استانادا قانىش ساتبايەۆتىڭ 10 تومدىق شىعارمالار جيناعىنىڭ تۇساۋكەسەرى ءوتتى.

12 ءساۋىر — ۇلت ماقتانىشى، قازاق ەلىنىڭ جەراستى بايلىعىنىڭ كوزىن اشقان، قازاقستان عىلىم اكادەمياسىنىڭ نەگىزىن قالاۋشى ءارى تۇڭعىش پرەزيدەنتى، العاشقى اكادەميك قانىش يمانتاي ۇلى ساتبايەۆتىڭ تۋعان كۇنى. ەلىمىزدە عىلىم قىزمەتكەرلەرىنىڭ كۇنى وسى كۇنگە ورايلاستىرىلىپ بەلگىلەنگەن. 10 تومدىقتىڭ تۇساۋكەسەرى دە وسى ايتۋلى داتا قارساڭىندا ءوتتى.

— بىلتىر، وزدەرىڭىزگە ءمالىم، قانىش ساتبايەۆتىڭ 125 جىلدىعىن اتاپ وتتىك. سول شاراعا دايىندالعاندا ءبىر اقساقالدىڭ ءسوزى جۇرەگىمدى ءتىلىپ جىبەردى. ول كىسى ءوزى ەسەپتەگەن مىنانداي ءبىر قىزىق مالىمەت كەلتىردى: قانىش ساتبايەۆتىڭ ىزدەنىستەرىنىڭ ارقاسىندا جەر استىنان شىعارىلعان بايلىقتىڭ قۇنى 200 ملرد دوللاردان اسىپ كەتىپتى. بىزگە ءسال باتىرىپ وتىرىپ، 125 جىلدىققا ءبىر 2 ملرد تەڭگە شىعارا المايسىڭدار ما دەگەن بولاتىن. ءبىز بىردەن بۇل ماسەلەنى پىسىقتاپ، كەرەكتى قارجىلاندىرۋدى، گرانتتى شىعارىپ بەردىك. وتە جاقسى دەڭگەيدە 500-دەن استام شارا وتكىزىلدى. ونىڭ ىشىندە 10-ى — حالىقارالىق كونفەرەنسيا، 20-سى — رەسپۋبليكالىق دەڭگەيدەگى كونفەرەنسيا، 25ء-ى — دوڭگەلكە ۇستەل، 445ء-ى — وزگە دە شارالار. ونداي شارانىڭ ءبارى وتەدى دە كەتەدى. سوندىقتان ءبىز ناقتى ءبىر ۇلكەن جوبالاردى ىستەۋىمىز كەرەك دەپ شەشىپ، وسى توپتامانى قولعا الدىق، — دەدى ق ر عىلىم جانە جوعارى ءبىلىم ءمينيسترى ساياسات نۇربەك.

باسىلىم ق ر عىلىم جانە جوعارى ءبىلىم مينيسترلىگىنىڭ قولداۋىمەن، ق.ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ باسقارۋىمەن جانە «حالىقارالىق ساتبايەۆ قورىنىڭ» اتسالىسۋىمەن جارىق كوردى.

جيناققا عالىمنىڭ 1923–1963 جىلدار ارالىعىنداعى مونوگرافيالارى، ماقالالارى، باياندامالارى، گەولوگيالىق بارلاۋ ەسەپتەرى مەن عىلىمي-تەحنيكالىق جوبالارى، رۋحانيات سالاسىنداعى ەڭبەكتەرى دە ەنگەن. بارلىق ماتەريالدار حرونولوگيالىق جانە تاقىرىپتىق تارتىپپەن جۇيەلەنىپ، قازىرگى زامانعى عىلىمي جانە باسپا ستاندارتتارىنا ساي دايىندالعان. بۇل ەڭبەكتەر ساتبايەۆتىڭ عىلىمي مول مۇراسىنىڭ تەرەڭدىگىن، وتاندىق عىلىمنىڭ ىرگەتاسىن قالاۋداعى تاريحي ءرولىن جان-جاقتى اشادى.

— كوپتەن كۇتكەن 10 تومدىق قولىمىزعا ءتيدى. بۇل — قاستەرلى قازىنا، باعالى بايلىق، قانىش ساتبايەۆتىڭ مۇراسى. توپتاما ءبىراز نارسەدەن حابار بەرەدى: الەمگە ايگىلى اكادەميكتىڭ بۇكىل دۇنيەسى قامتىلعان، عىلىمي ەڭبەكتەرى جيناقتالعان، ماقالالارى توپتاستىرىلعان، جاڭادان تابىلعان ەڭبەكتەرى قوسىلعان، بيبليوگرافياسى تۇزىلگەن. قىسقاسى، كوپ تەر توگىلگەن، — دەدى ق ر پرەزيدەنتىنىڭ كەڭەسشىسى باۋىرجان وماروۆ.

جيناق «اتامۇرا» باسپاسىنان 10000 دانا تارالىممەن جارىققا شىعىپ، ەلىمىزدىڭ عىلىمي مەكەمەلەرىنە، جوعارى وقۋ ورىندارىنا جانە كىتاپحانالارىنا ۇلەستىرىلدى. سونىمەن قاتار، جيناقتىڭ سيفرلىق نۇسقاسى ەلەكتروندى كىتاپحانالار مەن اشىق عىلىمي پلاتفورمالاردا قولجەتىمدى بولادى.