الماتى. قازاقپارات - الماتىدا دوستىق ۇيىندە قازاق حاندىعىنىڭ 550 جىلدىعىنا ارنالعان «جىبەك جولىنداعى سۇحبات» - «ورتالىق ازيا: وڭىردەگى حالىقتاردىڭ ىنتىماقتاستىعى» ەكسپەديسيا مۇشەلەرى ءوز اسەرلەرىمەن ءبولىستى.
«ەكسپەديسيانىڭ باستى ماقساتى - ۇلى جىبەك جولى بويىنداعى، سوناۋ قىتايدان باستاپ باتىس ەۋروپاعا دەيىنگى حالىقتاردىڭ بىرلىگىن سەزىنۋ. نەگىزگى اڭگىمە اۋانى ورتالىق ازيا توڭىرەگىندە بولدى. ايماق حالقىنا ورتاق دۇنيەلەر وتە كوپ. ورتالىق ازيانىڭ يران، جۇڭگو، ءۇندىستان مەملەكەتتەرىن دامىتۋدا ءرولى زور بولدى. بۇگىندە 550 جىلدىعىن تويلاپ جاتقان قازاقستان دا وسى ۇلكەن تىزبەكتىڭ ماڭىزدى مۇشەسى. مۇندا ورتاق اقپاراتتىق ماسەلەسى وتە ماڭىزدى. ورتالىق ازيا ەكونوميكامىزدى، ساياساتىمىزدى، مادەنيەتىمىزدى بىرىكتىرەتىن ورتاق اقپاراتتىق كەڭىستىككە يە. زيالى قاۋىم وكىلدەرىنىڭ شىعارعان دەكلاراسياسى ەشقاشان بيلىك نازارىنان تىس قالعان ەمەس. ءبىزدىڭ باستامالارىمىز مەملەكەت ساياساتىنىڭ نەگىزىنە اينالۋى ىقتيمال»، - دەدى قوعام قايراتكەرى سەيداحمەت قۇتتىقادام.

ەكسپەديسيا مۇشەلەرى ءوز ساپارلارىن اقسۋ-جاباعىلى قورىعىنان باستاپ ىستىقكولدە، قاپشاعايدا، الماتى وبلىسىندا بولىپ، قىتايعا دا ساپارلاپ قايتقان.

بۇگىن جوبا مۇشەلەرى تاراز قالاسىندا وتكەلى وتىرعان قازاق حاندىعىنىڭ 550 جىلدىعىنىڭ نەگىزگى ءىس-شارالارىنا قاتىسۋعا اتتانىپ كەتتى.

تاراز قالاسىندا «جىبەك جولىنداعى سۇحبات» جوباسىنىڭ اياسىندا «ورتالىق ازيا: وڭىردەگى حالىقتاردىڭ ىنتىماقتاستىعى»  تاقىرىبىندا مۇحامەد حايدار دۋلاتي اتىنداعى تارمۋ-دا دوڭگەلەك ۇستەل وتەدى.

ايتا كەتۋ كەرەك، «جىبەك جولىنداعى سۇحبات» - بۇل مادەنيەتارالىق ديالوگ تۇرعىسىنداعى جالپى مادەني جانە جالپى تاريحي قۇندىلىقتاردى ودان ءارى دامىتۋعا ءارى ساقتاۋعا ىقپال ەتىپ، كورشى ەلدەردىڭ ساراپشىلارىمەن ىنتىماقتاستىقتى نىعايتاتىن قازاقستان حالقى اسسامبلەياسىنىڭ باستاماسىمەن وتكىزىلەتىن حالىقارالىق جوبا.

بۇل جوبا بەلگىلى قوعام قايراتكەرى، مادەنيەتتانۋشى مۇرات اۋەزوۆ باستاماسىمەن جۇزەگە اسىرىلىپ كەلەدى. جوباعا قازاقستان، قىرعىزستان، تاجىكستان، تۇركىمەنستان جانە وزبەكستان  زيالى شىعارماشىلىق قاۋىم وكىلدەرى قاتىسۋدا.

2007 جىلدان باستاپ جوبا قازاقستان حالقى اسسامبلەياسى، مادەنيەت جانە اقپارات مينيسترلىگى، «قحا الەۋمەتتىك كونسورسيۋمى» قق مەن قحا ەتنومادەني ورتالىقتارى قولداۋىمەن جۇزەگە اسىپ كەلەدى.

2014 جىلدان باستاپ ۇيىمداستىرۋشىلاردىڭ سانى ل.ن.گۋميليەۆ اتىنداعى ەۋرازيا ۋنيۆەرسيتەتىنىڭ يۋنەسكو كافەدراسىمەن تولىقتىرىلىپ، يۋنەسكو-نىڭ ۇلتتىق كوميسسيالارىنىڭ قولداۋىنا يە بولدى.

دەرەككوز: قازاقپارات