2025 جىلعى 9–11 قازان كۇندەرى ءۇندىستاننىڭ مۋمباي قالاسىندا وتكەن حالىقارالىق ازيا كوممۋنيكاسيا قاۋىمداستىعىنىڭ (AMIC) 31-كونفەرەنسياسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ PhD دوكتورى، دوسەنت قارلىعا مىسايەۆا AMIC Asia Communication Award 2025 ماراپاتىنا يە بولدى. بۇل ماراپاتقا ورتالىق ازيا وڭىرىنەن العاش رەت قازاقستاندىق عالىم يە بولىپ وتىر.

AMIC – كوممۋنيكاسيا جانە جۋرناليستيكا سالاسىنداعى ازياداعى ەڭ بەدەلدى عىلىمي ۇيىمداردىڭ ءبىرى. جىل سايىن ۇزدىك زەرتتەۋلەر مەن ايماقتاعى كوممۋنيكاسيا سالاسىنىڭ دامۋىنا قوسقان ۇلەسى ءۇشىن عالىمدار، ساراپشىلار جانە پراكتيك-ماماندار وسى ۇيىم تاراپىنان ماراپاتتالادى.

قارلىعا مىسايەۆا ءوز العىسىندا بۇل جەتىستىك تەك جەكە ماراپات ەمەس، قازاقستان مەن ورتالىق ازياداعى كوممۋنيكاسيا عىلىمىنىڭ حالىقارالىق دەڭگەيدە مويىندالۋى ەكەنىن اتاپ ءوتتى:

«بۇل قۇرمەتتى بارشا قولداۋ كورسەتكەن ارىپتەستەرىممەن جانە شاكىرتتەرىممەن بولىسەمىن. ايماقتان العاشقى لاۋرەات بولۋ – ۇلكەن جاۋاپكەرشىلىك ءارى جاڭا مۇمكىندىكتەردىڭ باستاۋى»، – دەدى ول.

كونفەرەنسياعا قازاقستان مەن وزبەكستان عالىمدارى ەكىنشى رەت قاتىسىپ وتىر. بۇل – ورتالىق ازيا مەن AMIC اراسىنداعى عىلىمي ىنتىماقتاستىقتىڭ كەڭەيىپ، وڭىرلىك كوممۋنيكاسيا زەرتتەۋلەرىنىڭ جاڭا دەڭگەيگە كوتەرىلىپ كەلە جاتقانىن كورسەتەدى.

سونىمەن قاتار، كونفەرەنسيا بارىسىندا قارلىعا مىسايەۆانىڭ دوكتورانتى دياس ازيمجانوۆ مازمۇندى بايانداما جاساپ، قازاقستاندىق جاس عالىمداردىڭ الەۋەتىن تانىتتى.

AMIC كونفەرەنسياسىن SNDT Women’s University ۇيىمداستىرىپ، شاراعا ازيانىڭ جەتەكشى ۋنيۆەرسيتەتتەرى مەن عىلىمي ورتالىقتارىنان زەرتتەۋشىلەر قاتىستى.

سوڭعى جىلدارى «قازاقستاندا عىلىم دامىماي جاتىر» دەگەن پىكىر ءجيى ايتىلادى. الايدا حالىقارالىق دەڭگەيدە مويىندالىپ جاتقان وسىنداي جەتىستىكتەر – وتاندىق عىلىمنىڭ الەۋەتى بار ەكەنىن، قازاقستاندىق زەرتتەۋشىلەردىڭ الەمدىك اكادەميالىق قاۋىمداستىقتا ءوز ورنى قالىپتاسىپ كەلە جاتقانىن ايقىن دالەلدەيدى.