استانا. قازاقپارات - قىزىلوردادان شىققان سپورتشى، بەلگياداعى ۆەلوسيپەد  اكادەمياسىنىڭ نەگىزىن قالاعان اندرەي كاشەچكين ءقازىر جاھاندىق «بايقوڭىر» جوباسىن قولعا الدى.   اندرەي  كاشەچكيننىڭ ايتۋىنشا، جوبانىڭ ءبىر تارماعى قازاقستاننىڭ جاڭا ۆەلوكومانداسىن قۇرۋ بولسا، ەكىنشى باعىتى - بايقوڭىر قالاسىن الەم تۋريستەرى اعىلاتىن ورتاعا اينالدىرۋ. 
«باستاما - جاھاندىق جوبا، بۇل جوبا اياسىندا ««Baikonur team» دەگەن ۆەلوكوماندا قۇرىپ، ونى قازاقستاننىڭ ۆەلوشاباندوزدارىمەن جاساقتاعىم كەلەدى. سونىمەن قاتار، ەلدەگى ءتۋريزمدى دامىتىپ، قازاقستاننىڭ ءيميدجىن ناسيحاتتاۋ كوزدەلىپ وتىر. مەنىڭ ويىمشا، بايقوڭىر الەم بويىنشا اتاقتى قالا، ءبىراق، ونىڭ قاي ەلدە، قازاقستاننىڭ قاي وبلىسىندا ورنالاسقانىن جاقسى بىلە بەرمەيدى. مىنە، وسى جوبا ارقىلى، جاڭا ۆەلوكوماندا ارقىلى بايقوڭىردى الەمدىك ءتۋريزمنىڭ ورتاسىنا اينالدىرعىم كەلەدى»، - دەيدى ا.كاشەچكين.

«Baikonur team» ۆەلوكومانداسى ءقازىر قۇرىلىپ جاتىر، ال، رەسمي تانىستىرىلىمى 2016 جىلعا جوسپارلانىپ وتىر.

«جالپى، سپورتتىڭ قاي سالاسى بولماسىن، جاڭادان كوماندا قۇرۋ وڭاي شارۋا ەمەس. مىقتى سپورتشىلاردى تاۋىپ، ولاردى كومانداعا تارتۋ ءبىر بولەك تە، كوماندانى الەمنىڭ ارەناسىنا شىعارۋ ءوز الدىنا ۇلكەن جۇمىس. جۇيەلى تارتىپپەن، قاجىرلى ەڭبەك ارقىلى عانا كوماندانى تانىتا الامىز. ءبىر ايتا كەتەرلىگى، وسى ۆەلوكوماندانىڭ نەگىزگى قۇرامى قازاقستاندىق سپورتشىلاردان قۇرالادى، سەبەبى، لەگيونەرلەرگە عانا ءۇمىت ارتۋ قيىن بولادى. سپورتتاعى ءتارتىپ بويىنشا، لەگيونەرلەر كەلىسىمشارت بىتكەن سوڭ، كوماندانى تاستاپ كەتە بەرەدى، ال وليمپيادا ويىندارى نەمەسە الەم چەمپيوناتتارىنا قازاقستاننىڭ ءوز سپورتشىلارى ۇپاي جيناۋ كەرەك»،-دەيدى ا.كاشەچكين.

ازىرگە، «بايقوڭىر» جوباسى يسپانيانىڭ ESCATO GROUP جانە موناكونىڭ CASPIAN SERVICES كومپانيالارىمەن ارىپتەستىك ورناتقان. قىزىلوردا وبلىسىنىڭ اكىمدىگى مەن «EXPO-2017» كومپانيالارىمەن كەلىسسوزدەر ءجۇرىپ جاتىر.

دەرەككوز:قازاقپارات