اتىراۋ. قازاقپارات - اتىراۋ وبلىسىندا يندۋستريالىق-يننوۆاسيالىق دامىتۋ باعدارلاماسىنىڭ اياسىندا 76 ميلليارد تەڭگەگە 33 جوبا جۇزەگە اسىرىلىپ جاتىر.
بۇل تۋرالى ورتالىق كوممۋنيكاسيالار قىزمەتىنىڭ اتىراۋ فيليالىندا وتكەن بريفينگ بارىسىندا وبلىستىق اكىمدىكتىڭ كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ باسشىسى لاريسا جۇماعالييەۆا ءمالىم ەتتى، دەپ حابارلايدى قازاقپاراتتىڭ اتىراۋ وبلىسىنداعى ءتىلشىسى ا. سوكولوۆ.
«اتىراۋ وبلىسى 2015 جىلدان مۇناي-گاز ونەركاسىبىنە ارنالعان سەرۆيستىك قىزمەتتەر بويىنشا ۇلتتىق كلاستەرىنىڭ ورتالىعى بولىپ اتىراۋ قالاسىنىڭ بەلگىلەنگەن. اتالعان باعدارلامانى جۇزەگە اسىرۋ ءۇشىن مىڭداعان جۇمىسكەرلەر مەن ماماندار تارتىلماقشى. ءبىر عانا «تەڭىزشيەۆرويل» ج ش س ءۇشىنشى بۋىن زاۋىتىنىڭ قۇرىلىسى بارىسىندا 20 مىڭعا جۋىق جاڭا جۇمىس ورنى اشىلماق، ال زاۋىت پايدالانۋعا بەرىلگەن كەزدە 500 قىزمەتكەردى جۇمىسقا الادى»، - دەدى باسقارما باسشىسى.
ل. جۇماعالييەۆانىڭ ايتۋىنا قاراعاندا، وبلىستا يندۋستريالىق-يننوۆاسيالىق دامىتۋ باعدارلاماسىنىڭ اياسىندا 76 ميلليارد تەڭگەگە 33 جوبا جۇزەگە اسىرىلىپ جاتىر. بۇگىنگى كۇنى ەكونوميكانىڭ ءتۇرلى سالالارىندا 2،5 مىڭ جاڭا جۇمىس ورنى اشىلعان.
«وتكەن جىلمەن سالىستىرعاندا شاعىن جانە ورتا بيزنەس ءبىر پايىزعا ءوسىپ، حالىقتى جۇمىسپەن قامتۋ 5،6 پايىزعا ۇلعايعان. كاسىپكەرلەر اراسىندا «بيزنەستىڭ جول كارتاسى-2020» باعدارلاماسى ۇلكەن سۇرانىسقا يە. سونداي-اق اۋىلداعى كاسىپكەرلەرگە وبلىستىق بيۋدجەتتەن دە قاراجات بولىنۋدە»، - دەدى وبلىستىق اكىمدىكتىڭ كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ باسشىسى لاريسا جۇماعاليۆا.
الداعى ۋاقىتتارى اتىراۋ وبلىسىندا ايەلدەر اراسىنداعى كاسىپكەرلىك قارجىلاندىرىلماق. بۇل ءۇشىن ازيا دامۋ بانكى ءبىر ميلليارد دوللار بولگەن.
ايماقتا «بيزنەستىڭ جول كارتاسى - 2020» باعدارلاماسىن جۇزەگە اسىرۋ دا جالعاسىپ جاتىر. بۇل باعدارلاماعا رەسپۋبليكالىق بيۋدجەتتەن ءۇش باعىت بويىنشا 1 ملرد. 227 ملن. تەڭگە قاراجات ءبولىندى. بۇل باعدارلاما وبلىستا ءساتتى جۇزەگە اسىرىلۋدا.
دەرەككوز. قازاقپارات
پىكىر قالدىرۋ