استانا. قازاقپارات - قازاقستان پرەزيدەنتى نۇرسۇلتان نازاربايەۆ الماتى قالاسىنىڭ اكىمى باۋىرجان بايبەكتى قابىلدادى. كەزدەسۋ بارىسىندا ب.بايبەك قالانى الەۋمەتتىك-ەكونوميكالىق تۇرعىدان دامىتۋ جۇمىستارى جونىندە باياندادى.
بۇل تۋرالى اقوردانىڭ باسپا ءسوز قىزمەتىنەن حابارلادى.

اتاپ ايتقاندا، نەگىزگى ازىق-تۇلىك باعاسىنىڭ وسۋىنە جول بەرمەۋ، ءتيىمدى وقۋ ۇدەرىسىن ۇيىمداستىرۋعا جاعداي جاساۋ، جىلۋ بەرۋ ماۋسىمىنا دايىندىق جونىندەگى شارالار قابىلدانۋدا.

ب.بايبەك جالپى سوماسى 10 ميلليارد تەڭگە بولاتىن مەموراندۋمعا قول قويىلعانىن، سوعان سايكەس الماتى كاسىپورىندارى ءوز ونىمدەرىن «ەكسپو-2017» كورمەسى نىساندارىنىڭ قۇرىلىسىنا جەتكىزىپ وتىراتىنىن ايتتى. مۇنداي قادام الداعى ۋنيۆەرسيادا نىساندارىنا دا بايلانىستى جوسپارلانىپ وتىرعانى اتاپ ءوتىلدى.

سونىمەن قاتار الماتى اكىمى بيىلعى شىلدەدە بولعان كوشكىن زاردابىن جويۋ جۇمىستارى تۋرالى دا ايتتى. ماسەلەن، ءتيىستى وتەماقىلىق تولەمدەر جاسالىپ، اۋماقتاردى تازارتۋ جۇمىستارى جۇرگىزىلدى، قارعالى وزەنىنىڭ ساعاسىن بەكىتۋ جونىندە شارالار قابىلداندى.

ب.بايبەك «نۇر وتان» پارتياسىنىڭ جەمقورلىققا قارسى ءىس-قيمىل باعدارلاماسى اياسىندا تاياۋ ۋاقىتتا قالا مەكتەپتەرى مەن اۋرۋحانالارىنىڭ قارجىلىق ەسەپتەرىن جاريالاۋ تاجىريبەسىن ەنگىزۋ قاراستىرىلىپ وتىرعانىن حابارلادى.

الماتى اكىمى حالىقپەن كەرى بايلانىستىڭ جولعا قويىلعانىن ايتىپ، سونداي-اق قالانىڭ الەۋمەتتىك-ەكونوميكالىق كورسەتكىشتەرىن ودان ءارى جاقسارتۋدى قامتاماسىز ەتۋگە باعىتتالعان ءىس-قيمىلدار جونىندە، سونىڭ ىشىندە قالانىڭ 2020 جىلعا دەيىن دامىتۋ ستراتەگياسىن ازىرلەۋ ءىسىنىڭ باستالعانى تۋرالى بايان ەتتى.

مەملەكەت باسشىسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى. 

دەرەككوز: قازاقپارات