استانا. قازاقپارات - بۇگىن الماتى وبلىسىنىڭ اكىمى اماندىق باتالوۆ كوكسۋ قانت زاۋىتىندا شىعارىلىپ جاتقان العاشقى قانت ءونىمىنىڭ كۋاسى بولدى.

بۇل تۋرالى وبلىس اكىمدىگىنىڭ باسپا ءسوز قىزمەتىنەن حابارالدى.

وسى شارا بارىسىندا رەسپۋبليكالىق قانت ورتالىعىنىڭ باسشىسى، «كوكسۋ قانت زاۋىتى» اق قۇرىلتايشىسى نۇرلان تىلەۋبايەۆ پەن ءوڭىر باسشىسى اماندىق باتالوۆ قانت زاۋىتىندا تاۋ-تاۋ بولىپ ءۇيىلىپ جاتقان قانت قىزىلشاسىن ارالاپ، زاۋىتتىڭ ءوندىرىس سەحىنىنىڭ جۇمىسىمەن تانىستى.

زاۋىت ديرەكتورى التىنبەك اباتوۆ وبلىس اكىمى ا.عابباسۇلىن جۇمىسى قىزۋ ءجۇرىپ جاتقان ءوندىرىس بارىسىمەن، ونداعى قانت قىزىلشاسىنان دايىن قانتتىڭ الىنۋ پروسەسىمەن تانىستىرا كەلە: «بۇگىنگى كۇنى زاۋىتقا 25 مىڭ توننا قانت قىزىلشاسى جەتكىزىلدى. ءتاتتى ءتۇبىردىڭ وتكىزىلگەن ءار تونناسىنا شارۋالارعا 13 000 تەڭگەدەن جانە ودان بولەك ءاربىر توننا قىزىلشا ءۇشىن مەملەكەتتەن قوسىمشا 1 500 تگ اقى تولەنۋدە. بيىلعى قانت قىزىلشاسىنىڭ ساپاسى مەن قانتتىلىعى جوعارى. وزدەرىڭىز كورىپ وتىرعانداي، قىزىلشانى وڭدەۋ پروسەسى قىزۋ جۇرۋدە. بىرنەشە ارنايى قۇرىلعىلاردان وتكەن قانت قىزىلشاسى زاۋىتتىڭ ەكىنشى باسىنان اپپاق قارداي دايىن ءونىم بولىپ شىعۋدا»، - دەپ اتاپ ءوتتى.

قانت وندىرىسىمەن تانىسقاننان كەيىن وبلىس اكىمى اماندىق باتالوۆ ءوز سوزىندە:

«جىل باسىندا قانت قىزىلشاسىنىڭ جايىن كۇز كورسەتەدى دەگەنبىز. كوپتەن كۇتكەن كۇزىمىز دە كەلدى. بيىلعى جىلى قانت قىزىلشاسى سەبىلگەن القاپتاردىڭ ءار گەكتارىنان شارۋالار 700-750 سەنتنەردەن ءونىم الىپ جاتىر. سالماعى دا كوڭىل قۇپتارلىق. ءتاتتى ءتۇبىردىڭ سالماعى 5-7 كەلىگە دەيىن بارادى. بۇل بۇرىن-سوڭدى بولماعان ناتيجە. وسى يگى ءىستىڭ بارلىعى - ءبىرىنشى كەزەكتە ۇكىمەتتىڭ قولداۋىنىڭ ناتيجەسى. ەلباسىمىز وتكەن جىلدىڭ تامىز ايىندا وڭىرگە جاساعان ءىسساپارىندا الماتى وبلىسىنا قانت قىزىلشاسىنىڭ ورتالىعى اتاعىن قايتارۋ تاپسىرماسىن قويعانىن بىلەسىزدەر. وسى تاپسىرمانى ورىنداۋ ماقساتىندا وبلىستىڭ 5 اۋدانىنا جالپى كولەمى 4000 گەكتارعا قانت قىزىلشاسى سەبىلدى. مەملەكەتتىك قولداۋدىڭ ارقاسىندا شارۋالارىمىز جانار-جاعارمايعا، وتكىزىلگەن ونىمگە، تىڭايتقىشتار مەن تۇقىمدىققا سۋبسيديا ءبولىپ، اۋىلشارۋاشىلىق تەحنيكالارى ساتىپ الىندى. اۋا رايىنىڭ ءوزى دە وسى يگى ءىستى قولداعانداي جاعىمدى دا جايلى كۇن رايىن سىيلادى. زاۋىتىمىز دا اعىمدىق جوندەۋ جۇمىستارىنان ءوتىپ، شارۋالاردىڭ ءونىمىن قابىلداۋعا تولىقتاي دايىن قالىپقا كەلتىرىلدى.

مىنە، كوكسۋ قانت زاۋىتىنىڭ وسىنداي ءونىمىن ساعىنىپ تا ۇلگەرىپپىز. ءوزىڭ وندىرگەن ءونىم ءاردايىم جانىڭا جاقىن ءارى ءدامدى بولادى. وسىنىڭ بارلىعى - ءونىمدى سەبىدەن باستاپ، دايىن ءونىم العانعا دەيىنگى پروسەستىڭ ءبىر جولعا قويىلعاندىعىنىڭ ناتيجەسى. مەملەكەت قولداۋىن كورگەن شارۋالار ءونىمىن سەبەدى، ونى ءوسىرىپ، ءونىمىن زاۋىتقا جەتكىزەدى، زاۋىت وتكىزىلگەن ءونىمنىڭ اقىسىن تولەيدى، ال قابىلداعان قىزىلشادان دايىن قانت شىعارادى. بۇنىڭ بارلىعى وڭاي جۇمىس ەمەس. ەلباسىنىڭ ايتىپ جۇرگەن «قازاقستاندا جاسالعان» دەگەن لوگوتيپى بار ونىمدەر شىعارۋ دەگەنى دە وسى. قانت قىزىلشاسىنىڭ قايتارىمى جوعارى. الداعى جىلدارى ءونىم ءدال بيىلعىداي بىتىك شىعىپ جاتسا قانت قىزىلشاس القاپتارىنىڭ كولەمىن ارتتىرامىز. رەسپۋبليكالىق قانت ورتالىعىنىڭ پرەزيدەنتى وسى جىلى بارلىعى ويداعىداي بولعان جاعدايدا الداعى جىلدارى 300 ملن. تەڭگە ينۆەستيسيا قۇيۋعا ءسوزىن بەردى.

وسىلايشا، زاماناۋي تەحنولوگيالار مەن ساپالى تۇقىمداردى سەبۋ، جۇمىستى جۇيەلى جۇرگىزۋ، ەڭ باستىسى وسىنىڭ بارلىعىنا مەملەكەتتىك قولداۋدىڭ بولعان جاعدايىندا 2020 جىلعا دەيىن وبلىسىمىزدا قانت قىزىلشاسىنىڭ كولەمىن 500 مىڭ تونناعا جەتكىزۋ جوسپارىمىز بار»، - دەپ ءسوزىن قورىتتى.

سونداي-اق كوكسۋ اۋدانىنا جاساعان ساپارى بارىسىندا وبلىس اكىمى اۋداننىڭ قانت قىزىلشاسىن جيناپ جاتقان «اليم-تايار» شارۋا قوجالىعىنىڭ القابىن كورىپ قايتتى. اتاپ وتەرلىگى، قانت قىزىلشاسى القابىنداعى جينالىپ جاتقان قىزىلشا ءونىمى مەن ونى جيناۋعا جۇمىلدىرىلعان اۋىلشارۋاشىلىق تەحنيكالارىن كوزبەن كورگەن قوناقتار، ءونىمنىڭ ساپاسى مەن كولەمىنە ءدان ريزا بولدى.

«دياس» شارۋا قوجالىعىنىڭ يەسى جىلقىشىنوۆ احمەت: «بيىل ءونىم بىتىك شىعۋدا. مەملەكەتتەن دە كوپتەگەن قولداۋ كورۋدەمىز. وبلىس اكىمدىگى ۇنەمى كومەك قولىن ۇسىنۋعا ءازىر. تىڭايتقىشتارعا ۋاقىتىلى سۋبسيديا ءبولىنۋىنىڭ ارقاسىندا ءونىمىمىز بۇگىندە ءىرى ءارى مول شىعۋدا. قانت قىزىلشاسىن جينايتىن ارنايى كومباين مەن «كاماز» جۇك كولىكتەرىن دە بەرىپ جاتىر. العاشقى ونىمدەرىمىزدى قانت زاۋىتىنا جەتكىزىپ، بۇگىندە ءتيىستى قاراجاتىمىزدى الۋدامىز. الداعى جىلدارى ءدال وسىنداي قولداۋ بولىپ جاتسا، قانت قىزىلشاسىنىڭ القاپتارىن ارتتىرامىز»، - دەپ ويىن ءبىلدىردى.

جالپى، الماتى وبلىسىنىڭ قانت زاۋىتىندا وندىرىلگەن ءونىمنىڭ ساپاسى جوعارى. دايىن ونىممەن ءبىرىنشى كەزەكتە وبلىستىڭ 2 ملن. حالقى، سونداي-اق الماتى قالاسىنىڭ جۇرتشىلىعى، ارتىلعان جاعدايدا ەلىمىزدىڭ وزگە وڭىرلەرىن قامتاماسىز ەتۋ ماقساتى بار. وبلىستا وندىرىلگەن قانت ءونىمى مەملەكەتتىك جالپى وداقتىق ستاندارتتىڭ بارلىق تالاپتارىنا سايكەستەندىرىلگەن. سول سەبەپتى الداعى ۋاقىتتا كورشى رەسەي، وزبەكستان، قىرعىزستان جانە بەلارۋس مەملەكەتتەرىنە دە الماتى وبلىسىندا وندىرىلگەن قانت ءونىمىن ەكسپورتتاۋعا مۇمكىندىگى بولاتىندىعىنا سەنىم مول.

ءسويتىپ، ەلباسىنىڭ الماتى وبلىسىندا قانت قىزىلشاسىن جاڭعىرتۋ تاپسىرماسىنىڭ العاشقى كەزەگى جۇزەگە اسا باستادى.

دەرەككوز: قازاقپارات