Daǵdarys dep eldegi qarjylyq qıyndyqtardyń sebebin syrttan izdegenmen, el basyndaǵy sheneýnikterdiń kásibı sheberligin tarazyǵa salmaı tura almaısyz. Ekonomıs Maǵbat Spanovtyń da pikiri osyndaı.

«Turaqtylyqty qanaǵat etip otyra berýge bolmaıdy. Ǵylymda «turaqtylyq» degen «alǵa jyljymaý», «bir orynda turý» degen maǵynaǵa ıe. Biz Orta Azıa barysyna aınalýymyz úshin jańa sharalar men ádisterge júginýimiz kerek», - deıdi ol.

101tv qoǵamdyq ınternet-telearnasyna bergen suhbatynda ekonomıs búgingi qazaq Úkimetiniń kásibı biliktiligine kúmánmen qaraıdy.

«Jaqynda Úkimet bekitken jańa búdjet jobasy Senatqa jiberildi. Ekonomıka mınıstri ishki jalpy ónimniń 0,5 paıyzǵa ósýi kólemindegi qalypty dınamıkany saqtap qaldyq dep keýdesin soǵady. Men oǵan ekonomıkalyq oqýlyqtar oqýǵa keńes berer em. İJÓ-niń 1,1 paıyzǵa artýy ósim emes, stagnasıa sanalady. Óıtkeni, devalvasıalyq, ınflásıalyq prosester bar. Sondyqtan biz toqtap qaldyq», - deıdi M. Spanov.

Bıliktegilerdiń «áleýmettik turaqtylyqty saqtap otyrmyz» dep júrgeni de dalbasa kórinedi.

«İJÓ-niń áleýmettik salaǵa bólinetin úlesi únemi qysqaryp kele jatqanda qandaı áleýmettik turaqtylyq týraly aıtýǵa bolady? Eger, 2000 jyldar basynda áleýmettik salaǵa İJÓ-niń 4 paıyzy bólinse, búginde bul kórsetkish 3 paıyzdyń aınalasynda. Bul turaqtylyq emes, bul turaqty quldyraý», - degen ekonomıs sózin jónsiz deı almaısyz.

Ekonomıs eldi alǵa súıreý úshin bilimdi Úkimet, ony basqaratyn, barlyq jaýapkershilikti óz moınyna ala alatyn, eki-úsh jyl ishinde eldi qalyptasqan qıyndyqtan alyp shyǵýǵa shamasy jetetin bilikti premer-mınıstr kerek dep sanaıdy.