ونەر – حالىق تاريحىنىڭ شەجىرەسى. ونەر ارقىلى ءومىردىڭ كەڭ تىنىسى، تىرشىلىك قۇبىلىستارى، ادامنىڭ ءارتۇرلى سەزىمى بەينەلەنەدى.
قازاق حالقىنىڭ باسىنان وتكەن سان قيلى زاماندار، ونىڭ تىرشىلىگى مەن داعدارىسى، ءسالت-داستۇرى، ساناسى، ءومىر سۇرگەن ورتاسى، ادەت-عۇرپى ارقىلى ۇلتتىق ونەر ۇرپاقتان-ۇرپاققا جالعاسىپ، بولاشاق ءۇشىن تاريح ساحناسىنا اينالدى. 
 
ۇلتتىق ونەرىمىزدى بىزگە جەتكىزىپ كەل­گەن سالالاردىڭ ءبىرى – مۋزىكا دەسەك، قازاق مۋزىكا ونەرىنىڭ حالىقپەن بىرگە جاساسىپ، تاريحي-الەۋمەتتىك ءومىرى مەن تولعانىس-تەبىرەنىستەرىن ۇزدىكسىز بايان ەتىپ كەلە جاتقان سالاسى – ءان مەن كۇيى. قازاقتىڭ ءداستۇرلى تويلارى، ويىن-ساۋىقتارى انمەن سەرىك بولىپ جالعاسىپ كەلەدى. سول اۋىز ادەبيەتىنىڭ ەجەلگى ۇلگىلەرى مەن قازىرگى اندەردى شەبەر ۇشتاستىرۋ ءۇشىن تالاي ۋاقىت تالماي ىزدەنە بىلگەن ونەر يەلەرىنىڭ ءبىرى ءارى بىرەگەيى «اق اجەلەر» فولكلورلىق-ەتنوگرافيالىق حالىق ءانسامبلىنىڭ الماتى وبلىسىنىڭ مادەني-رۋحاني ومىرىندەگى الار ورنى ايرىقشا.
1986 جىلى 8 ناۋرىز – حالىقارالىق ايەلدەر مەرەكەسى قارساڭىندا قۇرىلعان «اق اجەلەر» ءانسامبلىنىڭ ونەرى كوپ ۇزاماي-اق بۇكىل ەلىمىزگە تانىلىپ ۇلگەردى. انسامبل ۇجىمى ەكى-ۇش جىل كولەمىندە-اق اۋدان، وبلىستاردى ارالاي ءجۇرىپ، انسامبل مۇشەلەرى 60-تان استام جوقتاۋدىڭ، جيىرماعا جۋىق جاراپا­زاننىڭ، 15-تەي سىڭسۋدىڭ نۇسقاسىن، بەتاشار، بەسىك، تۇساۋكەسەر، بادىك جىرلارىنىڭ ونداعان نۇسقاسىن جيناپ، قاعازعا ءتۇسىرىپ، ارقان كەسۋ، قۇيرىق-باۋىر اساتۋ، قۇدا سۇيرەۋ، ات قويۋ، قىز ۇزاتۋ جانە تاعى باسقا قۇندى داستۇر-سالتىمىزبەن ادەمى ادىپتەپ، ساحنالاندىرۋ ونەرىنىڭ دە ساڭلاعى اتالا ءبىلدى.
«اق اجەلەر» ماسكەۋدە وتكەن «حالىق شىعارماشىلىعى» بايقاۋىنىڭ جەڭىم­پازى اتانىپ، ءبىرىنشى جۇلدەنى يەلەنىپ قايتتى. انسامبل مۇشەلەرىنىڭ داۋىستارى قازاق راديوسىنىڭ التىن قورىنا جازىلىپ الىندى. 1989 جىلى جەلتوقسان ايىندا ءارتىس اجەلەر قازاق تەلەديدارى ۇيىمداستىرعان 1988، 1989، 1990 جىلدار­داعى تىكەلەي ەفيردەن بەرىلگەن «ناۋرىز» مەرەكەسىنە قاتىسىپ، كورەر­مەندەر ريزاشىلىعىنا بولەندى. 1990 جىلى قازاق سيركى ۇيىندە وتكىزىلگەن «ناۋرىز-دۋماندا» ونەر كورسەتكەن اجەلەر توبى ۇلتتىق ونەرىمىزدىڭ ەڭ اسىلى مەن تۇنىعىن، كوكىرەك تۇكپىرىندە كوزىنىڭ قاراشىعىنداي ساقتاپ كەلگەن ادەت-عۇرىپ، سالت-داستۇرلەردى، راسىمدەردى ونەر تىلىندە جەتكىزە ءبىلدى. ءتىلىمىز بەن ءدىنىمىزدى ءدارىپ­تەۋگە دە شىنايى تىلەكتەستىك تانىتتى. ال 1990 جىلى الماتىداعى ونەر ينستي­تۋتىندا وتكەن حالىق اندەرىن زەرتتەۋشى-عالىم ا.ب.زاتايەۆيچتىڭ تۋعانىنا 120 جىل تولۋىنا وراي ۇيىمداستىرىلعان مەرەكەدە ونەر كورسەتىپ، دۇنيەنىڭ ءتورت بۇرىشىنان جيىلعان سازگەرلەردىڭ ىستىق ىقىلاسىنا بولەنىپ، انسامبل مۇشەلەرى تۇگەلدەي ماراپاتقا يە بولعان. 1990 جىل انسامبل ءۇشىن ەڭ جەمىستى جىل بولدى. وسى جىلى انسامبل مۇشەلەرى ۆارشاۆا ۋنيۆەر­سيتەتىنىڭ رەكتورى اننا چەكانوۆسكانىڭ شاقىرتۋىمەن پولشادا قازاق فولك­لورلىق ونەرىنە قىزىعۋشىلىق تانىتقان حالىقتار الدىندا ونەر كورسەتىپ قايتقان. ال ناۋرىز ايىندا تۇركيا ازاماتتارى مانسۇر ءتايجى، ابدۋلقايىم ءۇنامان، قۇماربەك ءومىر مىرزالاردىڭ ارنايى شاقىرۋىمەن تۇرىك ەلىنىڭ قازاقكەنت ايماعىنداعى قانداستارىمىزدى حالقى­مىزدىڭ ءداستۇر-سالتى، ادەت-عۇرپىمەن سۋسىنداتىپ قايتقانى تاعى بار. سول كەزدەگى مادەنيەت مينيسترلىگى 1991 جىلى ءانسامبلدىڭ شەبەرلىگىنىڭ ءوسۋ دەڭگەيىن ەسكەرە كەلە ونەرلى اجەلەرگە «حالىق ءانسامبلى» دەگەن جوعارى اتاق بەردى.
انا جۇرەگىنىڭ كەڭدىگى مەن كەڭپە­يىلدىلىگى – ولاردىڭ جاستاردى قولونەرگە باۋلۋىندا. حالىقتىق قولونەردى جانداندىرىپ جۇرگەن اجەلەر ونەرى اۋداندىق، وبلىستىق، رەسپۋبليكالىق كورمەلەردە ماراپاتتالىپ ءجۇر. 1990 جىلى اجەلەر ءانسامبلىنىڭ مۇشەلەرى ءوز كۇشتەرىمەن بوس قالعان ينتەرنات عيما­راتىن جوندەۋدەن وتكىزىپ، قولونەر سەحىن اشقان، وندا كىلەم توقيتىن 3 ستانوكتا 18 قىز-كەلىنشەك جۇمىس ىستەپ، ءبىر بولمەدە ۇلتتىق كيىمدەر تىگىلسە، ەكىنشى­سىندە، كەستەلەنگەن، ال ۇلكەن بولمەسىندە كيىز، پيما باسىلىپ، سىرماق سىرىلىپ، كيىز قالپاقتار تىگىلگەن. جاسالعان بۇيىمدار الماتىداعى «ميراس» دۇكەنىندە ساتىلىپ، سەحتا جۇمىس جاساعان 30 قىز-كەلىنشەككە جالاقى بەرىلىپ تۇرعان. ۇيرەتۋ جۇمىستارىنىڭ بارلىعىن تەگىن اتقارعان اجەلەر توبى جاستاردىڭ ونەر ۇيرەنىپ، وتباسىلارىن اسىراۋىنا كوپ كومەكتەستى.
قولونەر تۇرلەرىن جاقسى مەڭگەرگەن تۇرسىنحان مەن گۇلنۇر ءقازىر جەكە شەبەرحانا اشىپ، سوندا ەڭبەك ەتۋدە. شىنار، ءاليا، ءنازيرا سىندى شاكىرتتەرى ونەر كوللەدجىن ءبىتىرىپ، ديزاينەر بولىپ ىستەپ ءجۇر. قولونەر شەبەرلىگى اجەلەردىڭ ءوز مارتەبەلەرىن دە ۇستەم ەتۋدە. 2002 جىلى فرانسياعا قازاقستاننان ارنايى شاقىرىلعان 50 دەلەگاتتىڭ قۇرامىندا انسامبل جەتەكشىسى – ق ر مادەنيەت قايراتكەرى، «ەرەن ەڭبەگى ءۇشىن» مەدالىنىڭ يەگەرى، جامبىل اۋدانىنىڭ قۇرمەتتى ازاماتى، كۇمىس القالى اجە كۇمىس كەمەلبەكوۆا پاريج قالاسىنىڭ ىرگەسىندەگى «شانتەلەي» سپورت كەشەنىندە تىگىلگەن ون ءۇيدىڭ بىرىندە اجەلەر قولىنان شىققان ۇلتتىق ناقىشتاعى اسەم بۇيىم­دارمەن شەتەلدىكتەردى تانىستىرعان، الاشا، كىلەم توقيتىن ورمەك ادىستەرىن كورسەتىپ، فرانسۋزداردىڭ تاڭدايىن قاقتىرعان. بۇيىمدارى جوعارى باعا الىپ، «ديانا ەرمەس» اتىنداعى ارنايى سىيلىققا يە بولىپ، ەل مەرەيىن وسىرگەن ەدى.
اجەلەر توبى ونەر جولىنا جاستاردى تاربيەلەۋگە كوپ ەڭبەك ءسىڭىردى. 7 جىل انسامبل كۇرامىندا سىڭسۋ ورىنداپ كەلگەن جانار بۇلانبايەۆا كونسەرۆاتو­ريانى ءبىتىرىپ، ءقازىر استانا تەلەارناسىندا جۇمىس ىستەيدى. 10 جاسىنان جاراپازان ايتىپ، انسامبل مۇشەسى بولعان بەيبىت مامىتبايەۆ تا ونەر ينستيتۋتىن ءبىتىرىپ، سىبىزعىشى ماماندىعىن الدى. ونەر جولىنا تاربيەلەنىپ جۇرگەن 5-6 نەمە­رەلەرى بار، سونىڭ ءبىرى – ايبولات ا.جۇ­بانوۆ اتىنداعى ساز مەكتەبىنە قا­بىلداندى. ءتابيعا – سەلەزنيەۆ اتىن­داعى حورەوگرافيالىق ۋچيليششەدە، ءامينا مەن قۇرالاي ونەر مەكتەبىندە وقيدى. وسىنداي ورتاق مۇددەگە ۇلەس قوسىپ جۇرگەن «التىن القالى» اجەلەر نۇرجامال ىبىراي­جانوۆا، ورىن ءابدىراحمانوۆا مەن «كۇمىس القالى» گۇلسىمحان ءاجنۇر، كۇمىس كەمەل­بەكوۆا، زارلىحان ەرۇزاقوۆا، زۋلفيا دۇيسەنوۆا، ساتكۇل ءۇسىپوۆا، «قازاقستان رەسپۋبليكاسىنىڭ ءبىلىم بەرۋ ۇزدىكتەرى» ءابدىراحمان بايعانايەۆ، فاينا باي­مۇرزايەۆا، باتەن مۇحامەتجانوۆا، شايمحان يسايەۆا، شەكەر سارسەنبييەۆا، بۇكىلوداقتىق بايقاۋلاردىڭ بىرنەشە دۇركىن جۇلدەگەرى التىن الىپبايەۆا مەن قاز كسر جوعارعى كەڭەسىنىڭ دەپۋتاتى بولعان گۇلسىم كارەنەيەۆا، «قازاقتىڭ 100 ءانى» بايقاۋىنىڭ جۇلدەگەرى تۇرسىنحان جانامانوۆا، 80 جاستاعى اتاقتى ءبيشى اجە ءۇمىتجان بوتبايەۆا، انشىلەر ءۇمىت تايجا­نوۆا، اسىلحان نۇسىپبايەۆا، اقىلاي كۇمىسبەكوۆا، بازاركۇل اجىقوجايەۆا، كۇلجان ەستىبايەۆا، اسىلحان مۇحامەت­جانوۆا، دانا ماحانوۆا، التىناي نۇربەكوۆا سىندى اجەلەرىمىزدىڭ ەسىمدەرى ءاردايىم ىلتيپاتپەن ەسكە ورالادى.
2016 جىلى جامبىل اۋدانى اكىمدىگىنىڭ قولداۋىمەن وزدەرىنىڭ 30 جىلدىعىن توي­لاعالى وتىرعان اجەلەر توبىنىڭ حالىققا دا، كەلەر ۇرپاققا دا بەرەرى مول.
 
اقىن اتىنداعى باسىلىمعا – 10 جىل
 
«مۇقاعالي» جۋرنالى – مۇقاعاليتانۋ باستاۋى. رەسپۋبليكاعا تارايتىن ادەبي-مادەني، تانىمدىق جۋرنال اقىن مۇراسىن ۇلىقتاۋدا ايتارلىقتاي قىزمەت اتقارىپ كەلە جاتقانى بەلگىلى. ءقازىر ول قالىڭ بۇقارانىڭ قاجەتىنە جاراپ، وقىرماننىڭ نازارىن وزىنە اۋداراتىن بەلدى باسىلىمعا اينالدى. 
«مۇقاعالي» اقيىق اقىننىڭ ارتىندا قالعان مۇراسىن جاڭعىرتۋمەن قاتار، ادەبيەت الەمىنىڭ سان سالاسى بويىنشا دا كەمەلدى دۇنيەلەردىڭ جاريالانۋىنا ۇيىتقى بولۋدا. 

 وبلىس اكىمى اماندىق باتالوۆ «مۇقاعالي» جۋرنالى ۇجىمىن باسىلىمنىڭ جارىق كورگەنىنە 10 جىل تولۋىمەن قۇتتىقتادى. 
– بۇگىندە ەلىمىزدە قازاق ادەبيەتىنىڭ ايتۋلى تۇلعالارىنىڭ اتىمەن شىعاتىن ءبىرقاتار ادەبي-تانىمدىق باسىلىمداردىڭ ىشىندە «مۇقاعالي» جۋرنالىنىڭ ايشىقتى ورنى بار. جۋرنال اقيىق اقىن مۇقاعالي ماقاتايەۆتىڭ شىعارماشىلىعىن كەڭىنەن ناسيحاتتاپ، ازاماتتىق بولمىسىن، اشىلماعان قىرلارىن وقىرمانعا تانىتۋ جولىندا تىنباي ەڭبەكتەنىپ كەلەدى. باسىلىمنىڭ تاقىرىبى تەك اقىن شىعارماشىلىعىمەن عانا شەكتەلىپ وتىرعان جوق، قايتا مۇقاعاليتانۋ اياسىنىڭ الدەقايدا كەڭدىگىنە، جۇگىنىڭ اۋقىمدىلىعىنا وقىرماننىڭ كوزىن جەتكىزىپ، سول جاۋاپكەرشىلىكتى ءىستى ابىرويمەن اتقارۋدا. الماتى وبلىسىندا جارىق كورگەنىمەن، تارالۋى ءبىر وڭىرمەن شەكتەلمەيتىن «مۇقاعالي» جۋرنالى اقىن شىعارمالارىنىڭ قازاققا عانا ەمەس، تۇتاس تۇركى جۇرتىنا ورتاق اسىل مۇرا ەكەنىن ايعاقتاپ كەلەدى. سوندىقتان جۋرنالدىڭ العاشقى مەرەيلى تويى – جەتىسۋلىقتاردىڭ دا قۋانىشى. مۇقاعالي مۇرالارىنىڭ ومىرشەڭدىك ولشەمىن تانىتۋ جولىنداعى ەڭبەكتەرىڭىز جەمىستى بولسىن! – دەلىنگەن قۇتتىقتاۋدا.
 
62 پاتەر بەرىلدى
 
الماتى وبلىسىندا بيىل قۇرىلىس سالاسىنا 40 ملرد تەڭگە بولىنگەن. وسى قاراجات ەسەبىنەن 237 نىساننىڭ قۇرىلىسى جۇرگىزىلۋدە. ونىڭ ىشىندە بيىلعى جىلعا بەلگىلەنگەن 173 نىساننىڭ 122ء-سى پايدالانۋعا بەرىلدى.
بۇل تۋرالى ورتالىق كوممۋني­كاسيالار قىزمەتىنىڭ وبلىستىق ءبولىم­شەسىندە وتكەن بريفينگ بارىسىندا وبلىستىق قۇرىلىس باسقارماسى باسشىسىنىڭ ورىنباسارى مارات نۇسىپبايەۆ مالىمدەدى.

مارات مىرزانىڭ مالىمەتىنە سۇيەنسەك، جالپى، وبلىستا ءبىلىم سالا­سىنىڭ 43 نىسانىنىڭ قۇرىلىسى مەن جاڭعىرتۋ جۇمىستارىنا بيۋدجەتتەن 17 ملرد 523 ملن تەڭگە، ال دەنساۋلىق ساقتاۋ نىساندارىنا 4 ملرد 969 ملن تەڭگە قاراستىرىلعان.
سونىمەن قاتار بيىلعى جىلدىڭ 10 ايىندا جالپى الاڭى 36،77 مىڭ شارشى مەتر بولاتىن 62 تۇرعىن ءۇي سالىنىپ، پايدالانۋعا بەرىلگەن.
 
مۇحيت اسقان تۋىندى
 
ادام بالاسىنىڭ كەز كەلگەن جاساعان شىعارماشىلىق جەتىستىگى كۇللى جۇرتقا ورتاق. دۇنيەنىڭ ءبىر تۇكپىرىندە كەرەمەت ءبىر اسەم مۋزىكا نەمەسە قىلقالام تۋىندىسىنىڭ كەرەمەت دەيتىن اتى شىقسا، ول سول ساتتەن باستاپ بۇكىل ادامزاتتىق رۋحاني قۇندىلىققا اينالا باستايدى. 

ءقايبىر جەردە بولسىن ونەردىڭ ءبىر قىلى ۇزىلسە، ول سول حالىققا عانا ەمەس، بۇكىل الەمدىك رۋحاني بايلىققا سىزات ءتۇستى دەپ ۇعىنۋىمىز كەرەك. مۇنداي استارلى ويدىڭ اۆتورى فون گۋمبولد تالاي جىل بويىنا ءسوز ونەرى مازمۇنىنىڭ تەرەڭدىگىنە ەرەكشە توقتالىپ كەلەدى. مۇندا نەگىزگى نارسە ءتىل مەن ۇلتتىق ءداستۇر، سالت-سانا ەرەكشەلىگى باسىمدىققا يە. قۇندى شىعارما – ۇلت قازىناسى.
«وركەنيەتتىڭ تال بەسىگى – قازاق دالاسى» دەپ جۇرگەن اعىلشىن جۇرتى تاريحىمىزدى تانىپ، ادەبيەتىمىز بەن مادەنيەتىمىزدىڭ ەل بولىپ قۇرىلعاننان-اق سالتانات قۇرعانىن سارالاپ الىپ، ويىن وسىلايشا توپشىلاۋدا. ولاردىڭ رۋحى بەرىك قازاقتى ءبىلىپ، ءسالت-داستۇرىمىز بەن ساف التىنداي ءسوزىمىزدى تانۋىنىڭ باستى كۇشى ادەبيەتىمىزدە جاتىر. ال ونى الەم كەڭىستىگىنە شىعاراتىن داڭعىل جول – اۋدارما.
راس، تاۋەلسىزدىككە دەيىنگى 70 جىلدا اۋد­ارما ماسەلەسى ورنىقتى جۇمىس ىستە­مەدى. اقىن-جازۋشىلاردىڭ ءبىرلى-جارىم شىعارماسى ورىس، اعىلشىن، نەمىس تىلدە­رىنە اۋدارىلعانىمەن، ونىڭ سىرتىندا الەم ادەبيەتىنە سۇرانىپ تۇرعان تۋىندى كوپ بولاتىن. بۇگىنگى تاڭدا سول ولقى­لىقتىڭ ورنى تولىپ، توسىننان ورىن العان تاڭعاجايىپ وقيعاداي جاڭالىقتار جاندى جادىراتۋدا. 
وسىعان وراي، ءتىل سارايىندا امەريكا قۇراما شتاتىنىڭ نيۋ-يورك قالا­سىنداعى «Metropolitan Classics» باسپاسىنان اعىلشىن تىلىندە جارىق كورگەن قازاقتىڭ اقيىق اقىنى مۇقاعالي ماقاتايەۆتىڭ تاڭدامالى جيناعى مەن كورنەكتى جازۋشى بەردىبەك سوقپاق­بايەۆتىڭ «مەنىڭ اتىم قوجا» اتتى اتاقتى پوۆەسىنىڭ تۇساۋكەسەرى ءوتتى.
– قازاقتىڭ باي ادەبيەتى الەمدىك دەڭگەيگە كوتەرىلىپ، اعىلشىن تىلىندە وقىلاتىن بولدى. بۇل – ۇلكەن جەتىستىك. حان ءتاڭىردىڭ مۇزبالاعى، اقيىق اقىن مۇقاعالي مەن «بالالىق شاققا ساياحات» جاساعان جازۋشى بەردىبەكتىڭ ەسىمى نيۋ-يوركتىڭ تورىندە اتالىپ، قازاقتىڭ مەرەيىن اسىردى. امەريكا جازۋشىلارى­نىڭ اعىلشىن تىلىندە جازىلعان كلاسسي­كالىق تۋىندىلارى قازاق تىلىندە جارىق كورۋدە. وسىنداي مادەني قۇندىلىقتار الماسۋىنىڭ بەرەرى كوپ، – دەپ كىرىسپە ءسوز سويلەگەن اماندىق عابباس ۇلى سالتاناتتى شاراعا قاتىسۋشى بارشا قالامگەردى ايتۋلى قۋانىشىمەن قۇتتىقتادى.
راسىندا، بۇل – ادەبيەت سالاسىندا جۇرگەن قالامگەردىڭ عانا ەمەس، بارشا قازاقتىڭ قۋانىشى. مۇقاعالي جىرىن جاستانىپ وقىمايتىن ادام كەمدە-كەم. ال «ولگەندەر قايتىپ كەلمەيدى» رومانىن جازىپ، بالالار ادەبيەتىنە ۇلكەن ۇلەس قوسقان بەردىبەك سوقپاقبايەۆتىڭ دا سالعان ءوز سۇرلەۋى، جولى بار. مىنە، وسىن­داي تالانتتى دا تانىمال قوس قالامگەردىڭ تۋىندىسى مۇحيت اسىپ، وزگە ەلدە جارىق كورىپ جاتسا، نۇر ۇستىنە نۇر بولعانى. وعان ۇلەس قوسقان جانداردىڭ بارى دا ۇعىنىقتى جايت. حالىقارالىق قازاق پەن-كلۋبىنىڭ پرەزيدەنتى بيگەلدى عابدۋللين بۇدان بىرنەشە جىل بۇرىن حالىقارالىق جازۋشىلار ۇيىمىنىڭ مۇشەلەرىن قابىلداي وتىرىپ، قازاق ادەبيەتىنىڭ كورنەكتى وكىلدەرىنىڭ شىعار­مالارىن اعىلشىن تىلىنە اۋدارۋ تۋرالى نيەت-تىلەگى بارىن بىلدىرگەن بولاتىن. 
بۇگىندە سول يگى شارانى جۇزەگە اسى­رۋعا مۇرىندىق بولعان بيگەلدى اعامىز: «بۇل – جالپى قازاق ەلىنىڭ عانا ەمەس، تۇركى حالىقتارىنا ورتاق قۋانىش. قاي ەلگە بارساق تا، قانداي جەردە جۇرسەك تە مۇقاعاليمەن ماقتانامىز. ال ونىڭ تۋىندىلارىن العاشقى بولىپ اعىلشىن تىلىنە اۋدارىپ، بەردىبەكتەي كلاسسيك جازۋشىنىڭ «مەنىڭ اتىم قوجا» پوۆەسىن امەريكانىڭ ەڭ بەدەلدى باسپاسىنان جارىققا شىعارعانىمىز دۇرىس دەپ ويلايمىن. ەندەشە، تاۋ تۇلعالى جان­داردىڭ اعىلشىن تىلىنە اۋدارىلعان كىتابى قۇتتى بولسىن» دەي كەلە، قارجىلاي قول ۇشىن سوزىپ، ادەبيەتكە ۇلەسىن قوس­قان اماندىق باتالوۆقا دەگەن العىسىن جەتكىزدى. 
سونداي-اق كەشەگى اشارشىلىق زاما­نىنداعى قازاقتىڭ باستان كەشكەن ءومىرى جايلى جازىپ، بارشا ادەبيەتسۇيەر قاۋىمعا، قازاققا «اق بوز ءۇي» رومانىمەن تانىلعان جازۋشى سماعۇل ەلۋباي ءسوز الىپ، ادەبيەتىمىزدىڭ بۇگىنى مەن ەرتەڭى، اۋدارما جۇمىسىنىڭ زور ەڭبەك پەن مول قاجىردى تالاپ ەتەتىندىگى جايلى ءسوز سويلەدى. بۇل شارادا جەتىسۋلىق قالام­گەرلەردىڭ اتىنان ءسوز العان قازاقستان جازۋشىلار وداعىنىڭ مۇشەسى، اقىن امىرە ءارىن سوناۋ الىپ ەر تۇڭعادان باستاۋ الاتىن ادەبيەتىمىزدىڭ بۇگىنگى تاڭدا مۇحيت اسۋى تۇركى الەمىنىڭ قۋانى­شى ەكەنىن ايتىپ، سالتاناتتى شاراعا قاتىسۋشى قوناقتارعا دەگەن العىسىن جەتكىزدى. سونىمەن قاتار قازاقستان جۋرناليستەر وداعىنىڭ مۇشەسى، بابالار ادەبيەتىنە قالام سىلتەپ جۇرگەن جاس جازۋشى ەسبولات ايدابوسىن مەن بەلگىلى اقىن ەرلان ءجۇنىس جاس قاۋىمنىڭ اتىنان ءسوز السا، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ قازاق ءتىلى مەن ادەبيەتى كافەدراسىنىڭ دوسەنتى، فيلولوگيا عىلىمدارىنىڭ دوكتورى، اقىن دۇيسەن اڭسابايەۆ وبلىس اكىمى اماندىق باتالوۆ پەن قوس جازۋشىنى شەتەلگە تانىتقان قالامگەرلەرگە دەگەن ىستىق ىقىلاسىن ءبىلدىردى.
نەگىزىنەن، مۇقاعالي ماقاتايەۆ كىتابى­نىڭ العى ءسوزىن تالانتتى اقىن ۇلىقبەك ەسداۋلەتوۆ جازعان. ال بەردىبەك سوقپاقبايەۆتىڭ «مەنىڭ اتىم قوجا» پوۆەسىن امەريكالىق اۋدارماشى كەترين فيتسپاتريك اۋداردى. وسىنداي تۇلعالار مەن اۋدارماشىلاردىڭ زور ەڭبەگىمەن جارىققا شىققان كىتاپتىڭ تۇساۋكە­سەرىندە، وبلىس اكىمى اماندىق باتالوۆ حالىقارالىق قازاق پەن-كلۋبىنىڭ پرە­زيدەنتى بيگەلدى عابدۋللين مەن تانىمال جازۋشى سماعۇل ەلۋبايعا باعالى سىيلىق تابىستادى. مۇحيت اسقان قوس تۋىندىنىڭ لەنتاسى قيىلىپ، قالامگەرلەردىڭ قۇنارلى سوزىمەن مارەسىنە جەتكەن شارادان كورەرمەندەر قۋانىشپەن تارقاستى.

دەرەككوز: ايقىن-اقپارات