پەتروپاۆل. قازاقپارات - پەتروپاۆلدىڭ «بەرەكە» شاعىناۋدانىندا ءۇش كوپپاتەرلى ءۇيدىڭ قۇرىلىسى اياقتالۋعا جاقىن. پاتەر كىلتىن قالانىڭ 238 تۇرعىنى الادى.
«اعىمداعى جىلى پەتروپاۆلدا «2020 جىلعا دەيىن وڭىرلەردى دامىتۋ» باعدارلاماسى بويىنشا 2 ءۇي تاپسىرىلادى. بۇل 90 پاتەرلىك جانە 55 پاتەرلىك ۇيلەر. وسى ەكى ءۇيدىڭ پاتەرلەرىنىڭ 50 پايىزىن جەرگىلىكتى اتقارۋشى ورگان، تاعى 50 پايىزىن - ءوز سالىمشىلارى ءۇشىن «تۇرعىنۇيقۇرىلىسجيناقبانكى» ۇلەستىرىپ جاتىر. ءبىزدىڭ كەزەكتە تۇرعان ازاماتتارىمىزدىڭ ءۇي قۇجاتتارى قابىلدانىپ، وڭدەلدى. پەتروپاۆل قالاسىنىڭ رەسمي سايتىندا نەگىزگى تالاپتار بويىنشا كىم وتكەنى تۋرالى اقپارات بار»، - دەپ اقپاراتتاندىردى پەتروپاۆل قالالىق تۇرعىن ۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمى سەكتورىنىڭ مەڭگەرۋشىسى باۋىرجان بەيسەمبايەۆ.

سونداي-اق پەتروپاۆلداعى «بەرەكە» شاعىناۋدانىندا بيىلعى جىلى «جاس وتباسى» باعدارلاماسى بويىنشا 93 پاتەرلىك ءۇي پايدالانۋعا بەرىلەدى. «جۇمىسپەن قامتۋدىڭ جول كارتاسى» باعدارلاماسى بويىنشا جەتىم بالالار ءۇشىن 200 ورىنعا ارنالعان ەكى جاتاقحانانىڭ قۇرىلىسى اياقتالىپ جاتىر. 

پەتروپاۆلدا جىل باسىنان بەرى ءتورت كوپقاباتتى ءۇي پايدالانۋعا بەرىلدى. قونىستويىن 180 سولتۇستىكقازاقستاندىق اتاپ ءوتتى. وبلىس ورتالىعىندا باسپاناعا كەزەكتە تۇرعان ازاماتتاردىڭ سانى 11 مىڭ ادامنان اسىپ وتىر.

«كەلەسى جىلى بىزدە «قازاقستان يپوتەكالىق كومپانياسى» اق-نىڭ باعدارلاماسى جۇمىس ىستەيدى. يۋبيلەينايا - سەماشكو مەكەنجايى بويىنشا 2015 جىلدىڭ ماۋسىم ايىنان باستاپ قۇرىلىس جۇرگىزىلىپ جاتىر. قازىرگى كەزدە ءۇيدىڭ 2 قاباتى سالىنعان. سونداي-اق ءۇش ءۇي بويىنشا جوبالىق-سمەتالىق قۇجاتتاما دايىندالۋدا. 2016 جىلى بۇل ۇيلەردى تاپسىرامىز»، - دەپ قوستى باۋىرجان بەيسەمبايەۆ. 

دەرەككوز:قازاقپارات