قىزىلوردا. قازاقپارات - «نۇر وتان» پارتياسى «باقىتى بالالىق» جوباسى اياسىندا «بولاشاققا قارجى سالامىز!» اكسياسىن اعىمداعى جىلدىڭ 7 شىلدەسىندە  استانا قالاسىنان باستاعان بولاتىن. 

وسىعان وراي اتالمىش اكسيا  ساياسي ۇيىمنىڭ بارلىق فيليالدارىندا جالعاسىن تاۋىپ، جەتىم جانە اتا-اناسىنىڭ قامقورلىعىنسىز قالعان بالالارعا ارنالعان ارنايى  ەسەپشوتتار اشىلىپ، سالىمدار سالىندى.

بۇگىن  قىزىلوردا وبلىستىق پارتيا فيليالىنىڭ ءماجىلىس زالىندا قالالىق پارتيا فيليالىنىڭ ۇيىمداستىرۋىمەن قۇقىق قورعاۋ ورگاندارى، ادىلەت قىزمەتكەرلەرى، سۋديالار دەمەۋشىلىگىمەن 18 بالاعا ەسەپشوتتار اشىلدى.

 «باقىتتى بالالىق» پارتيالىق جوبا اياسىنداعى شارانىڭ نەگىزگى ماقساتى - ەكىنشى دارەجەدەگى بانكتەرگە اقشالاي قارجى جيناقتاۋ جولىمەن بالالاردىڭ جوعارى ءبىلىم الۋىنا ىقپال ەتۋ.

«ەلباسى، پارتيا ءتوراعاسى نۇرسۇلتان  نازاربايەۆ «بىلىمگە سالىنعان ينۆەستيسيا - بولاشاققا سالىنعان قارجى» - دەپ اتاپ ءوتتى. بۇل بىلىمگە سالىنعان ينۆەستيسيانىڭ اراعا جىلدار سالىپ ەسەلەپ قايتاتىنىن مەڭزەپ، ۇرپاقتىڭ ءبىلىمى مەن وي-ساناسىنىڭ ۇشقىر بولۋى جولىندا ەشتەڭە ايامايتىن ەلدىڭ ەڭسەسى بيىك ەكەنىن دالەلدەيدى»، - دەدى ءوز سوزىندە وبلىستىق پارتيا فيليالى ساياسي جۇمىستار ءبولىمىنىڭ مەڭگەرۋشىسى التىنبەك  جارىلقاسىنوۆ.

جالپى اكسياعا وبلىس بويىنشا  پارتيا اپپاراتىنىڭ بارلىق  قىزمەتكەرلەرى، وبلىستىق ءماسليحاتتاعى فراكسيا مۇشەلەرى، دەپۋتاتتار،  باستاۋىش پارتيا ۇيىمى جەتەكشىلەرى، جاسوتاندىقتار، كاسىپكەرلەر  اتسالىستى.

ايتا كەتۋ كەرەك، «باقىتتى بالالىق» جوباسى اياسىنداعى شاراعا ەلىمىز بويىنشا 3000، ال قىزىلوردا وبلىسى بويىنشا 150 بالاعا  سالىم  سالۋ كوزدەلسە، وبلىستىق پارتيا فيليالى بۇل مەجەنى 10 بالاعا ارتىق ورىنداپ، اكسيانى  قورىتىندىلادى، دەپ حابارلايدى ساياسي ۇيىمنىڭ وبلىستىق فيليالىنىڭ باسپا ءسوز قىزمەتى.

دەرەككوز:قازاقپارات