الماتى. قازاقپارات - الماتىدا شەنەۋنىكتەر حقكو شتاتىن كەڭەيتۋ تۋرالى باستاما كوتەردى. مۇنداي وي بۇگىن قالالىق ق ر مەملەكەتتىك قىزمەت جانە سىبايلاس جەمقورلىققا قارسى كۇرەس دەپارتامەنتى جانىنداعى تارتىپتىك كەڭەستە ايتىلدى.
مامانداردىڭ ايتۋىنشا، قالا اۋماعىنىڭ ەكى ەسە ۇلعايىپ، حالىق سانىنىڭ ارتۋىنا بايلانىستى قالالىق حالىققا قىزمەت كورسەتۋ ورتالىقتارىندا، مەملەكەتتىك ورگانداردا اتقاراتىن جۇمىس كولەمى ەكى ەسە ۇلعايعان. ال، حقكو-لاردىڭ شتاتتىق كولەمى ءالى كەڭەيتىلمەگەن. 

«شىنىمەن دە مەملەكەتتىك ورگاندارعا جۇكتەمە ۇلعايدى. بۇل ماسەلە وتە وزەكتى. وسى جايىندا قالالىق اكىمدىك اپپاراتىنىڭ باسشىسىنا حات جازىپ، قاجەتتى تالداۋ جۇمىستارىن جۇرگىزۋ تۋرالى ۇسىنىس جازامىز. مەملەكەتتىك ىستەر جونىندەگى اگەنتتىككە دە حات جىبەرەمىز»، - دەدى سىبايلاس جەمقورلىققا قارسى كۇرەس جانە مەملەكەتتىك قىزمەت ساپاسىن باقىلاۋ قوعامدىق كەڭەسىنىڭ ءتوراعاسى ستانيسلاۆ كانكۋروۆ. 

الماتى قالالىق اكىمدىگى اپپاراتىنىڭ مەملەكەتتىك قىزمەتتى قاداعالاۋ ءبولىمىنىڭ جەتەكشىسى مەيرام سۇيىندىكوۆتىڭ ايتۋىنشا، الماتىدا 80 مەملەكەتتىك ورگان جۇمىس جاسايدى. 

«2015 جىلى اتالعان ورگاندار 7 155 020 قىزمەت كورسەتكەن. ونىڭ ىشىندە 155 158 قىزمەت حقكو ارقىلى كورسەتىلدى. بۇل كورسەتكىش بىلتىرعىمەن سالىستىرعاندا ەكى ەسە ارتىق. ءبىلىم بەرۋ، دەنساۋلىق ساقتاۋ، الەۋمەتتىك قورعاۋ سالاسىندا قىزمەت تۇرلەرى حالىق اراسىندا ەڭ كوپ سۇرانىسقا يە»، - دەدى مەيرام سۇيىندىكوۆ.

ونىڭ ايتۋىنشا، 2015 جىلدىڭ 8 ايى ىشىندە جۇرگىزىلگەن مونيتورينگ بويىنشا كورسەتىلەتىن قىزمەتتى كەشىكتىرۋدىڭ 87 دەرەگى انىقتالدى. وسىعان سايكەس 26 تۇلعا تارتىپتىك جازاعا تارتىلدى. 10 ەسكەرتۋ جاسالىپ، 15 سوگىس جاريالاندى.

دەرەكككوز: قازاقپارات