قازاق تىلىندەگى حابار از بولعانى ءۇشىن تەلەارنالارعا اكىمشىلىك جازا قولدانۋ ۇسىنىلدى
مادەنيەت جانە اقپارات مينيسترلىگى قازاق تىلىندە جەتكىلىكتى كولەمدە حابار تاراتپاعان تەلەارنالار مەن راديوستانسيالارعا اكىمشىلىك جاۋاپكەرشىلىك ەنگىزۋدى كوزدەپ وتىر. جاڭا نورماعا سايكەس، 2025 جىلدىڭ 1 قاڭتارىنان باستاپ اپتالىق ەفير ۋاقىتىنىڭ كەمىندە 55%-ى قازاق تىلىندەگى كونتەنتكە ارنالۋى ءتيىس.
اتالعان تالاپ بۇعان دەيىن دە زاڭدا كورسەتىلگەنىمەن، ونى بۇزعاندارعا ەشقانداي جازا قولدانىلماعان. ەندى بۇل ەرەجەنى ساقتاماعان باق-تارعا ايىپپۇل سالۋ ۇسىنىلىپ وتىر.
قازىرگى ۋاقىتتا اكىمشىلىك قۇقىقبۇزۋشىلىقتار كودەكسىنە وزگەرىستەر ەنگىزۋ تۋرالى زاڭ جوباسى قوعام تالقىسىندا. ازاماتتار ءوز پىكىرلەرىن 10 شىلدەگە دەيىن بىلدىرە الادى.
جوبا اياسىندا تىلدىك كۆوتادان بولەك، جارناما ۋاقىتىنا قاتىستى تالاپتاردى بۇزعان تەلە-راديو حابار تاراتۋشىلارعا دا جازا قولدانۋ ۇسىنىلعان. قولدانىستاعى زاڭ بويىنشا، جارناما ەفير ۋاقىتىنىڭ تاۋلىگىنە 20%-ىنان اسپاۋى كەرەك.
سونىمەن قاتار، مينيسترلىك الەۋمەتتىك جەلىلەر مەن ۆيدەوپلاتفورمالاردا قۇقىققا قايشى كونتەنت تاراتقاندارعا ايىپپۇل سالۋ جۇيەسىن ەنگىزۋدى ۇسىنۋدا. ۆەدومستۆونىڭ مالىمەتىنشە، 2024 جىلى وتاندىق ونلاين پلاتفورمالاردا 78،5 مىڭنان استام زاڭعا قايشى ماتەريال انىقتالعان، ءبىراق ونىڭ تەك 24،3%-ى عانا جويىلعان.
جوبا شەتەلدىك تاجىريبەگە دە سۇيەنەدى. ەۋروپالىق وداق ەلدەرىندە، ۇلىبريتانيا مەن وڭتۇستىك كورەيادا تىلدىك جانە جارنامالىق تالاپتاردى بۇزعان مەديا ۇيىمدارعا ميلليونداعان ەۋرو كولەمىندە ايىپپۇل سالىنىپ، ءتىپتى پلاتفورمالاردى بۇعاتتاۋ شارالارى قولدانىلادى.
قازاقستان بيلىگى مۇنداي قادام مەديا مەكەمەلەردىڭ جاۋاپكەرشىلىگىن ارتتىرىپ، مەملەكەتتىك ءتىلدى دامىتۋعا سەرپىن بەرەدى دەپ سانايدى.
ەسكە سالا كەتەيىك، بۇعان دەيىن بەكىتىلگەن 2030 جىلعا دەيىنگى ءتىل ساياساتىن دامىتۋ تۇجىرىمداماسىنا سايكەس، 2029 جىلعا قاراي مەملەكەتتىك تەلەارنالارداعى ءقازاقتىلدى باعدارلامالاردىڭ ۇلەسىن 85%-عا، ال حالىقتىڭ قازاق ءتىلىن مەڭگەرۋ دەڭگەيىن 84%-عا جەتكىزۋ جوسپارلانعان.
