قىزىلوردا. قازاقپارات-قىزىلوردادا بيىل كوكتەمدە قازىعى قاعىلعان شىنى زاۋىتىنىڭ قۇرىلىس جۇمىستارى جوسپارعا سايكەس جۇرۋدە. كەشە وبلىس اكىمى قىرىمبەك كوشەربايەۆ قۇرىلىس الاڭىندا بولىپ، جۇمىس بارىسىمەن تانىستى. 
بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

ءقازىردىڭ وزىندە ءوندىرىس ورنىنا قاجەتتى دايىن ونىمدەر قويماسى ىرگەتاسىنىڭ 95 پايىز جۇمىسى اياقتالدى. سونداي-اق عيماراتتىڭ ۇستىڭگى جاعىنىڭ قۇرىلىسىن سالۋ باستالىپ، ول ءۇشىن كولوننالار (تەمىر قۇراستىرمالار) ورناتىلۋدا. قازان ايىنىڭ سوڭىنا دەيىن بارلىعى 200 كولوننا  ورناتىلاتىن بولادى. ال قىس كۇندەرى ىشكى  جۇمىستارى، ياعني مەتالل قۇرىلعىسىن مونتاجداۋ جۇمىستارى قولعا الىنادى. زاۋىت قويماسى سالىنىپ بىتكەن سوڭ مۇندا تەمىر جول تۇيىعىن جۇرگىزۋ  باستالماق.

«ءقازىر قۇرىلىس جۇمىستارىنا 110 جۇمىسشى جانە 20 تەحنيكا جۇمىلدىرىلىپ وتىر. بارلىعى كەستە بويىنشا جۇرۋدە. قۇرىلىس زاتتارىنىڭ باسىم بولىگى جەرگىلىكتى جەردەن الىنىپ جاتىر. جۇمىسشىلارعا دا بار جاعداي جاسالعان. زاۋىت تولىق ىسكە قوسىلعاندا تۇراقتى 350-400 جاڭا جۇمىس ورنى اشىلماق»، - دەيدى «Orda Glass Ltd» ءجشس-نىڭ قۇرىلىس جونىندەگى ديرەكتورى بەگالى توقايەۆ.

وبلىس اكىمى قىرىمبەك كوشەربايەۆ قۇرىلىستىڭ ساپاسىنا اسا ءمان بەرۋدى جانە جوسپارعا سايكەس ۋاقتىلى جۇرگىزىلىپ وتىرۋىن تاپسىردى. ايتا كەتەيىك، شىنى زاۋىتىنىڭ قۇرىلىسى قىزىلوردا قالاسى، تيتوۆ مولتەكاۋدانىندا ورنالاسقان يندۋستريالىق ايماقتا جۇرگىزىلىپ جاتىر. بولاشاقتا مۇندا فەرروقورىتپا زاۋىتىن سالۋ دا جوسپاردا.

ال، شىنى زاۋىتى ىسكە قوسىلعان كەزدە كۇنىنە 600 توننا (جىلىنا 197 100 توننا) شىنى تاباقشاسىن وندىرۋگە قۋاتتى. شىنى وندىرىسىنە قاجەتتى شيكىزاتتىڭ 95 پايىزى جەرگىلىكتى جەردەن الىناتىن بولادى. بۇل مەگا جوبانىڭ جالپى قۇنى 52 ملرد. تەڭگەنى قۇرايدى.

 ەستەرىڭىزگە سالا كەتەيىك، قارجىنىڭ 80 پايىزىن «قازاقستان دامۋ بانكى» بولسە، قالعان 20 پايىزىن «Steward Engineers» اقش كومپانياسى مەن قازاقستان ينۆەستيسيا قورى ينۆەستور رەتىندە قارجىلاندىرماق.

دەرەككوز: قازاقپارات