الماتى. قازاقپارات - قازاقستاندا 2017 جىلعا قاراي بەنزين تاپشىلىعى جويىلادى. بۇل تۋرالى بۇگىن الماتىدا حالىقارالىق KIOGE-2015 «مۇناي جانە گاز» كونفەرەنسياسى بارىسىندا جۋرناليستەرگە بەرگەن سۇحباتىندا ق ر ەنەرگەتيكا ۆيسە-مينيسترى ماعزۇم مىرزاعالييەۆ ءمالىم ەتتى.
«قازىرگى تاڭدا اتىراۋ، پاۆلودار جانە شىمكەنت قالالارىنداعى مۇناي وڭدەۋ زاۋىتتارىندا كۇردەلى جاڭعىرتۋ جۇمىستارى جۇرگىزىلىپ جاتىر. ول 2016 جىلدىڭ سوڭىنا دەيىن جالعاسادى. كەيىن ول زاۋىتتار تولىعىمەن ىسكە قوسىلعان سوڭ، 2017 جىلدىڭ باسىنا قاراي ەلىمىزدە بەنزين تاپشىلىعىن تولىعىمەن جويامىز دەگەن سەنىمدەمىز. ءقازىر، وسى باعىتتا جان-جاقتى جۇمىستار جۇرگىزىپ جاتىرمىز. ال جانار-جاعار ماي باعاسىنىڭ قىمباتتاۋىنا ءدال ءقازىر ەشقانداي نەگىز جوق»، - دەدى م. مىرزاعالييەۆ.

سونىمەن قاتار، ق ر ەنەرگەتيكا ۆيسە-مينيسترى 2017  جىلعا قاراي قازاقستاندا وندىرىلەتىن مۇناي شيكىزاتىنىڭ كولەمى دە ارتاتىندىعىن جەتكىزدى.

«2014 جىلى قازاقستاندا 81 ملن. تونناداي مۇناي وندىرىلگەن بولاتىن. سودان، مۇناي باعاسىنىڭ ارزانداپ كەتۋىنە بايلانىستى بيىل 79،5 ملن. تونناداي مۇناي وندىرىلەدى دەپ وتىرمىز. ويتكەنى، ەكسپورتتىق كىرىستەر ازايىپ جاتىر. 2016 جىلى بولجام بويىنشا 77 ملن. توننا مۇناي وندىرىلەدى. ال 2017 جىلدان باستاپ، كەرىسىنشە مۇناي ءوندىرۋ كولەمى وسەدى. 2020 جىلعا قاراي جىلىنا 92 ملن. توننا مۇناي وندىرەمىز دەپ بولجام جاساپ وتىرمىز. ونىڭ ۇستىنە 2017 جىلدان باستاپ، «قاشاعان» كەن ورنىندا مۇناي وندىرىلە باستايدى دەگەن بولجام بار. بۇعان دەيىن مۇناي باعاسى دا ءوسۋى مۇمكىن»، - دەدى م. مىرزاعالييەۆ.

ايتا كەتەلىك، «ينتەركونتينەنتال» قوناق ۇيىندە ءوتىپ جاتقان كونفەرەنسيا جۇمىسىنا ق ر ەنەرگەتيكا  مينيسترلىگى جانە ينۆەستيسيالار جانە دامۋ مينيسترلىكتەرىنىڭ وكىلدەرى، مۇناي جانە گاز سالاسىندا قىزمەت اتقاراتىن وتاندىق جانە شەتەلدىك ءىرى كومپانيالاردىڭ باسشىلارى، عىلىمي-زەرتتەۋ ينستيتۋتتارىنىڭ عالىمدارى قاتىسۋدا.

كونفەرەنسيا جۇمىسى ودان ءارى جالعاسۋدا. ول ەكى كۇنگە سوزىلادى. 

دەرككوز. قازاقپارات