تاراز. قازاقپارات - بۇگىن تارازدا شەنسي پروۆينسياسىنىڭ سيانيان قالاسى (جۇڭگو حالىق رەسپۋبليكاسى) مەن جامبىل وبلىسىنىڭ تاراز قالاسى (قازاقستان رەسپۋبليكاسى) اراسىندا دوستىق قاتىناس ورناتۋ تۋرالى حاتتاماعا قول قويىلدى.
«اتلەتيك» ورتالىعىندا كەلىسسوزدەر ۇستەلىنىڭ باسىندا قىتايلىق كومپانيالار مەن جامبىل ءوڭىرىنىڭ باسقارۋ قۇرىلىمدارىنىڭ وكىلدەرى جينالدى. ولاردىڭ اراسىندا قكپ كوميتەتىنىڭ سيانيان قالاسىنداعى حاتشىسى ۆەي سي تين مىرزا مەن «ي-زە فۋسا» شاي كومپانياسىنىڭ پرەزيدەنتى ما حىن گون مىرزا بولدى.

قازاقستاندىق جانە قىتايلىق تاراپتار ايماقتار اراسىنداعى ىنتىماقتاستىقتىڭ مۇمكىندىكتەرى مەن بولاشاعىن ەگجەي-تەگجەيلى تالقىلاپ شىقتى. ءوزارا ءتيىمدى ىنتىماقتاستىقتىڭ باسىمدىق سالالارى رەتىندە اۋىل شارۋاشىلىعى، ساۋدا، قۇرىلىس سالاسى اتالعان.

ەسكە سالا كەتەيىك، ن.نازاربايەۆتىڭ ۇسىنعان «نۇرلى جول» باعدارلاماسىنىڭ اياسىندا قازاقستان دۇنگەندەرى قاۋىمداستىعى مەن «ي-زە فۋسا» كومپانياسى قايتا جانداندىرىلعان ۇلى جىبەك جولىنىڭ ەكونوميكالىق بەلدەۋىن قۇرۋ يدەياسىن قولداۋ ماقساتىندا «قىتاي-قازاقستان: ۇلى جىبەك جولىنىڭ شاي مادەنيەتى» دوستىق پەن ىنتىماقتاستىق كەرۋەنىن ۇيىمداستىردى. كەشە تارازدا قىتايدان ءبىر جىلدان استام ۋاقىت بويى ۇلى جىبەك جولى باعدارىمەن جۇرگەن جاياۋ كەرۋەن ەكسپەديسياسىن سالتاناتتى تۇردە قارسى الۋ شاراسى ءوتتى. كەرۋەن «ي-زە فۋسا» كومپانياسىنىڭ شەنسي پروۆينسياسىندا ءوسىرىپ جۇرگەن فۋسا اتتى باعالى ەمدىك شايىن جەتكىزدى.

سيانيان - اۋىلشارۋاشىلىق اۋدانىنىڭ ماڭىزدى ساۋدا ورتالىعى.

شەنسي پروۆينسياسىنىڭ سيان قالاسىنان 25 شاقىرىم جەردە ورنالاسقان سيانيان قالالىق وكرۋگىنە 3 اۋدان، 1 قالالىق ۋەز، 10 ۋەز كىرەدى. تۇرعىندار سانى - 5 ملن. استام ادام. ءسيانياننىڭ كولىك تورابى، اۋەجايى، دامىعان ماشينا جاساۋ، سونداي-اق توقىما، تىگىن، فارماسيەۆتيكالىق، تاماق ونەركاسىبى بار. مۇندا ەلەكترونيكا جانە قۇرىلىس ماتەريالدارى شىعارىلىپ، ءداستۇرلى قولونەر گۇلدەنىپ وتىر. 

دەرەككوز: قازاقپارات