Almatyda «CFO Idea Exchange & Networking Event» samıti ótti. Jıyn barysynda QR Ulttyq bankin ár kezderi basqarǵan eks-tóraǵalar ózderiniń basqarǵan jyldaryndaǵy jibergen qatelikteri týraly aıtty, - dep habarlaıdy «Qamshy» portaly QazAqparatqa silteme jasap.

Qaırat Kelimbetov sát saıyn ózgerip jatqan kommýnıkatıvtik tehnologıalarǵa ilese almaǵanyn aıtty.

«Meniń basqarýym kezindegi qateligim  budan da jetildirilgen kommýnıkatıvtik strategıaǵa bet burý kerek edi. Qazir álemde túrli qaterlerge jaýap beretin kóp áleýmettik tehnologıalar bar. Memlekettik qurylym halyqpen uzaq merzimdi ýaqytta baılanys ornatýy kerek edi», - dedi Q.Kelimbetov.

Sondaı-aq, ol Ulttyq banktiń jetken jetistikteri týraly da tilge tıek etti. Onyń aıtýynsha, belgilengen kýrstan ınflásıalyq targettendirýge kóshý úlken jetistik.

«Álemde bul óte aýyr ári uzaq ótedi. Mysaly, Chılı memleketine oǵan kóshý úshin 5-7 jyl kerek boldy. Al, bizde ol jyldam ári sál jeńilirek ótti. Kemshilikterge keler bolsaq, 2004-2007 jyldary nesıe daǵdarysy Ulttyq bank jibergen úlken qatelik boldy. Sol kezde bankter kóp mólsherde nesıe berip, qurylys salyp, nashar kredıt portfeli 30 prosentke deıin jetti. 40 mln dollar qaryz paıda boldy. Bul úlken qatelik edi. Qazaqstan áli sonyń zardabyn tartyp keledi», - dedi Q.Kelimbetov.

Bas bankti 1998-1999 jyldary basqarǵan Qadyrjan Damıtov bolsa, Ulttyq banktiń jetistigi retinde júzege asqan jaqsy reformalar men bastamalardy aıtty.

Biraq, bank júıesin reformalaý kezinde sál radıkaldy sharalardy qolǵa ala almaǵanyna ókindi.

2004-2009 jyldary Ulttyq banktiń tóraǵasy bolǵan Ánýar Sáıdenov Ulttyq banktiń jumysyndaǵy jetistik retinde normatıvtik bazanyń qalyptasýyn, bank júıesiniń halqaralyq júıege enýin, úzdik tehnologıalar ımportyn atap ótti.

«Biraq, halyqaralyq tájirıbeni engize otyryp, biz ony sońyna deıin jetkizbedik. Bankter úzdik korporatıvtik basqarý tetikterin engizbedi, táýekelderdi baǵalaý júıesi álsiz boldy», - dedi ol.

Qarjylyq sektordaǵy Qazaqstannyń jetistigi retinde Oraz Jandosov bank júıesiniń memleketten jekemenshik túrine kóshýin atady.

«Ulttyq qordy jasaǵan kezde munaı salyǵynyń qubylmalylyǵyn joıýdy qarastyrmadyq. Erkin baǵamǵa jiberilgenniń ózinde ony aldyn ala boljaý múmkin emes. Meniń usynysym, munaıdan túsetin salyqtyń búdjet tolyqtyratyn úlesin umytý kerek», - dedi O.Jandosov.

Sarapshy óziniń Úkimetke der kezinde aýyspaǵanyna ókinetinin jetkizdi. Onyń aıtýynsha, ol jaǵdaıda birqatar ádiletsiz jekeshelendirýdiń aldyn alýǵa bolar edi.