قازاق ەلى تاۋەلسىزدىگىنىڭ 24 جىلدىعى قۇرمەتىنە الەم ەلدەرىنىڭ باسشىلارى مەملەكەت باسشىسى نۇرسۇلتان نازاربايەۆقا قۇتتىقتاۋ حاتتارىن جولداپ جاتىر. ماسەلەن، ەڭ ءبىرىنشى بولىپ اقش-تىڭ قازاقستانداعى توتەنشە جانە وكىلەتتى ەلشىسى دجوردج كرول قازاقستاندىقتاردى تاۋەلسىزدىك كۇنىمەن قازاق تىلىندە قۇتتىقتادى. الايدا، ىرگەمىزدەگى كەيبىر كورشى مەملەكەتتەردىڭ باسشىلارى تاۋەلسىزدىگىمىزدىڭ 24 جىلدىعىمەن قۇتتىقتاماعانىن ايتا كەتكەن ءجون.

ارينە، الەمنىڭ بارشا مەملەكەتتەرىنىڭ باسشىلارى قازاق ەلىن تاۋەلسىزدىك كۇنىمەن قۇتتىقتاۋعا مىندەتتى ەمەس. ونىڭ ۇستىنە، تاۋەلسىزدىككتىڭ 24 جىلدىعى «دوڭگەلەك داتا» ەمەس. ايتسە دە، قازاق ەلىنىڭ تاۋەلسىزدىگىمەن الىستاعى اقش پەن ۇلىبريتانيا قۇتتىقتاپ جاتقاندا قۇدايى كورشىلەرىمىز «اۋىلداستىڭ تايى وزسىن» دەپ نيەتتەستىك تانىتپادى. ماسەلەن، ۇلىبريتانيانىڭ قازاقستانداعى توتەنشە جانە وكىلەتتى ەلشىسى كەرولين براۋن قازاقستاندىقتاردى قازاق تىلىندە تاۋەلسىزدىك كۇنىمەن قۇتتىقتادى. ءبىر قىزىعى، تەك اقش پەن ۇلىبريتانيا ەلشىلەرى عانا قازاق تىلىندە قۇتتىقتاۋ جاسادى.

ال، باۋىرلاس وزبەكستان مەن قىرعىزستان جانە جۇڭگو حالىق رەسپۋبليكاسى رەسمي قۇتتىقتاۋ جولدامادى. سونداي-اق، قازاق ەلىنىڭ تاۋەلسىزدىگىن ەڭ ءبىرىنشى بولىپ مويىندادى دەپ جۇرگەن تۇركيا دا بۇل جولى ءۇنسىز قالدى. ءبىزدىڭ ويىمىزشا، بۇل ۇنسىزدىك رەسەي-تۇركيا جان-جالىنا بايلانىستى بولسا كەرەك. ويتكەنى، ۇشاق داۋىنا بايلانىستى مەملەكەت باسشىسى نۇرسۇلتان نازاربايەۆ رەسەيدىڭ ۇستانىمىن قولداعان بولاتىن. سوعان قاراعاندا، رەسمي انكارا پرەزيدەنتتىڭ ۇستانىمىنا وكپەلى سياقتى.

ال، رف پرەزيدەنتى ۆلاديمير پۋتين ەڭ سوڭعى بولىپ قازاق ەلىنىڭ تاۋەلسىزدىك كۇنىمەن قۇتتىقتادى. «ماڭگىلىك دوسىمىزدىڭ» اقش پەن ۇلىبريتانيادان كەيىن قۇتتىقتاۋ حات جولداۋى نەنى اڭعارتادى؟ ويتكەنى، قۇدايى كورشىمىز ءالى كۇنگە دەيىن قازاق ەلىنىڭ تاۋەلسىز ەل بولعانىن قالامايدى. قالامايدى دەگەنىمىز سىپايىلىق، ءتىپتى رەسەي ءبىزدىڭ تاۋەلسىز ەل بولعانىمىزعا قارسى.

ماسەلەن، 16 جەلتوقسان كۇنى «درۋگايا روسسيا» پارتياسىنىڭ 20 شاقتى بەلسەندىسى پەتەربۋرگتەگى قازاق ەلىنىڭ ەلشىلىگىنە بارىپ نارازىلىق اكسياسىن ۇيىمداستىردى. بەلسەندىلەر رەسەي بيلىگى رۇقسات ەتكەن اكسياعا قازاق ەلىنىڭ تاۋەلسىزدىگىنە قارسى جازىلعان پلاكاتتار ۇستاپ شىقتى. اتالعان پلاكاتتاردا «مۇنداي تاۋەلسىزدىك قۇرىسىن!»، «ءبىزدىڭ وتانىمىز – كسرو»، «نازاربايەۆ، ورىستاردىڭ مازاسىن الما، ونىڭ ارتى جامان بولادى» دەپ جازىلعان.

بەلسەندىلەردىڭ ايتۋىنشا،  قازاق ەلى مەن ۋكراينانىڭ تاۋەلسىزدىك الۋى رەسەي ءۇشىن قارالى كۇن. ويتكەنى، اتالعان كۇندەر كسرو سىندى الىپ يمپەريانىڭ قۇلاعانىن ەسكە سالادى. سونداي-اق، پارتيا وكىلدەرى قازاق ەلىن رەسەيدىڭ سەنىمدى سەرىكتەسى دەگەنگە كۇمان كەلتىرىپ وتىر. سەبەبى، شوۆينيستەر اقوردانىڭ تۇركيا مەن جۇڭگو مەملەكەتتەرىمەن تىعىز قارىم-قاتىناس ورناتىپ وتىرعانىن سىناپتى. بۇدان بولەك، ولار رەسمي استانانىڭ رەسەيلىك كوزقاراستاعى ازاماتتاردى قۋىن-سۇرگىنگە ۇشىراتىپ وتىرعانىن جاقتىرمايتىنىن جەتكىزىپتى.

ۇزىن ءسوزدىڭ قىسقاسى، رەسەدەگى ەڭ ءىرى پارتيا قازاق ەلىنىڭ تاۋەلسىز ەل بولۋىنا قارسى. الايدا قازاق ەلى «درۋگا روسسيا» پارتياسى قارسى بولدى ەكەن دەپ تاۋەلسىزدىكتەن باس تارتپاق ەمەس. ويتكەنى، ءبىز ءۇشىن تاۋەلسىزدىكتەن اسقان بايلىق جوق.

نەگىزىندە، بەلگىلى ءبىر ەلدىڭ تاۋەلسىزدىگىنە قارسى اكسيا تەك رەسەيدە عانا وتەتىن شىعار. ويتكەنى، الەمدەگى دامىعان وركەنيەتتى ەلدەردە مۇنداي اكسيا وتكەن ەمەس. ماسەلەن، جاپونيا – وڭتۇستىك كورەيانىڭ، ۇلىبريتانيا – ءۇندىستاننىڭ تاۋەلسىزدىگىنە قارسى اكسيا وتكىزگەن جوق. سوعان قاراماستان، اتالعان مەملەكەتتەر رەسەيدەن كوش ىلگەرى دامىپ وتىر. ال، الداعى ۋاقىتتا جارىم-جان كوزقاراستى رەسەي تاستاما ونىڭ دامىپ، وسىپ-وركەندەۋى مۇمكىن ەمەس.

سەرىك جولداسباي

استانا