الماتى. قازاقپارات - بۇگىن الماتىدا «اقتاۋ دەكلاراسياسى: سينەرگيا جانە وقشاۋلاۋ» اتتى حالىقارالىق فورۋم ءوتتى. وعان ماشينا جاساۋ جانە ينجينيرينگ سالاسىندا قىزمەت اتقاراتىن 70 قازاقستاندىق كاسىپورىن مەن 30 شەتەلدىك وندىرۋشىلەر، سونداي-اق، ق ر ەنەرگەتيكا مينيسترلىگى مەن ينۆەستيسيا جانە دامۋ مينيسترلىگىنىڭ وكىلدەرى قاتىستى. 
«قازاقستاندىق كاسىپورىنداردى مۇناي جانە گاز سالاسىنا تارتۋ جانە قازاقستاندىق ۇلەستى ارتتىرۋ ارقىلى وتاندىق يندۋستريانى دامىتۋ - ەلىمىزدىڭ باسىمدى مىندەتتەرىنىڭ ءبىرى. بۇل فورۋمنىڭ باستى ماقساتى - قازاقستاندىق كاسىپورىنداردى وسى سالاداعى ىرىكتەۋ جانە تەندەر جۇيەسىمەن تانىستىرۋ. بۇلار قازىرگى تاڭدا ءار ءتۇرلى كورپوراتيۆتىك راسىمدەرگە نەگىزدەلگەن. ال بۇل وتاندىق وندىرۋشىلەر ءۇشىن كوپتەگەن قيىندىقتار تۋدىرادى. وسى ماسەلەنى شەشۋ قاجەت»، - دەدى «KAZENERGY» قازاقستاندىق مۇناي-گاز جانە ەنەرگەتيكا كەشەنى ۇيىمدارىنىڭ قاۋىمداستىعى» زتب باس ديرەكتورى اسەت ماعاۋوۆ.

ول سونىمەن قاتار ءوز سوزىندە وسىدان ءۇش جىل بۇرىن قول قويىلعان اقتاۋ دەكلاراسياسى اياسىندا ءىرى وپەراتورلار، ينۆەستورلار مەن مەملەكەتتىك مەكەمەلەر ءوز مويىندارىنا ءوزارا تاجىريبە جانە ماعلۇماتتار الماسۋ،  تۇراقتى وقشاۋلاۋ ۇدەرىسى مەن جەرگىلىكتى مازمۇندى ارتتىرۋ ستراتەگياسىن قالىپتاستىرۋ مىندەتىن العاندىعىن ايتتى.

«ۇستىمىزدەگى جىلدىڭ ءبىرىنشى قىركۇيەگىنە قاراي قازاقستاندىق وندىرۋشىلەردىڭ تاۋارلارى مەن كورسەتەتىن قىزمەتتەرىن ساتىپ الۋ تۋرالى كەلىسىمشارتتاردىڭ جالپى سوماسى ءبىر تريلليون تەڭگەدەن اسىپ كەتتى. جىل سوڭىنا قاراي بۇل سومانىڭ كولەمى ارتا تۇسەتىن بولادى»، - دەدى «قازمۇنايگاز» ۇك» اق بيزنەستى قولداۋ بويىنشا باسقارۋشى ديرەكتورى سەرىك كەۋلىمجايەۆ.

ونىڭ ايتۋىنشا، وتاندىق وندىرۋشىلەرمەن ۇزاق مەرزىمدى كەلىسىمشارتتار جاساسۋ - دسۇ شەڭبەرىندە باسەكەلەستىكتى بولدىرماۋعا جانە ولارعا ءوز قىزمەتتەرىن جوسپارلاۋعا، ءوندىرىستى جاڭارتۋعا مۇمكىندىك بەرەدى.

«1993 جىلدان بەرى «تەڭىزشيەۆرويل» كومپانياسى كۇنى بۇگىنگە دەيىن 19،1 ملرد. دوللارعا قازاقستاندىق تاۋارلار مەن كورسەتىلەتىن قىزمەتتەردى ساتىپ العان. 2013 جىلدىڭ سوڭىندا ءبىز ق ر ۇكىمەتىمەن ءوزارا تۇسىنىستىك، ينۆەستيسيانى ارتتىرۋ، ءبىلىم بەرۋ جانە جۇمىسپەن قامتۋ بويىنشا مەموراندۋمعا قول قويعانبىز. بولاشاقتا ءوندىرىستى كەڭەيتۋ جانە باسقارۋ جوبالارى اياسىندا بىزدە 20 مىڭعا جۋىق جاڭا جۇمىس ورىندارى اشىلاتىن بولادى»، - دەدى «تەڭىزشيەۆرويل» ج ش س باس ديرەكتورى توم ميللەر.

سونىمەن قاتار، فورۋم بارىسىندا «قاراشىعاناق»، «تەڭىز» جانە «قاشاعان» جوبالارى بويىنشا كادر، تاۋار ءوندىرۋ جانە قىزمەت كورسەتۋ ماسەلەلەرى تالقىلاندى. 

ودان باسقا، ەۋروپا قايتا قۇرۋ جانە دامۋ بانكى مەن ءبىرقاتار وتاندىق جانە شەت ەلدىك كومپانيالار اراسىندا ىنتىماقتاستىق تۋرالى مەموراندۋمعا قول قويىلدى. 

دەرەككوز: قازاقپارات