الماتى. قازاقپارات - بۇگىن الماتىدا رەيتينگتىك داۋىس بەرۋ ءادىسى ارقىلى جىل سايىن وتكىزىلەتىن «التىن جۇرەك» رەسپۋبليكالىق سىيلىعى ۇمىتكەرلەرىنىڭ ەسىمدەرى بەلگىلى بولدى.
بيىلعى جىلى «التىن جۇرەك» سىيلىعىنا بارلىعى 150 ءوتىنىم بەرىلگەن. بۇل - رەكوردتىق كورسەتكىش. سولاردىڭ ىشىندە 80 ءوتىنىم جەكە تۇلعالاردان كەلىپ تۇسكەن. ساراپتامالىق كەڭەس وتىرىسىندا وتىنىمدەردىڭ ىشىنەن ازىرگە ءار اتالىمعا ءۇش ۇمىتكەردەن تاڭداپ الىندى. ال ەندى قوعامدىق كەڭەس مۇشەلەرى جاسىرىن داۋىس بەرۋ ارقىلى سولاردىڭ ىشىنەن جەڭىمپازداردى انىقتايدى.

قوعامدىق كەڭەستىڭ قۇرامىنا قوعام جانە مادەنيەت قايراتكەرلەرى، اقىن-جازۋشىلار، كينەماتوگرافيستەر، ب ا ق وكىلدەرى ەنگەن. ولاردىڭ ىشىندە تانىمال جازۋشى-دراماتۋرگ احمەتجان ءاشىروۆ، Vلاست ينتەرنەت-جۋرنالىنىڭ باس رەداكتورى ۆياچەسلاۆ ابراموۆ، كينورەجيسسەر سەرگەي ازيموۆ، تەلەجۇرگىزۋشى قىمبات حانگەلدينا بار.

«التىن جۇرەك» سىيلىعىنا قازىلىق ەتۋ وتە قيىن. ۇسىنىلعان تۇلعالاردىڭ بارلىعى دا قۇرمەتكە لايىق، جۇرەگى التىن ادامدار عوي. بارلىعىن دا ماراپاتتاعىڭ كەلەدى. ءبىراق، وكىنىشكە قاراي، ءاربىر اتالىمدا ءبىر عانا جەڭىمپاز بولۋى شارت. مەن ءوز باسىم قايىرىمدىلىقپەن اينالىساتىن ادامداردىڭ الدىندا باسىمدى يەمىن. ولار قوعام تاراپىنان ۇلكەن قۇرمەتكە لايىق ازاماتتار. وسى سىيلىقتى ۇيىمداستىرۋشىلار تاراپىنان قىرۋار جۇمىستار اتقارىلىپ جاتىر. سوندىقتان، قوعام تاراپىنان بۇل شاراعا ۇلكەن قولداۋ قاجەت»، - دەدى قىمبات حانگەلدينا.

«التىن جۇرەك» بويىنشا 11 اتالىم بەلگىلەنگەن. ولار: «جەتىم بالالارعا كورسەتكەن قامقورلىعى ءۇشىن»، «ءبىلىمدى دامىتۋعا قوسقان ۇلەسى ءۇشىن»، «مۇگەدەك جاندارعا كورسەتكەن قامقورلىعى ءۇشىن»، «سپورتتى دامىتىپ، ونى قولداعانى ءۇشىن»، «ارداگەرلەرگە كورسەتكەن قۇرمەتى ءۇشىن»، «جىل مەسەناتى»، «اقپاراتتىق قولداۋشى»، «جىلدىڭ قايىرىمدى ادامى»،  «جىل ۇيىمى»،  «دەنساۋلىق ساقتاۋ سالاسىنا قولداۋ كورسەتكەنى ءۇشىن» جانە «قازاقستاننىڭ وركەندەۋىنە قوسقان ۇلەسى ءۇشىن» اتالىمدارى.

ۇيىمداستىرۋشىلاردىڭ مالىمدەۋىنشە، 2015 جىلى كەلىپ تۇسكەن وتىنىمدەرگە سايكەس،  رەسپۋبليكامىزدا بيىل 12 ميلليارد تەڭگەگە قايىرىمدىلىق شارالار جاسالعان.

اتالىمدار بويىنشا جەڭىمپازداردى سالتاناتتى تۇردە ماراپاتتاۋ ءراسىمى 2015 جىلعى 27 قازاندا كەشكى ساعات 18-00-دە اباي اتىنداعى قازاق مەملەكەتتىك وپەرا جانە بالەت تەاترىندا بولادى.

دەرەككوز: قازاقپارات