ءال-فارابي اتىنداعى قازاق ۇلتتىق ۋنيۆەرسيتەتىنىڭ  «100 كىتاپ» باعدارلاماسى اياسىندا «ۇلتىنىڭ ۇمىتىلماس تۇلعاسى – ساپار بايجانوۆتىڭ شىعارماشىلىعى» اتتى رەسپۋبليكالىق عىلىمي-تاجىريبەلىك كونفەرەنسيا ءوتتى. كونفەرەنسياعا ءجازۋشى-جۋرناليستىڭ جارى كۇلاش بەيسەنبييەۆا مەن بالاسى ەرلان بايجانوۆ، زامانداستارى مەن شاكىرتتەرى قاتىستى. ءىس-شارا بارىسىندا ساپار بايجانوۆتىڭ ءومىرى مەن شىعارماشىلىعىنا ارنالعان «قازاق ۋنيۆەرسيتەتى» باسپاسىنان «ونەگەلى ءومىر» سەرياسىمەن  جارىق كورگەن كىتاپتىڭ تۇساۋى كەسىلدى. بۇل تۋرالى «قامشى» پورتالى حابارلايدى.

«ءومىردىڭ دە ءومىرى بار. تۇرلىشە ءومىر سۇرۋگە بولادى. بىرەۋلەر نەگىزىنەن العاندا ءوزى ءۇشىن ءومىر سۇرەدى. قارىن توق، قايعى جوق. ەش قيىنشىلىق تا تارشىلىق تا كورمەي، اۋزىنان اق ماي اعىپ دەگەندەي راحات تىرلىك كەشەدى. ءسويتىپ ءجۇرىپ دۇنيەدەن وتەدى. ەكىنشى ءبىر ادامدار ءوزى ءۇشىن ءومىر كەشپەيدى. الگىندەي قوشان تىرلىكتى مىسە تۇتپايدى. جەرىم قايتسە كوگەرەر، ەلىمىز، ۇرپاعىمىز قايتسە باقىتتى بولادى دەگەندەي ۇلكەن ارمان ارقالاپ، سونىڭ جولىندا عۇمىرىن، ءومىرىن سارپ ەتەدى. قيىندىق، ازاپتى دا شەگۋى مۇمكىن. ءبىراق، سول جولدان اينىمايدى، تالمايدى. قيىنىنا قينالا ءجۇرىپ دۇنيەدەن وتەدى. مۇنداي ادامدار ومىردە كوپ بولمايتىنى دا راس. ساناۋلى عانا ءبىرتۋار ساڭلاقتاردىڭ، ەرەن ەرلەردىڭ ەنشىسى بۇل»، - دەدى كەزىندە ساپار اعا. سونداي ساناۋلى ازاماتتاردىڭ بىرىساپەكەڭنىڭ ءوزى ەدى.

قازاق جۋرناليستيكاسىنىڭ قارا جورعاسى، قارىمدى قالامگەر، بىلگىر عالىم ساپار اعانىڭ تۋعانىنا بيىل 85 جىل.

سارباس اقتايەۆ، جۋرناليست-جازۋشى:

• «ونەگەلى ءومىر» سەرياسىمەن جارىق كورىپ كەلە جاتقان كىتاپتار ءبىزدىڭ قالامگەرلەرىمىزدىڭ، قايراتكەرلەرىمىزدىڭ، قوعامنىڭ قالىپتاسۋىنا اتسالىسقان ارداگەرلەرىمىزدىڭ تانىلۋىنا ءوز سەپتىگىن تيگىزىپ جاتىر. جاقسى جوبا جالعاسىن تاپسىن دەپ تىلەك بىلدىرەمىز. ساپەكەڭ تۋرالى «ومىرگە وكپەم جوق مەنىڭ» دەگەن اتپەن جارىققا شىققان ءبىرىنشى كىتاپتىڭ رەداكتورى بولدىم. ونىڭ حالقىنا سىڭىرگەن ەڭبەگى تۋرالى ايتىلار اڭگىمە ءالى دە كوپ. ال ساپاردىڭ ومىرگە قالدىرعان ەڭ وزىق مۇراسى ونىڭ ارىستاي ءۇش ۇلى جانە نازىم. وسى بالالاردىڭ بۇگىندە اۋىز تولتىرىپ ايتارلىقتاي ازامات بولعاندارى مەنى قاتتى قۋانتادى. ەلىنە ەڭبەگى سىڭگەن ازامات بولسا، وسى ساپەكەڭدەي-اق بولسىن.

ساۋىتبەك ابدراحمانوۆ، «ەگەمەن قازاقستان رەسپۋبليكالىق گازەتى» اق پرەزيدەنتى:

• كەزىندە ءبىر عانا فاكۋلتەت بولدى.تۇلەكتەرىنىڭ قايدا باراتىنىن قازاقستان كومپارتياسىنىڭ ورتالىق كوميتەتى شەشەتىن. ول زاڭ، فيلوسوفيا نەمەسە ەكونوميكا فاكۋلتەتتەرى ەمەس-تىن. ول جۋرناليستيكا فاكۋلتەتى بولاتىن. وسىنداي كەزەڭدە جۇمىس ىستەگەن ادام وتە جاۋاپتى ادام بولۋى كەرەك ەدى. ساپەكەڭ سول كەزدە قازاقستاننىڭ باس گازەتى «سوسياليستىك قازاقستاندى» (قازىرگى «ەگەمەن قازاقستان») 10 جىل باسقاردى. ول كىسىنىڭ جاقسى قاسيەتتەرى وتە كوپ بولاتىن. ساپەكەڭ ادام تاني الاتىن، قانداي جاعداي بولماسىن تۇسىنىستىكپەن قارايتىن.

جۇمابەك كەنجالين، «قازاق گازەتتەرى» جشس-نىڭ باس ديرەكتورى:

• ادامدى العاش كورگەندە-اق پىكىر قالىپتاسادى. 1981 جىلى مەن «سوسياليستىك قازاقستان» گازەتىنە باردىم. سوندا رەداكتوردىڭ قابىلداۋىنا كىردىم. ساپار اعانىڭ كابينەتىنە كىرگەن بويدا «كەل، قالقام وتىر»، - دەدى. سوندا جۇرەگىمنىڭ قاعىسى بىردەن قالپىنا ءتۇستى. سول كەزدەگى كوزقاراس، سول كۇلكى ءومىر بويى مەنىڭ جادىمدا. ساپار اعانىڭ جانى جاڭاشىلدىققا قۇمار ەدى. قازاقستاندا گازەتتەردى كومپيۋتەرمەن تەرۋدى ەڭ العاش ساپار اعا «حالىق كەڭەسى» گازەتىندە جۇرگەندە مارات توقاشبايەۆ ەكەۋمىزگە تاپسىرعان. ول كىسى قازاق جۋرناليستيكاسىن قالاي دامىتساق ەكەن دەگەن ۇستانىممەن ۇنەمى ىزدەنىس ۇستىندە جۇرەتىن.

قايرات ساق، ل.ن.گۋميليەۆ اتىنداعى ەۇۋ جۋرناليستيكا جانە ساياساتتانۋ فاكۋلتەتىنىڭ دەكانى:

• بۇگىندە ساپار اعانىڭ شىعارماشىلىعىن زەرتتەپ جۇرگەن سونىڭ ىشىندە ديپلومدىق جۇمىستار، ديسسەرتاسيالار جازىپ جۇرگەن جاستار بارشىلىق. ساپار اعا تۋرالى الدىڭعى بۋىن اعالارىمىزدان ارتىق ايتا الماسپىز. ءبىراق، ساپار اعانىڭ مۇراعات سالاسىنداعى ەڭبەگىن ايتىپ ءوتۋ كەرەك. ول كىسى قۇجاتتارعا ۇقىپتى بولۋ كەرەك، سەبەبى قۇجاتتى قايتا جاڭعىرتۋ مۇمكىن ەمەس دەيتىن.

كۇلاش بەيسەنبى قىزى، ساپار بايجانوۆتىڭ جارى، جازۋشى-جۋرناليست:

• ول كىسى بارىنشا ەڭبەكقور ادام ەدى، ۇنەمى جاۋاپتى قىزمەتتە بولعاندىقتان قولى كوپ تيە بەرمەيتىن. دەمالىس كۇنى باستاعان شىعارماشىلىق جۇمىسىنىڭ جالعاسىن كەلەسى دەمالىستا ءبىر-اق اياقتايتىن. ارادا ويلار ءۇزىلىپ قالسا دا، وتە قابىلەتتى كىسى، وسىلاي جەكە شىعارماشىلىعىن جالعاستىرىپ وتىراتىن.

ەگەر ءبىر جىگىتتىڭ جاقسى ءبىر ويى بار ماقالاسىن وقىسا، ول قاي جەردىڭ جىگىتى، ول كىم، مىنەز-قۇلقى قانداي دەگەنگە قارامايدى. وزىندىك ويى بار، قالامى جۇيرىك دەپ قامقورلىق جاسايتىن. ۇستىنەن جاستاردى جيناپ جاتىر دەگەن ارىزدار ءتۇسىپ جاتقانىنا قاراماي، ون بەس وبلىستان جازۋ ءستيلى كوڭىلىنەن شىققان جىگىتتەردى رەداكسياعا شاقىردى، قولداۋ كورسەتتى.

جۇزدەگەن ماقالا، جيىرمادان استام كىتاپ، رومان مەن پەسا جازعان س.بايجانوۆتىڭ ءومىرى مەن شىعارماشىلىعى، ول تۋرالى جازىلعان ەستەلىكتەر مەن ارناۋلار «ونەگەلى ءومىر» سەرياسىمەن جارىق كورگەن كىتاپقا ارقاۋ بولدى. بەس بولىمنەن تۇراتىن كىتاپقا ارنايى مۇراعات قۇجاتتارى دا ەنگەن.

ۋنيۆەرسيتەت رەكتورى، اكادەميك عالىمقايىر مۇتانوۆتىڭ باستاماسىمەن وتكەن جيىن سوڭىندا ساپار بايجانوۆتىڭ جارى كۇلاش بەيسەنبييەۆا مەن بالاسى ەرلان بايجانوۆقا، ۇمبەتباي ۋايدينگە، مەرەكە كوكەنوۆكە، ەسەنعالي راۋشانوۆقا، امانحان ءالىمۇلىنا، ءشومىشباي سارييەۆكە«ءال-فارابي اتىنداعى قازۇۋ-گە 80 جىل» مەرەيتويلىق توسبەلگىسى تابىستالدى.