الماتىدا بۇگىن يپوتەكالىق نەسيەمەن ءۇي الدىق دەگەن 30 شاقتى بورىشكەر ۇلتتىق بانك الدىندا نارازىلىق اكسياسىن وتكىزدى. بۇل تۋرالى «قامشى» پورتالى ازاتتىققا سىلتەمە جاساپ حابارلايدى.

اقتوبەدەن كەلگەن بورىشكەر، "حالىققا باسپاناسىن قالدىرايىق" قوزعالىسىنىڭ مۇشەسى گۇلجامال ايتمۇحامەتوۆانىڭ ازاتتىققا ايتۋىنشا، بانكتەن يپوتەكالىق نەسيەمەن العان ۇيلەردىڭ قارىزىن قايتا قارجىلاندىرۋ باعدارلاماسى اياقتالمايىنشا بورىشكەرلەردى ۇيلەرىنەن كۇشتەپ شىعارماۋدى تالاپ ەتەدى.

- پروبلەمالىق نەسيەلەردى قايتا قارجىلاندىرۋ باعدارلاماسى اياقتالىپ بولمايىنشا بورىشكەرلەردى ۇيلەرىنەن شىعارۋدى توقتاتسىن. بورىشكەرلەر باعدارلاما بويىنشا يپوتەكالىق نەسيەلەرىن قايتا قارجىلاندىرۋعا قۇجات تاپسىرىپ قويعان. سوعان قاراماستان سوت ورىنداۋشىلار قارىزىن تولەمەگەن بورىشكەرلەردى كۇشتەپ ۇيلەرىنەن شىعارىپ جاتىر. ۇلتتىق بانك ەكىنشى دەڭگەيلى بانكتەرگە سوتقا قارىزدارىن ءوندىرۋ جونىندە تالاپ-شاعىم بەرۋدى توقتاتسىن دەگەن بۇيرىق بەرۋى ءتيىس، ءبىراق بەرمەي وتىر، - دەدى ايتمۇحامەتوۆا.

بورىشكەرلەرەن كەزدەسۋگە شىققان ۇلتتىق بانكتىڭ تۇتىنۋشىلار قۇقىعىن قورعاۋ دەپارتامەنتىنىڭ ديرەكتورى الەكساندر تەرەنتيەۆ بانكتەردىڭ باعدارلاما ءجۇرىپ جاتقاندا بورىشكەرلەردى ۇيلەرىنەن شىعارۋى زاڭسىز ەكەنىن عانا ايتىپ، نارازىلاردىڭ تاراۋىن سۇرادى.

بيىل اقپاندا پرەزيدەنت نۇرسۇلتان نازاربايەۆ ۇلتتىق بانككە ۇكىمەتپەن بىرلەسىپ يپوتەكالىق تۇرعىن ءۇي بويىنشا قارىزىن وتەي الماي جۇرگەندەردىڭ ماسەلەسىن شەشۋدى تاپسىرعان. بۇدان سوڭ ۇلتتىق بانك پروبلەمالىق يپوتەكالىق نەسيەلەردى قايتا قارجىلاندىرۋ ءۇشىن 130 ميلليارد تەڭگە قارجى بولگەن. ول قارجىنىڭ جارتىسىنا جۋىعى ەكىنشى دەڭگەيلى بانكتەرگە اۋدارىلعان. قاراشانىڭ باسىندا ۇلتتىق بانك 3 مىڭ 500 پروبلەمالىق يپوتەكالىق نەسيە قايتا قارجىلاندىرىلعانىن حابارلاعان. 1 قاراشاعا دەيىن يپوتەكالىق تۇرعىن ءۇي قارىزدارىن قايتا قارجىلاندىرۋ باعدارلاماسىنا قاتىسۋعا 11 مىڭ ءوتىنىش تۇسكەن. ونىڭ 6 مىڭى بويىنشا نەسيەنى قايتا قارجىلاندىرۋ تۋرالى وڭ شەشىم شىققان.