تاراز. قازاقپارات - قازاق مەملەكەتتىلىگىنىڭ 550 جىلدىعىن مەرەكەلەۋگە وراي مادەني-بۇقارالىق شارالاردىڭ كولەمدى باعدارلاماسى ازىرلەندى، دەپ حابارلادى قازاقپاراتتىڭ جامبىل وبلىسىنداعى ءتىلشىسى گالينا سكريپنيك.
«ەگەر مەن ءقازىر مەرەكەگە ارناپ ازىرلەنگەن بارلىق تارتىمدى ءىس-شارالاردى ايتىپ قويسام، ول كەيىن قىزىقسىز بولىپ قالادى. مەرەيتويلىق سالتاناتتار اياسىندا 2 مىڭ جىلدان استام تاريحى بار تاراز قالاسىنىڭ قوناقتارى مەن تۇرعىندارىن اۋقىمدى مادەني-مەرەكەلىك باعدارلاما كۇتىپ وتىر. مەرەكەنىڭ قۇرمەتىنە ونداعان شارالار جوسپارلانعان. مىسالى، تۇڭعىش پرەزيدەنت ساياباعىندا كوشپەندىلەر وركەنيەتىنىڭ بۇكىل تاريحى كورسەتىلەدى. بۇل بالالاردى دا، قارتتاردى دا قىزىقتىرادى دەپ ويلايمىن»، - دەدى باسپا ءسوز ءماسليحاتىندا جامبىل وبلىسى اكىمىنىڭ ورىنباسارى ەرقانات ءمانجۋوۆ.

"تۇڭعىش پرەزيدەنت ساياباعىندا ەكى كۇن بويى دالا بيلەۋشىلەرى مەن كوشپەندىلەردىڭ ومىرلىك ادەت-عۇرىپتارىنىڭ ءبىرقاتار كومپوزيسيالارى ۇسىنىلاتىن «قازاق الەمى» اتتى تاريحي-ەتنوگرافيالىق كەشەن اشىلادى.

قولدانبالى ونەر بۇيىمدارى، كونە كىلەمدەر، قارۋلار، زەرگەرلىك بۇيىمدار  كورمەلەرى، كونە قىلىشتارمەن  اسەرلى قولما-قول ۇرىس قيمىلدارى ۇيىمداستىرىلادى. سونداي-اق دالا بيلەۋشىلەرىنىڭ جورىققا شىققاندا تىككەن شاتىرلارى مەن كيىز ۇيلەر ورناتىلىپ، «سكيفتەر-ساقتار قىلىشى» رەلەفتىك پاننوسى، «جەل داۋىسى» ينستاللياسياسى جانە ت.ب. ورنالاستىرىلادى"، - دەپ باياندادى ە.ءمانجۋوۆ. 

كونسەرتتەر مەن شارالار تىزىلىمىندە «ۇلى جىبەك جولى» ەتنوفەستيۆالدارى، «دوستىق» ەتنوقالاشىعى، حالىق ويىندارى بويىنشا بايقاۋلار، كيىز بۇيىمداردان جاسالعان بالالار الاڭى، قازاق كيىز ءۇيىنىڭ تاريحى مەن تۇرلەرى تۋرالى تانىمدىق باعدارلامالار، كوشپەندىلەردىڭ قارۋلارى مەن ساۋىتتارى، «ارلان» كوستيۋمدەر تەاترىنىڭ «ساقتاردان قازاقتارعا دەيىن» اتتى تاريحي شوۋ بار. 

9 قازان كۇنى "اق شاتىر" ساحنالىق الاڭىندا «ماڭگىلىك سارىن» - مەملەكەتتىك اكادەميالىق سيمفونيالىق وركەسترى، «عاسىرلار سازى» فولكلورلىق-ەتنوگرافيالىق ءانسامبلى، «تۇران» ەتنو-فولكلورلىق ءانسامبلى، «قوڭىر» ەتنو توبى ءوز باعدارلامالارىن ۇسىنادى. «بەركىنىپ ساداق اسىنعان» ەپوسىنىڭ ەپيكالىق اندەرى، «جەتىسۋ اندەرى» جەتىسۋ ءان مەكتەبى مەن ارقانىڭ «ارقا اندەرى» ءان مەكتەبىنىڭ اندەرى شىرقالادى.

«8 قازاندا تۇڭعىش پرەزيدەنت ساياباعىندا قىتايلىق سيان قالاسىنان ۇلى جىبەك جولى باعدارىمەن كەلگەن كەرۋەن ەكسپەديسياسىنىڭ قاتىسۋشىلارىن قارسى الادى»، - دەپ اتاپ ءوتتى ە.ءمانجۋوۆ.

بۇدان باسقا، «قازاق حاندىعى» ەسكەرتكىشىن سالتاناتتى تۇردە اشۋ ءراسىمى ءوتىپ، الماتى قالاسى، قىزىلوردا، وڭتۇستىك قازاقستان جانە الماتى وبلىستارى ونەرپازدارىنىڭ مەرەكەلىك كونسەرتتىك باعدارلامالارى باستالادى. سونداي-اق بۇل كۇنى «كونە تاراز» مۇراجايى اشىلىپ، قازاق حاندىعىنىڭ 550 جىلدىعىنىڭ قۇرمەتىنە شىعارىلعان كىتاپتاردىڭ تۇساۋكەسەرى وتەدى. «بالاساعۇن» وكز-دا وتەتىن «ماڭگىلىك ەل» جالپىۇلتتىق يدەياسىنا ارنالعان اقىندار ايتىسى ەكى كۇنگە جالعاسادى. وندا قازاقستان، موڭعوليا، جۇڭگو جانە وزبەكستاننان 14 جۇپ اقىن كەزدەسىپ، ونەرىن كورسەتەدى.

تەاتر ونەرىن سۇيۋشىلەر الماتىنىڭ م.اۋەزوۆ اتىنداعى تەاترىنىڭ، سونداي-اق جەرگىلىكتى تەاتر ترۋپپاسىنىڭ تاريحي سپەكتاكلدەرىن تاماشالاي الادى.

تاراز يپپودرومىندا قازاقستاندا العاش رەت ات پولوسى ويىنىنىڭ تانىستىرىلىمى جوسپارلانعان. بۇدان باسقا، «اتشابار» ات سپورتى كەشەنىندە «ۇلى دالا ويىندارى» اتتى ۇلتتىق ات سپورتى جارىستارى وتەدى.

مەرەيتويلىق سالتاناتتار اياسىندا 9 قازان كۇنى «تاراز-ارەنا» سپورت سارايىندا ق ر پرەزيدەنتىنىڭ جۇلدەسى ويناتىلاتىن قازاق كۇرەسىنەن "ەۋرازيا بارىسى" حالىقارالىق جارىسى وتەدى.

مەرەيتويلىق شارالار كوركەم تەاترلاندىرىلعان قويىلىممەن جانە ورتالىق ستاديونداعى مەرەكەلىك گالا-كونسەرتپەن اياقتالادى.

ەسكە سالا كەتەيىك، قازاق حاندىعىنىڭ 550 جىلدىعىن مەرەكەلەۋ بيىلعى جىلى ەلىمىزدىڭ بارلىق ايماقتارىندا ءوتىپ جاتىر. نەگىزگى شارالار 550 جىل بۇرىن تالاس پەن شۋ وزەندەرىنىڭ اراسىنداعى جايسان شاتقالىندا كەرەي مەن جانىبەك سۇلتاندار قازاق حاندىعىنىڭ نەگىزىن قالاعان جەردە بولادى. 

دەرەككوز: قازاقپارات