۇستەم سىباي، حاكىمجان ەلەۋسىندەر الىپ ءوتىپ، قازاقستاننىڭ تۇڭعىش بارىسى ۇلان رىسقۇلعا تابىستادى. ول كوپتىڭ قوشەمەتىمەن الاۋدى تۇتاندىردى. وسىلايشا فەستيۆالm سالتاناتتى تۇردە اشىلدى. ايتا كەتەيىك، باسەكە 20 قازانعا دەيىن سوزىلادى. 

دەرەككوز: قازاقپارات