Astanada "Mahabbat" turǵyn úı kesheniniń ondaǵan turǵynyn, onyń ishinde oqýshy balalardy da narazylyq aksıasy kezinde polısıa ustap áketti. Azattyq tilshisiniń habarlaýynsha, Esildiń oń jaǵalaýynda ornalasqan medıa ortalyqqa 30 shaqty adam barǵan. Olar sot sheshimimen ózderin páterlerinen shyǵaryp jatqandaryn aıtqan. Narazylyq aksıasyna qatysýshylardyń aıtýynsha, turǵyndar problemalaryna jýrnalıserdiń nazaryn aýdartý úshin qazaqstandyq birneshe aqparat quraldarynyń ókildikteri ornalasqan medıa ortalyqqa barǵan. Ortalyq janynda birneshe mınýt boıy turǵan narazylar qoldaryna "Úısiz Otan bolmaıdy", "Halyqty baspanasyz qaldyrmańdar" degen jazý jazylǵan plakat ustap alǵan. Birneshe mınýttan keıin polısıa olardy ustap, eki avtobýspen polısıa bólimshesine alyp ketti. "Mahabbat" turǵyn úı kesheniniń turǵyndary buǵan deıin ózderin turyp jatqan úılerinen shyǵarý týraly sot sheshimin qaıta qaraýdy talap etip, birneshe ret narazylyq aksıasyn ótkizgen edi. Olar bılik organdaryna talaı ret hat ta jazǵan. 2009 jyly  400-den astam adam 49 páterdi jalǵa alý týraly kelisim-shartqa otyryp, turǵyn úı kesheni ıesine aqsha tólep kelgen. Alaıda qojaıyn úıdi basqa kompanıaǵa satyp jiberip, jańa qojaıyn olardan páterlerdi bosatýdy talap etken. Sot turǵyndardyń kelisim-sharttaryn "jaramsyz( dep taýyp, olardy páterlerinen shyǵarý týraly sheshim qabyldaǵan. Biraq olar páterden shyǵarýǵa narazylyq tanytyp, kelisim-shart jasasqan adamdardyń ústinen aryzdanǵan.

"Azattyq radıosy"