استانا. قازاقپارات - وڭتۇستىك قازاقستان وبلىسىنىڭ اكىمى بەيبىت اتامقۇلوۆ تۇلكىباس اۋدانىنا جاساعان جۇمىس ساپارىندا وسىلاي دەدى. ايماق باسشىسى ونداعى «ارسەن اس» ءجشس-نىڭ جەمىس-جيدەك كونسەنتراتتارىن جانە تابيعي سۋسىن شىعارۋ سەحىنىڭ جۇمىسىمەن تانىستى.
كاسىپورىن باسشىسىنىڭ ايتۋىنشا، سەح جۇمىسى تولىق قۋاتىنا شىققاندا ءوڭىر حالقى جۇڭگو مەن برازيليانىڭ جەمىس-جيدەك شىرىنىنا قۇمارتپايتىن بولادى. ەكولوگيالىق تازا وتاندىق ءونىم وبلىستىڭ عانا ەمەس، رەسپۋبليكانىڭ قاجەتتىلىگىن قامتاماسىز ەتۋگە قاۋقارلى بولماق. جوبانىڭ جالپى قۇنى 600 ميلليون تەڭگەنى قۇرايدى. ونىڭ 480 ميلليون تەڭگەسىن «ماكسيمۋم» ايو قارجىلاندىرعان. 

اۋدانعا ساپارى بارىسىندا وبلىس باسشىسى ميچۋرين اۋىلدىق وكرۋگىندەگى «ءمولدىر» ءجشس-نىڭ تۇركيالىق كومپانيامەن بىرلەسىپ باستاعان ينتەنسيۆتى باۋىن ارالادى. 115 گەكتار القاپتا "گولدەن دەليشەس"، "گرانت سميت" جوعارى سۇرىپتى المالارى ەگىلگەن. ايتا وتكەن ءجون، ءتاتتى الماسىمەن تانىمال تۇلكىباس اۋدانىندا 2600 گەكتارعا الما باۋى ەگىلگەن.

سونداي-اق، بۇل كۇنى ب.اتامقۇلوۆ ت.رىسقۇلوۆ اۋىلىنداعى اۋداندىق «نۇر وتان» پارتياسىنىڭ جاڭا عيماراتىن ارالاپ، اۋىلداعى ت.رىسقۇلوۆقا ارنالعان ەسكەرتكىشكە گۇل شوقتارىن قويدى. اۋداندا مەملەكەت جانە قوعام قايراتكەرى تۇرار رۇسقۇلوۆقا ارنالعان ءتورت ەسكەرتكىش بار. 

ساپار بارىسىندا وبلىس باسشىسى اۋدان ورتالىعىنىڭ باس جوسپارىمەن تانىسىپ، اۋدان ارقىلى وتەتىن «باتىس ەۋروپا - باتىس جۇڭگو» ترانزيتتىك جول ءدالىزىنىڭ قۇرىلىسىن كوردى. يندۋستريالدى ايماقتىڭ تىنىس-تىرشىلىگىن باقىلادى. تۇلكىباستىڭ ەرەكشەلىگىنە وراي، بۇل يندۋستريالدى ايماق تاماق ونىمدەرىن ءوندىرۋ بويىنشا جۇمىس ىستەمەك. ول ءۇشىن 15 جوبا جاسالۋى ءتيىس. بۇگىنگە دەيىن ونىڭ بەسەۋى ۇسىنىلعان. اتاپ ايتساق، وعان «كەنتاۋ» ءجشس-نىڭ كونسەنترات جانە تابيعي سۋسىندار ءوندىرۋ سەحى، «جامبۋل باقشاسى» كوكونىس جانە جەمىس-جيدەكتى قايتا وڭدەۋ سەحى، «راح وڭتۇستىك» ءجشس-نىڭ قۇس ەتىن وڭدەۋ سەحى مەن «شىمكەنت اركا» ءجشس-نىڭ كوكونىس جانە جەمىس-جيدەكتى قايتا وڭدەۋ سەحى جانە «دورسەرۆيس» وك-نىڭ كوكونىس جانە جەمىس-جيدەكتى قايتا وڭدەۋ سەحى كىرەدى، دەپ حابارلادى وقو اكىمىنىڭ باسپا ءسوز قىزمەتىنەن.

دەرەككوز: قازاقپارات