وسى جىل قازاقتىڭ باس اقىنىنىڭ دۇنيە ەسىگىن اشقانىنا 170 تولىپ وتىر. ايتۋلى مەرەكەنى ەل بولىپ، جۇرت بولىپ، جەر-جەردە اتاپ وتۋدەمىز. ءداستۇرلى اباي وقۋلارىمەن باستالعان شارالار، عىلىمي كونفەرەنسيالار مەن ابايتانۋشى عالىمدارمەن كەزدەسۋ ۇيىمداستىرۋ سياقتى ءمان-ماعىناسى بار، مازمۇندى دۇنيەلەرگە جالعاستى. سونداي ءىس-شارانىڭ ءبىرى الماتى ۋنيۆەرسيتەتىندە دە ۇيىمداستىرىلدى. اۋەزوۆتانۋشى عالىم راحمانوۆا نۇرجانات مالدىباي قىزى قازاق ءتىلى مەن ادەبيەتى ماماندىعىنىڭ ستۋدەنتتەرى اراسىندا «مەن ءبىر جۇمباق اداممىن، ونى دا ويلا...» »   اتتى ادەبي سايىس وتكىزدى. 

ەرەجە بويىنشا ادەبي سايىس 4 بولىمنەن تۇردى. ءار ءبولىمنىڭ وزىندىك ەرەكشەلىگى بار.  اتاپ ايتار بولساق، العاشقى ءبولىم «ولەڭ – ءسوزدىڭ پاتشاسى، ءسوز ساراسى» دەپ اتالدى. ابايدىڭ اقىندىق قىرىن زەردەلەۋگە ارنالعان بۇل بولىمدە سايىسكەرلەردەن سۇراقتاعى ولەڭ شۋماعى ابايدىڭ قاي ولەڭىنەن ەكەنىن انىقتاپ، ولەڭدى جالعاستىرۋ تالاپ ەتىلدى.

« دانالىق ويلارى...» اتتى ەكىنشى بولىمدە ابايدىڭ قاراسوزدەرىنە كەزەك بەرىلدى. توپ جەتەكشىلەرى 7 سۇراقتان الىپ، بەرىلگەن سوزدەردىڭ ىشىنەن ابايدىڭ قاي قاراسوزىنەن ەكەنىن انىقتاپ، مازمۇنىنا قىسقاشا توقتالدى. ەكى بولىمدە دە ستۋدەنتتەر وتە بەلسەندىلىك تانىتىپ، ءبىرى بىلمەگەن سۇراقتى، ەكىنشى توپ مۇشەسى تولىقتىرىپ، ءسوز سايىسىنىڭ كوركىن قىزدىردى. ادەبي كەشتىڭ ءۇشىنشى بولىمىندە ۇيگە بەرىلگەن تاپسىرما بويىنشا وزدەرى ىزدەنىپ «ابايدى تانۋ» تۋرالى 5 مينۋتتىق ۆيدەو روليك ءتۇسىرىپ كەلۋ كەرەك ەدى. سايىسقا قاتىسۋشىلار ول تاپسىرمانىڭ دا ۇدەسىنەن شىعا بىلگەنىن ۆيدەو روليكتى كورۋ كەزىندە بايقالدى. ال ەندى سوڭعى ءتورتىنشى  ءبولىم «اباي الەمى...» دەپ اتالدى. اتىنىڭ ءوزى ايتىپ تۇرعانداي اباي اۋلەتى، الەمى، اقىن شىعارماشىلىعىن زەرتتەۋشىلەر، ءتۇرلى رەسمي فوتالار ەلەكتروندى تاقتادا كورىنىس بەرىپ، ستۋدەنتتەر كىم ەكەنىن انىقتادى. ءار سۇراققا ناقتى ءارى جىلدام، 30 سەكۋند ىشىندە جاۋاپ بەردى.

جالپى العاندا ادەبي سايىس جوعارى دەڭگەيدە ءوتتى. ىزدەنۋشى جاستار وتە بەلسەندى قاتىسىپ،  اباي قۇنانباي ۇلىنىڭ شىعارماشىلىعى تۋرالى ءبىرشاما بىلەتىنىن سوزبەن ەمەس ىسپەن دالەلدەدى. سايىس جەڭىمپازىن انىقتاۋ جاقىبايەۆا التىن تۇتقابەك قىزى، شاشايەۆ اۋەزحان كادىرجان ۇلى، ۇسەنوۆا اقكەنجە مۇقان قىزى سياقتى كىل مىقتى وقىتۋشى-پروفەسسورلار قۇرامىنان جاساقتالعان قازىلارعا وڭاي تيگەن جوق. جالپى كوماندالىق ويىندا اۋىزبىرشىلىگىمەن كوزگە تۇسكەن 1 كۋرس ستۋدەنتتەرىنىڭ «تەلعارا» توبى 1-ورىن يەلەندى. 2-ورىندى    جەڭىمپاز قۇرامنان 1 عانا بالمەن ارتتا قالعان 3 كۋرس ستۋدەنتتەرىنىڭ «تورىجورعا» توبى يەلەنسە، 3-ورىن 2 كۋرس ستۋدەنتتەرىنىڭ «شىڭعىستاۋ» قۇرامىنا بۇيىردى. سايىس سوڭىندا ۇيىمداستىرۋشى نۇرجانات مالدىباي قىزى ءسوز الىپ: «ءبىز وسىنداي تانىمى مول، رۋحاني جان-دۇنيەمىزدى بايىتاتىن ءىس-شارانى قۇر بەكەر ۇيىمداستىرىپ وتىرعان جوقپىز. ابايدىڭ الەمى-ول قازاق حالقىنىڭ الەمى. اباي-قازاق حالقىنىڭ ماڭدايىنا بىتكەن ۇلى پەرزەنت. ونى تولىق تۇسىنبەۋ، ۇعىنباۋ ءبىزدىڭ جۇرەگىمىزگە تۇسەتىن اۋىر تاڭبا. ابايدى بيىككە كوتەرۋدەن ءبىز ەشقاشان شارشاماۋىمىز، جالىقپاۋىمىز قاجەت. ءار قازاقتىڭ بالاسىندا اباي ايتقانداي «ىستىق قايرات، نۇرلى اقىل، جىلى جۇرەك» بولسا عانا ۇلكەن جەتىستىككە جەتەمىز»،-دەپ قاتىسۋشى ستۋدەنتتەردى ءبىر تەبىرەنتىپ تاستادى. سونىمەن قاتار، الداعى ۋاقىتتا باسقا ماماندىق ستۋدەنتتەرىمەن دە وسىنداي ادەبي ءسوز سايىسىن ۇيىمداستىراتىنىن ايتىپ ءوتتى.

استەمەس گۇلىم

الماتى ۋنيۆەرسيتەتى پەداگوگيكالىق ماماندىقتار

كافەدراسىنىڭ اعا وقىتۋشىسى