تالدىقورعان. قازاقپارات - تالدىقورعان قالاسىنىڭ اكىمى ەرمەك الپىسوۆ جولاۋشىلار تاسىمالى كاسىپورىندارىنىڭ باسشىلارىمەن جينالىس وتكىزدى.
كەزدەسۋ بارىسىندا سالا بويىنشا ءبىرقاتار ماسەلەلەر، ونىڭ ىشىندە قوعامدىق كولىك قىزمەتىنىڭ ساپاسى، كولىكتەردىڭ جاعدايى مەن سالانى ارى قاراي دامىتۋ تالقىلاندى.

قالا باسشىسى جينالىستىڭ باسىندا مارشرۋتتىق اۆتوبۋستاردىڭ جۇمىسىنداعى ءبىرقاتار  كەمشىلىكتەردى اتاپ ءوتتى. مىسالى،  170 اۆتوبۋستىڭ 90 كوندۋكتورى عانا بار. سونداي-اق جولاۋشىلارعا بيلەتتەر بەرىلمەگەن، بۇنداي بۇزۋشىلىق 50 اۆتوبۋستا ورىن العان. سونىمەن بىرگە قوعامدىق كولىكتەردىڭ سانيتارلىق جاعدايى دا  ءسوز بولدى.

قالا اكىمى بۇل جولاۋشىلار تاسىمالى كاسىپورىندارىنىڭ باستى ماسەلەلەرى بولىپ تابىلاتىنىن اتاپ ءوتىپ، تەز ارادا اۆتوپاركتى تارتىپكە كەلتىرۋدى تاپسىردى. ەرمەك الپىسوۆ اۆتوبۋستاردا ورناتىلعان اقپاراتتىق تاقتايشالاردى دا ايتىپ ءوتتى. ينسپەكسيانىڭ حابارلاۋىنشا، ولاردىڭ ءبىرقاتارىندا اقپارات مەملەكەتتىك تىلدە جازىلماعان، بۇل زاڭناماعا قايشى بولىپ كەلەدى. اكىم جوعارىدا اتالعان ولقىلىقتار 25 قازانعا دەيىن جويىلىپ، اۆتوبۋستاردىڭ قىس مەزگىلىنە دايىن بولۋ قاجەتتىگىن ەسكەرتتى.

كوپتەگەن كەمشىلىكتەرمەن بىرگە قالا باسشىسى جەتىستىكتەردى دە ايتىپ ءوتتى. كوپتەگەن كاسىپورىنداردا اۆتوبۋس پاركى جاڭارتىلىپ، قىزمەت كورسەتۋ ساپاسى جاقسارعان. سونىمەن بىرگە اكىم ەلەكتروندى بيلەت جۇيەسىن ەنگىزۋدى ۇسىندى.  اكىمنىڭ بۇل ۇسىنىسىن جولاۋشىلار تاسىمالى كاسىپورىندارىنىڭ باسشىلارى قولدادى. ءسوز سوڭىندا قالا اكىمى جولاۋشىلار تاسىمالداۋ باسقارماسى ورتالىعىنىڭ ديرەكتورىنا بۇل ماسەلەنى جان-جاقتى زەردەلەپ، ۇسىنىس ەنگىزۋدى تاپسىردى.

دەرەككوز: قازاقپارات