ورال. قازاقپارات - باتىس قازاقستان وبلىسىندا بيىلعى دەنساۋلىق ساقتاۋ بيۋدجەتى 22،2 ملرد. تەڭگەگە (وتكەن جىلى - 21،9 ملرد. تەڭگە) جەتسە، سونىڭ ىشىندە رەسپۋبليكالىق بيۋدجەتتەن - 14،2 ملرد. تەڭگە، جەرگىلىكتى قازىنادان 8،0 ملرد. تەڭگە ءبولىنىپ وتىر.
وبلىستىق دەنساۋلىق ساقتاۋ باسقارماسىنىڭ باسشىسى قاميدوللا يرمەنوۆتىڭ ايتۋىنشا، بيىلعى توعىز ايعا قاراستىرىلعان 16،3 ملرد. تەڭگە تولىقتاي يگەرىلدى. «100 مەكتەپ، 100 اۋرۋحانا» باعدارلاماسى اياسىندا ورالدا 300 توسەكتىك قالالىق كوپبەيىندى اۋرۋحانا قۇرىلىسى اياقتالىپ كەلەدى. جوبانىڭ جالپى قۇنى - 8،3 ملرد. تەڭگە.

قازىرگى تاڭدا وڭىردە 631597 ادامعا 422 دەنساۋلىق ساقتاۋ نىسانى (سونىڭ 385ء-ى اۋىلدىق جەردە) مەديسينالىق قىزمەت كورسەتەدى.

وتكەن جىلدىڭ وسى كەزەڭىمەن سالىستىرعاندا، بيىلعى توعىز ايدا الەۋمەتتىك كەسەل بولىپ سانالاتىن ءبىرقاتار اۋرۋ بويىنشا وڭ ناتيجەگە قول جەتكىزىلدى. اتاپ ايتقاندا، تۋبەركۋلەزبەن سىرقاتتانۋشىلار 6،4 پايىزعا (100 مىڭ ادامعا  شاققاندا 40،8-دەن 38،2-گە)، وسى دەرتتەن ءولىم-جىتىم 16،7 پايىزعا (100 مىڭ ادامعا شاققاندا 3،0-دەن 2،5-كە دەيىن) تومەندەدى. ەرتە ساتىداعى قاتەرلى ىسىكتەردى انىقتاۋ كورسەتكىشى 2،6 پايىزعا جوعارىلاپ، 56،3 پايىزدى (2014 جىلى - 54،9 پايىز) قۇرادى. سوعان بايلانىستى قاتەرلى ىسىكتەن كوز جۇمعاندار 5،7 پايىزعا (100 مىڭ ادامعا شاققاندا 71،9-دان 67،8-گە دەيىن) ازايدى. جاراقاتتار مەن ۋلانۋدان ءولىم كورسەتكىشى دە 7،3 پايىزعا (64،1-دەن 59،4-كە) كەمىگەن.

وبلىستا اۋرۋدى ەرتە انىقتاۋ ماقساتىندا 274659 ادام نەمەسە ءوڭىر حالقىنىڭ 43،5 پايىزى سكرينينگتىك زەرتتەۋمەن قامتىلىپ، سولاردىڭ ىشىنەن 3،4 پايىزىنان (9362) باستاپقى اۋرۋ بەلگىلەرى انىقتالدى. وسىنىڭ 99،5 پايىزى (9316) ەسەپكە قويىلدى.

ناۋقاستاردى دارى-دارمەكپەن قامتۋعا رەسپۋبليكالىق جانە جەرگىلىكتى بيۋدجەتتەن 3،5 ملرد. تەڭگە ءبولىندى. بۇل 81 مىڭنان استام ادامدى تەگىن دارى-دارمەكپەن قامتۋعا مۇمكىندىك بەردى.

بيىل 2011-2015 جىلدارعا ارنالعان «سالاماتتى قازاقستان» باعدارلاماسى مارەگە جەتىپ، الداعى جىلدان 2016-2019 جىلدارعا ارنالعان «دەنساۋلىق» باعدارلاماسى جۇزەگە اسىرىلا باستايدى.  ەلباسىمىزدىڭ «نۇرلى جول - بولاشاققا بارار جول» اتتى جولداۋىندا اتاپ كورسەتىلگەنىندەي، دەنساۋلىق ساقتاۋدى دامىتۋ باعىتىنداعى جۇمىستار جالعاسىن تابا بەرەدى.

ايتا كەتەيىك، وڭىردە 1564 دارىگەر (10 مىڭ تۇرعىنعا - 25،2)، 5693 ورتا بۋىن مەديسينا قىزمەتكەرى (10 مىڭ تۇرعىنعا - 90،1) قىزمەت ەتەدى. بيىل بقو-عا 87 جاس مامان كەلسە، سونىڭ 52ء-سى اۋىلدىق جەرلەرگە جىبەرىلدى. سونداي-اق وزگە وبلىستاردان 6 مامان قونىس اۋداردى. 

دەرەككوز:قازاقپارات