تاراز. قازاقپارات - جامبىل وبلىسىنىڭ قىلمىستىق ىستەر بويىنشا مامانداندىرىلعان اۋدانارالىق سوتىندا 4 جاسار بالانى زورلاپ، ولتىرگەنى ءۇشىن ايىپتالعان ت.ىزباقييەۆكە قاتىستى قىلمىستىق ءىستى قاراۋ اياقتالىپ، سوت ۇكىمى شىقتى. بۇل تۋرالى وبلىستىق پروكۋراتۋرانىڭ باسپا ءسوز قىزمەتىنەن حابارلادى.
«الماتى وبلىسىنىڭ تۋماسى، مەركى اۋدانىنداعى اقەرمەن اۋىلىندا تۇرعان قىرعىزستان رەسپۋبليكاسىنىڭ 55 جاستاعى ازاماتى تۇرسىنجان ىزباقييەۆ بالاعا قارسى اسا اۋىر قىلمىس جاساعان: 2015 جىلدىڭ 16 مامىرىندا كۇندىز ىزباقييەۆ ت. بالالاردىڭ ويىن الاڭىندا جالعىز ءوزى ويناپ جۇرگەن، كورشى تۇراتىن 4 جاسار و.ەسىمدى بالانىڭ قاسىنا بارىپ، ونىڭ السىزدىگى مەن قاسىندا ەشكىمنىڭ جوق ەكەنىن پايدالانىپ، قولىمەن بالانىڭ بەتىنەن ءبىر سوعىپ، ەسىنەن تاندىرعان. ودان كەيىن بالانى ءوز ۇيىنە اكەلىپ، بۇلدىرشىنگە قاتىستى سەكسۋالدىق سيپاتتاعى زورلاۋ ارەكەتتەرىن جاساعان»، - دەلىنگەن قاداعالاۋ ورگانى باسپا ءسوز قىزمەتىنىڭ رەسمي حابارلاماسىندا.

«ودان كەيىن ىزباقييەۆ ت. قىلمىسىن جاسىرۋ ماقساتىمەن كىشكەنتاي و-نى ءولتىرۋدى شەشكەن. سول ءۇشىن وڭ جاق قولىمەن بالانىڭ تىنىس الۋ جولدارىن جاۋىپ، تۇنشىقتىرىپ ءولتىردى. جاساعان قىلمىسىن تۇسىنگەن ىزباقييەۆ كىشكەنتاي بالانىڭ دەنەسىن اۋلاسىندا تۇرعان جۇمىس ىستەمەيتىن توڭازىتقىشقا جاسىرعان. بالانىڭ مۇردەسى ءبىر ايدان سوڭ تابىلدى»، - دەپ حابارلايدى وبلىستىق پروكۋراتۋرانىڭ باسپا ءسوز قىزمەتىنەن.

قىلمىستىڭ قوعامدا ۇلكەن شۋ شىعارعانىنا بايلانىستى ىزباقييەۆقا قاتىستى قىلمىستىق ءىستى جامبىل وبلىسىنىڭ پروكۋراتۋراسى تەرگەدى.

مەملەكەتتىك ايىپتاۋشىنىڭ ۇسىنىسى قولدانىپ، ىزباقييەۆ ق ر قك-نىڭ 121-بابىنىڭ 4ء-بولىمى (كامەلەتتىك جاسقا جەتپەگەنگە قاتىستى سەكسۋالدىق سيپاتتاعى زورلاۋ ارەكەتتەرىن جاساۋ)، 99-باپتىڭ 2ء-بولىمى (قىلمىستى جاسىرۋ ءۇشىن، ءالسىز جاعدايدا بولعان ادامدى ءولتىرۋ) بويىنشا جامبىل وبلىستىق قىلمىستىق ىستەر بويىنشا مامانداندىرىلعان اۋدانارالىق سوتىنىڭ ۇكىمىمەن تولىقتاي ايىپتى دەپ تانىلىپ، ءومىر بويى باس بوستاندىعىنان ايىرۋ جازاسىنا كەسىلدى.

پروسەسس جابىق سوت وتىرىسىندا ءوتتى. 

دەرەككوز: قازاقپارات