الماتى. قازاقپارات - بۇگىن الماتىدا ءداستۇرلى «جولدا قابىلداۋ» رەسپۋبليكالىق الدىن الۋ اكسياسى باستالدى. ول ءار ءۇش اي سايىن ءوتىپ تۇرادى.
«بۇل شارانىڭ ماقساتى - ازاماتتارىمىزدىڭ ءار ءتۇرلى سالا بويىنشا قۇقىقتىق ساۋاتتالىعىن ارتتىرۋ. سول ءۇشىن بۇگىن وسى اكسيا اياسىندا الماتى قالاسى بويىنشا بەس مۋنيسيپالدىق اۆتوبۋس حالىق كوپ شوعىرلاناتىن جەرلەرگە قويىلدى. ءاربىر اۆتوبۋستا  جول پوليسياسىنىڭ وكىلى، جەرگىلىكتى ۋچاسكەلىك ينسپەكتور، زاڭگەر، «نۇر وتان» پارتياسىنىڭ الماتى قالالىق فيليالى مەن اۋداندىق اكىمدىكتىڭ وكىلدەرى جانە جاڭا ەلەكتروندى بيلەتتەندىرۋ جۇيەسى بويىنشا مامان جۇمىس ىستەيدى. ولار وزدەرىنە قاتىستى قانداي دا ءبىر ماسەلەمەن كەلگەن ازاماتتاردىڭ سۇراقتارىنا جان-جاقتى جاۋاپ بەرەدى. ەگەر جاۋاپ بەرە الماساق، وندا سۇراقتى جازىپ الىپ، كەيىن جاۋاپ دايىن بولعان سوڭ، ونى ازاماتقا تەلەفون ارقىلى نەمەسە «نۇر وتان» پارتياسىنىڭ الماتى قالالىق فيليالىنىڭ قوعامدىق قابىلداۋىنا شاقىرىپ ايتاتىن بولامىز»، - دەدى ءوز سوزىندە «نۇر وتان» پارتياسى الماتى قالالىق فيليالىنىڭ قوعامدىق قابىلداۋ ءبولىمىنىڭ مەڭگەرۋشىسى نۇرلانبەك اجىبايەۆ.

سونىمەن قاتار، ول ازاماتتاردىڭ ماماندارعا كوپ جاعدايدا قۇقىقتىق ماسەلەلەر بويىنشا جۇگىنەتىندىگىن جەتكىزدى.

«ەگەر تاجىريبەگە سۇيەنىپ ايتار بولساق، ازاماتتار كوبىنەسە قۇقىقتىق ماسەلەلەر بويىنشا جۇگىنەدى. مىسالى، جول-كولىك اپاتى، جول قوزعالىسى ەرەجەسىنىڭ بۇزىلۋى، جەر، پاتەر جانە سوت ماسەلەسى بويىنشا سۇراقتار قويادى. بىزدە ەشقانداي ساۋال جاۋاپسىز قالمايدى»، - دەدى ن. اجىبايەۆ.

ايتا كەتەلىك، بۇعان دەيىن وتكىزىلگەن اكسيا بارىسىندا الماتى قالاسىنىڭ ءۇش اۋدانى قامتىلعان بولاتىن. بۇل جولى بارلىق سەگىز اۋدان قامتىلىپ وتىر. وسى ماقساتتا بەس مۋنيسيپالدىق اۆتوبۋس سىرتىنا «جولدا قابىلداۋ» دەپ جازىلعان اقپاراتتىق پلاكاتپەن راسىمدەلدى. ولاردىڭ ءبىرى اۋەزوۆ جانە الاتاۋ اۋداندارى بويىنشا  - «ماگنۋم» ساۋدا ءۇيىنىڭ ماڭىنا، ەكىنشى اۆتوبۋس بوستاندىق اۋدانى بويىنشا - «اتاكەنت» ىسكەرلى ورتالىعى، ءۇشىنشى اۆتوبۋس جەتىسۋ اۋدانى بويىنشا «ادەم» ساۋدا ءۇيى، ءتورتىنشى اۆتوبۋس مەدەۋ جانە المالى اۋداندارى بويىنشا  پۋشكين مەن ماقاتايەۆ كوشەلەرىنىڭ قيىلىسىنا جانە بەسىنشى اۆتوبۋس ناۋرىزباي اۋدانى اكىمدىگىنىڭ ماڭىنا قويىلدى. شارا بۇگىن كەشكى ساعات 17:30-عا دەيىن جالعاسادى.

ۇيىمداستىرۋشىلاردىڭ ايتۋىنشا، بۇگىن كەشكە قاراي 1000-نان اسا ادام «جولداۋ قابىلداۋ» اكسياسىنا قاتىسادى دە كۇتىلۋدە.  ال جىل باسىنان بەرى الماتىدا 3000-نان استام ادام جۇگىنگەن. 

دەرەككوز. قازاقپارات