الاياقتىق جانە اتقارۋشىلىق قۇجاتتى ورىنداماۋ بويىنشا كۇدىكتى ساۋد ارابياسىنان ەكستراديسيالاندى.
باس پروكۋراتۋرانىڭ مالىمەتىنشە، بۇگىن قازاقستان رەسپۋبليكاسىنىڭ باس پروكۋراتۋراسى جانە ءىىم ينتەرپول قىزمەتكەرلەرى ساۋد ارابياسى كورولدىگىندەگى قازاقستاننىڭ ەلشىلىگىنىڭ كومەگىمەن ساۋد ارابياسىنان الاياقتىق جانە اتقارۋشىلىق قۇجاتتى ورىنداماۋ بويىنشا قىلمىستىق جاۋاپتىلىققا تارتۋ ءۇشىن قازاقستان ازاماتىن ەكستراديسيالادى.
كۇدىكتى 2018-2023 جىلدار ارالىعىندا الداۋ جانە سەنىمدى تەرىس پايدالانۋ ارقىلى الماتى قالاسىندا جابىرلەنۋشىلەردىڭ 19 ميلليون تەڭگە سوماسىنداعى اقشالاي قاراجاتى مەن مۇلكىن يەمدەنگەن. سونىمەن قاتار ول ۇزاق ۋاقىت بويى الماتىلىق كوممەرسيالىق كومپانيانىڭ 82 ملن تەڭگە سوماسىنا الدىن الا تولەنگەن تاۋاردى جەتكىزۋ بويىنشا مىندەتتەمەلەرىن ورىنداۋدان جالتارعان، - دەلىنگەن حابارلامادا.
سوتقا دەيىنگى تەرگەۋ بارىسىندا كۇدىكتىنىڭ جاسىرىنۋىنا بايلانىستى وعان حالىقارالىق ىزدەۋ جاريالاندى.
وسى جىلى ول ساۋد ارابياسى اۋماعىندا ۇستالىپ، قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا ەلگە ەكستراديسيالاندى.
قازىرگى ۋاقىتتا كۇدىكتى تەرگەۋ يزولياتورىنا قاماۋعا الىندى. وعان تاعىلعان قىلمىستاردى جاساعانى ءۇشىن مۇلكىن تاركىلەۋمەن بەس جىلدان ون جىلعا دەيىن باس بوستاندىعىنان ايىرۋ جازاسى قاراستىرىلعان، - دەپ حابارلادى باس پروكۋراتۋرا.
ايتا كەتۋ كەرەك، كۇدىكتىنىڭ ەكستراديسياسى قازاقستان باس پروكۋراتۋراسى جاساسقان قازاقستان رەسپۋبليكاسى مەن ساۋد ارابياسى كورولدىگى اراسىنداعى ەكستراديسيالاۋ تۋرالى كەلىسىمنىڭ ارقاسىندا مۇمكىن بولدى.
