استانا. قازاقپارات - تاراز مەملەكەتتىك پەداگوگيكالىق ينستيتۋتىندا «قازاق حاندىعى» ەنسيكلوپەدياسىنىڭ تۇساۋكەسەر ءراسىمى ءوتتى.
قازاق حاندىعىنىڭ 550 جىلدىق مەرەيتويىنا وراي وتكەن جيىنعا ق ر پارلامەنتى سەناتىنىڭ دەپۋتاتتارى، جوعارى وقۋ ورىندارى رەكتورلارى مەن تاريحشىلار قاتىستى، دەپ حابارلادى ءبىلىم ورداسىنىڭ باسپا ءسوز قىزمەتىنەن.

جيىندى تارمپي رەكتورى داريا قوجامجاروۆا اشتى. ول ءوز سوزىندە تاريحتىڭ ەڭ ماڭىزدى قۇندىلىق ەكەنىن، ەلباسىمىز قولداۋ بىلدىرگەن «مادەني مۇرا»، «حالىق تاريح تولقىنىندا» باعدارلامالارى اياسىندا ۇلتىمىزدىڭ ۇلى تاريحىن تانۋعا كەڭ جول اشىلعانىن، قازاق حاندىعىنىڭ قۇرىلۋ، قالىپتاسۋ تاريحىنا ارنالعان وسىناۋ سۇبەلى ەڭبەكتىڭ مازمۇنى وتە جوعارى ەكەنىنە توقتالدى.

ەنسيكلوپەديا ەلباسىنىڭ «اتا تاريح اماناتى - تۇركى دۇنيەسىنىڭ بىرلىگى» اتتى سوزىمەن باستالعان. جامبىل وبلسىنىڭ اكىمى كارىم كوكىرەكبايەۆتىڭ ماقالاسى دا كىتاپتىڭ مازمۇنىن بايىتىپ تۇر. عىلىمي ەڭبەك تارمپي جانىنداعى ءجۇسىپ بالاساعۇن اتىنداعى تۇركىستان ولكەسىنىڭ تاريحىن زەرتتەۋ ورتالىعىندا دايىندالعان. ەنسيكلوپەديادا قازاق حاندىعىنا قاتىستى عىلىمي زەرتتەۋلەردىڭ ناتيجەلەرى بارىنشا مولىنان ەنگىزىلگەن. قازاق حاندىعىنىڭ تاريحىندا وزىندىك ءىز قالدىرعان حاندار، سۇلتاندار، بيلەر، باتىرلار، اقىندار مەن جىراۋلار جانە وزگە تۇلعالار مەن تاريحي وقيعالاردى جان-جاقتى قامتىعان 360-قا جۋىق ماقالا، 300-دەن استام سۋرەتتەر مەن كارتالار بەرىلگەن. سونىمەن قاتار، قازاق حاندىعى تاريحىن زەرتتەۋگە ەلەۋلى ۇلەس قوسقان عالىمدار جايلى مالىمەتتەر دە بار. ەنسيكلوپەديالىق باسىلىمدى دايارلاۋ تۋرالى يدەيانىڭ اۆتورى - جامبىل وبلىسىنىڭ اكىمى كارىم كوكىرەكبايەۆ، باس رەداكتورى - ق ر ۇعا كوررەسپوندەنت مۇشەسى، تاريح عىلىمدارىنىڭ دوكتورى، پروفەسسور، تاراز مەملەكەتتىك پەداگوگيكالىق ينستيتۋتىنىڭ رەكتورى داريا قوجامجاروۆا.

عىلىمي ەڭبەكتىڭ لەنتاسىن مەملەكەت تاريحى ينستيتۋتىنىڭ ديرەكتورى بۇركىت اياعان مەن شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى حانگەلدى ءابجانوۆ سالتاناتتى جاعدايدا كەستى. سونىمەن قاتار، جيىن بارىسىندا تاريح عىلىمدارىنىڭ دوكتورى، ق ر ۇعا كوررەسپوندەنت-مۇشەسى، پروفەسسور داريا قوجامجاروۆانىڭ «قازاق حاندىعى» اتتى مونوگرافيالىق ەڭبەگى دە وقىرماندارعا جول تارتتى.  مۇنان بولەك، شارا اياسىندا تارمپي جانىنداعى ءجۇسىپ بالاساعۇن اتىنداعى تۇركىستان ولكەسىنىڭ تاريحىن زەرتتەۋ ورتالىعىندا جارىق كورگەن ءبىرقاتار كىتاپتاردىڭ تانىستىرىلىمى ءوتتى.

دەرەككوز: قازاقپارات