قازاقستان رەسپۋبليكاسى قارجى مينيسترلىگى 2025 جىلعى 1 قىركۇيەك جاعدايىنداعى رەسپۋبليكالىق بيۋدجەتتەن وڭىرلەرگە باعىتتالعان نىسانالى ترانسفەرتتەردىڭ يگەرىلۋ دەڭگەيى تۋرالى اقپارات جاريالادى. 

نىسانالى ترانسفەرت – رەسپۋبليكالىق بيۋدجەتتەن جەرگىلىكتى بيۋدجەتكە ناقتى ءبىر ماقساتتى جۇزەگە اسىرۋ ءۇشىن بەرىلەتىن قاراجات. نىسانالى ترانسفەرت كولەمى جىل سايىن الداعى ءۇشجىلدىق بيۋدجەتتىك كەزەڭدى قامتيتىن «رەسپۋبليكالىق بيۋدجەت تۋرالى» زاڭىمەن بەكىتىلەدى.

2025 جىلدىڭ 1 قىركۇيەگىندەگى جاعداي بويىنشا رەسپۋبليكالىق بيۋدجەتتەن ايماقتارعا جالپى قۇنى 1،056 ترلن تەڭگەنى قۇرايتىن نىسانالى ترانسفەرت جىبەرىلگەن. ونىڭ يگەرىلۋ كولەمى 99،7 پايىزدى قۇرايدى (1،053 ترلن تەڭگە).

نىسانالى ترانسفەرت باعىتتارى بويىنشا باعدارلامالىق دامۋدى (666،7 ملرد تەڭگە)، اعىمداعى باعدارلامالاردى ىسكە اسىرۋدى (351،1 ملرد تەڭگە) جانە نەسيەلەۋدى (59 ملرد تەڭگە) كوزدەيدى.

ەندى وسى 1 ترلن تەڭگەدەن استام قاراجاتتىڭ 40 پايىز كولەمىن تەك استانا قالاسى، الماتى جانە تۇركىستان وبلىستارى الىپ وتىر. مىسالى، ايماقتىق ءبولىنىس كەستەسىنە نازار اۋدارساق، جاڭادان قۇرىلعان اباي وبلىسى (27 ملرد تەڭگە) مەن ۇلىتاۋ وبلىسى (7 ملرد تەڭگە) عانا الىپتى نىسانالى ترانسفەرت ارقىلى. ال ءوزىن-وزى قامتاماسىز ەتەتىن الماتى (68 ملرد تەڭگە) جانە شىمكەنت (51 ملرد تەڭگە) كەستەنىڭ ورتا تۇسىنا ورىن تەپكەن.

ارينە، ساۋاتتى ادام رەتىندە ءبىز كوش باستاپ تۇرعان ايماقتاردا دامۋدىڭ وڭ ديناميكاسى تۇراقتى قالىپتاسىپ وتىرعانىن جانە سول دامۋ قارقىنىن قولداۋ قاجەت ەكەنىن تۇسىنەمىز. الايدا، جاڭادان قۇرىلعان ايماقتاردا باعدارلامالاردىڭ جۇزەگە اسۋىن رەسپۋبليكالىق بيۋدجەتتەن قولداۋ قاجەتتىلىگى دە كۇيىپ تۇرعانى بەلگىلى عوي. استانا قالاسىنا تالاس بولمايدى: حالىق سانى جوعارى قارقىنمەن ءوسىپ كەلە جاتقان ەلوردانى تۇراقتى دامىتۋ – ستراتەگيالىق ماڭىزى بار جۇمىس.

نەمەسە ەكىنشى سۇراق تۋادى: جەرگىلىكتى اتقارۋشى ورگانداردان ءتيىستى ۇسىنىستار از بولىپ وتىر ما؟ ولاي بولاتىن بولسا، بۇل – ءوڭىر اكىمدەرىنىڭ تىكەلەي ەڭبەك كورسەتكىشىنىڭ ءبىرى. رەسپۋبليكالىق بيۋدجەتتەن بولىنەتىن نىسانالى ترانسفەرتتىڭ نىساناسىنداعى تەڭگەرىم جاعدايىن دا ويلاۋ كەرەك.