ءماجىلىس دەپۋتاتى دۇيسەنباي تۇرعانوۆ مەملەكەت جانە قوعام قايراتكەرى ساتتار نۇرماش ۇلى يماشيەۆتىڭ 100 جىلدىعىنا ارنالعان كونفەرەنسيادا ونىڭ ءومىر جولى مەن ەلگە سىڭىرگەن ەڭبەگىن ەرەكشە اتاپ ءوتتى.

– پرەزيدەنت قاسىم-جومارت توقايەۆ ابايدىڭ مەرەيتويىن «تويلاۋ ءۇشىن ەمەس، وي تولعاۋ ءۇشىن وتكىزىلەدى» دەگەن ەدى. سول سياقتى ساتتار يماشيەۆتىڭ مەرەيتويى – ءبىزدىڭ حالقىمىز ءۇشىن تەرەڭ ويلاناتىن، تاعىلىم الاتىن كەزەڭ. ول – ەل تاريحىندا وشپەس ءىز قالدىرعان، پاراساتىمەن تانىلعان تۇلعا، – دەدى دەپۋتات.

ساتتار يماشيەۆ – قازاقستاننىڭ كەڭەستىك جانە تاۋەلسىز كەزەڭدەرىندەگى دامۋىنا ۇلەس قوسقان ءىرى قايراتكەر. ول يندۋستريالاندىرۋ، سوعىستان كەيىنگى قالپىنا كەلتىرۋ، اۋىل شارۋاشىلىعىن كوتەرۋ مەن الەۋمەتتىك ينفراقۇرىلىمدى دامىتۋ باعىتىندا بەلسەندى ەڭبەك ەتتى. قازاق كسر جوعارعى كەڭەسى پرەزيديۋمىنىڭ ءتوراعاسى رەتىندە ەلگە ادال قىزمەت ەتىپ، الەۋمەتتىك ادىلەتتىلىكتى، ۇلتتىق مادەنيەتتى قورعاۋعا كۇش سالدى.

تۇرعانوۆ سونىمەن قاتار قايراتكەردىڭ ءبىلىم بەرۋ، دەنساۋلىق ساقتاۋ، جاستار مەن ايەلدەردىڭ قۇقىقتارىن كەڭەيتۋ، ۇلتتىق ءداستۇر مەن ءتىلدى ساقتاۋ باعىتىنداعى ەڭبەگىن دە ەرەكشە اتاپ ءوتتى.

وسىعان وراي، دەپۋتات مىناداي ۇسىنىستارىن جەتكىزدى:

• استانا مەن الماتى قالالارىنداعى كوشەلەردىڭ بىرىنە ساتتار يماشيەۆتىڭ ەسىمىن بەرۋ؛

• اقتوبە وبلىسىندا قايراتكەردىڭ ەسىمىن ۇلىقتاۋ شارالارىن وتكىزۋ؛

• ءال-فارابي اتىنداعى قازۇۋ، ل.ن. گۋميليەۆ اتىنداعى ەۇۋ جانە ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ تاريح فاكۋلتەتى ستۋدەنتتەرىنە ارنالعان ارنايى شاكىرتاقى تاعايىنداۋ؛

• الماتى قالاسىنداعى يماشيەۆ تۇرعان ۇيگە ەسكەرتكىش تاقتا ورناتۋ.

– قازاقتا «ءولى ريزا بولماي، ءتىرى بايىمايدى» دەگەن ءسوز بار. ساتتار نۇرماش ۇلى – جاستار ءۇشىن ەلگە ادال قىزمەت ەتۋدىڭ جارقىن ۇلگىسى، – دەدى دەپۋتات.

ايتا كەتەيىك، كونفەرەنسيا بارىسىندا قاتىسۋشىلار ساتتار يماشيەۆتىڭ ساياسي مۇراسىن، مەملەكەت قۇرىلىسى مەن زاڭنامانى دامىتۋداعى ءرولىن جانە قازىرگى زامان ءۇشىن ماڭىزىن تالقىلادى.