Ýkraına áskeri Qyrym aımaǵyna attandy. Árıne, óz terı torıasyn qorǵaý – olardyń mindeti. Ýkraın bıliginiń bul qadamyn barlyq ýkraın jurty qos qoldap quptap otyr. Óıtkeni irgesine kelgen jaý erteń tórinde otyratynyn bildi olar. Sóıtip, mıllıondaǵan ýkraındy, mıllıondaǵan qazaqty qyrǵan keshegi Sovet odaǵynyń murageri Reseı eli áli de ımperıalyq pıǵylynan aıyǵa almaı otyr.  Tipti basa kóktep kórshi eldirdiń shekarasynan attap ótýdi ádetke aınaldyrdy.

Aıtpaqshy, Elbasy Nursultan Nazarbaevtyń Reseı saparynan keıin shuǵyl jınalys ashyp, qorǵanysymyzdy kúsheıtý jóninde bergen tapsyrmasyn bylaıǵy jurt qýana qabyldaǵan. Tipti bul Reseıden qorǵanýdyń alǵashqy sıgnaly dep te uǵynǵandar boldy. Solaı-aq bolsyn dep tileıik. Degenmen Qazaqstannyń Reseı memleketimen tyǵyz, qoıan-qoltyq aralastyǵyn eskersek, aldaǵy kúnde bolýy múmkin Reseı-Ýkraına soǵysynda bizdiń el orystardyń soıylyn soǵyp júrmese bolǵany. Bul tipti ábden múmkin.

Mundaı qadamnyń Qudaı betin ary qylsyn. Óıtkeni Ýkraınada bizdiń baýyrlastarymyz tatarlar bar. Olardyń nıeti de Reseıden irgesin aýlaqqa salý. Tipti ony aıtpaǵanda Sovet odaǵynyń qandy sheńgelinen bosaǵan táýelsiz elder bir-birine oq atyp jatsa, bul – Reseıdiń qushaǵyna qaıta qulaýmen birdeı.

Bolashaqqa baǵyttalǵan, memlekettiń táýelsizdigine tikeleı qatysty kez kelgen kelisimge halqymen aqyldaspaı baratyn bir bılik bolsa,  ol – bizdiń Qazaq bıligi. Eýrazıalyq ekonomıkalyq odaq – sonyń bir ǵana dáleli. Qazaq bıligi osy ádetimen búkil álem nazaryn ózine aýdaryp otyrǵan Reseı-Ýkraına qaqtyǵysyna da qazaq jurtymen aqyldaspaı, áskerlerimizdi Reseıdiń yqpalyna jyǵyp bermese bolǵany.