الماتى. قازاقپارات - بۇگىن الماتى قالاسىنىڭ ەمحانالارى مەن مەديسينالىق ورتالىقتارىندا جازىلماس دەرتكە شالدىققان ناۋقاستارعا حوسپيستىك جانە پاللياتيۆتىك كومەك كورسەتۋ بويىنشا اقپاراتتىق اكسيا ءجۇرىپ جاتىر.
بۇل شارا 10 قازان - دۇنيەجۇزىلىك حوسپيستەر جانە پاللياتيۆتىك قىزمەتتەر كۇنى اياسىندا ارنايى ۇيىمداستىرىلدى.
«پاللياتيۆتىك قىزمەت، بۇل بۇكىل الەم بويىنشا جاڭا ۇعىم. ونى دەنساۋلىق ساقتاۋ سالاسىنىڭ جاڭا باعىتى، جاڭا سالاسى دەۋگە بولادى. ول ايىقپاس دەرتكە شالدىققان، ارنايى مەديسينالىق ەم قولدانۋ توقتاتىلعان ناۋقاستارعا كومەك كورسەتۋگە باعىتتالعان. بۇگىن الماتى قالالىق ونكولوگيالىق ورتالىعىنىڭ ماماندارى ءبىرقاتار ەمحانالار مەن مەديسينالىق ورتالىقتاردى ارالاپ، دارىگەرلەر جانە ەم قابىلداۋعا كەلگەندەر اراسىندا پاللياتيۆتىك كومەك كورسەتۋ بويىنشا ءتۇسىندىرۋ جۇمىستارىن جۇرگىزۋدە جانە ولارعا ارنايى جادىنامالار تاراتادى»، - دەدى «قازاقپارات» تىلشىسىنە بەرگەن سۇحباتىندا بۇگىنگى شارانى ۇيىمداستىرۋشى ۇيىم - قازاقستاننىڭ پاللياتيۆتىك كومەك كورسەتۋ قاۋىمداستىعىنىڭ پرەزيدەنتى، «قاتەرلى ىسىككە قارسى بىرگە كۇرەسەمىز» قوعامدىق قورىنىڭ ديرەكتورى گۇلنار قوڭىروۆا.
سونىمەن قاتار ول ايىقپاس دەرتكە شالدىققانداردىڭ جان ازابىن جەڭىلدەتۋدە ولاردىڭ تۋعان-تۋىستارىنىڭ الار ورنى ەرەكشە ەكەندىگىن جەتكىزدى.
«بۇل ناۋقاستار كوپ جاعدايدا قوعام نازارىنان، دەنساۋلىق ساقتاۋ سالاسىنان تىس قالىپ جاتادى. بۇل تۇسىنىكتى دە. ولار جالعىزدىقتان زارداپ شەگەدى. مەديسينا دارمەنسىزدىك تانىتقان سوڭ، بويلارىن قورقىنىش بيلەيدى. ءبىراق پاللياتيۆتىك قىزمەتتە «كومەك كورسەتە المايىز» دەگەن ءسوز ايتىلمايدى. اۋرۋ، سىزداۋعا قارسى ەمدى بىلە وتىرىپ، ناۋقاستىڭ جان ازابىن ازايتىپ، كۇتىمىن جاقسارتۋعا ابدەن بولادى. بۇل ادىستەرگە ونىڭ تۋىستارىن ۇيرەتۋ وتە ماڭىزدى. ويتكەنى مۇنداي ادامداردىڭ 95 پايىزى حوسپيستە ەمەس، ۇيدە جاتقاندى قالايدى. سول ءۇشىن ولاردى جالعىز قالدىرۋعا بولمايدى. «نە ايتام» دەپ قينالۋدىڭ قاجەتى جوق. ەڭ بولماسا، قاسىنا كەلىپ، قولىنان ۇستاپ، سوڭعى ساتكە دەيىن جانىندا بولاتىندىعىڭىزدى بىلدىرسەڭىز، سونىڭ ءوزى وعان ۇلكەن دەمەۋ»، - دەدى گ. قوڭىروۆا.
ايتا كەتەلىك، الماتى ونكولوگيالىق ورتالىعىنىڭ بازاسىندا وتكەن جىلدىڭ جەلتوقسان ايىنان بەرى ونكولوگيالىق اۋرۋلارعا شالدىققاندارعا ۇيدە كومەك كورسەتۋ ءموبيلدى بريگاداسى جۇمىس ىستەپ كەلەدى.
ال «قاتەرلى ىسىككە قارسى بىرگە كۇرەسەمىز» قوعامدىق قورىنىڭ ۇيىمداستىرۋىمەن الماتى قالاسىندا 2012 جىلدان بەرى 600-دەن استام دارىگەر پاللياتيۆتىك كومەك كورسەتۋ بويىنشا وقىتۋ كۋرستارى مەن سەمينارلارعا قاتىسقان. ولاردىڭ ىشىندە الماتى ونكولوگيالىق ورتالىعى، اۋرۋحانالار، ەمحانالار جانە ءبىرقاتار جەكە مەديسينالىق ورتالىقتاردىڭ دارىگەرلەرى بار.
دەرەككوز. قازاقپارات
