استانا. قازاقپارات - قاراعاندى وبلىس اكىمى، وبلىستىق «نۇر وتان» پارتياسىنىڭ ءتوراعاسى نۇرمۇحامبەت ابدىبەكوۆتىڭ توراعالىعىمەن جەمقورلىقپەن كۇرەس جونىندەگى ايماقتىق كوميسسيانىڭ كەزەكتى وتىرىسى ءوتتى، دەپ حابارلادى «نۇر وتان» پارتياسىنىڭ باسپا ءسوز قىزمەتىنەن. 
وتىرىسقا «نۇر وتان» پارتياسى قاراعاندى وبلىستىق فيليالى جانىنداعى، سونىمەن قاتار، قازاقستان رەس¬پۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنە قاراستى قوعامدىق كەڭەستەردىڭ مۇشەلەرى شاقىرىلدى.

جوعارىدا اتالعان كەڭەستىڭ جانە قاراعاندى ەكونوميكالىق ۋنيۆەرسيتەتىنىڭ باستاماسىمەن جەمقورلىق بارىنشا بەلەڭ العان مەملەكەتتىك ورگانداردى انىقتاۋ ماقساتىندا ايماق تۇرعاندارى اراسىندا الەۋمەتتىك ساۋالناما جۇرگىزىلگەن. ساۋالناما قورىتىندىسى تۋرالى ەكونوميكالىق جانە قۇقىقتىق زەرتتەۋلەر عىلىمي-زەرتتەۋ ينستيتۋتىنىڭ ديرەكتورى تالعات حانوۆ قىسقاشا بايانداما جاسادى. 
سوندا-اق، كۇن تارتىبىندە ەكى ماسەلە قارالدى. العاشقىسى، ق ر 2015-2025 جىلدارعا ارنالعان سىبايلاس جەمقورلىققا قارسى ستراتەگياسىن جانە كولەڭكەلى ەكونوميكامەن كۇرەس شارالارىن جۇزەگە اسىرۋ بويىنشا قاراعاندى وبلىسىنداعى 2015-2017 جىلدارعا ارنالعان ىس-شارالارمەن تانىسۋ. ەكىنشى ماسەلە، «نۇر وتان» پارتياسىنىڭ 2015-2025 جىلدارعا ارنالعان سىبايلاس جەمقورلىققا قارسى باعدارلاماسىنىڭ جۇزەگە اسۋ بارىسى.

وتىرىس سوڭىندا نۇرمۇحامبەت ابدىبەكوۆ سىبايلاس جەمقورلىقپەن ىمىراسىز كۇرەستى بەلسەندى ەتۋدى تاپسىرىپ، بارلىق قالا جانە اۋدان اكىمدەرىنە، وبلىستىق باسقارما باسشىلارىنا جەمقورلىق زاڭ بۇزۋشىلىق جانە قىلمىس جاسالعان جاعدايدا دەربەس جاۋاپكەرشىلىككە تارتىلاتىندارى تۋرالى قاتاڭ ەسكەرتۋ جاسادى.

دەرەككوز: قازاقپارات