Alǵashqy ret ál-Farabı atyndaǵy QazUÝ bazasynda Ál-Farabı kitaphanasynda Qazaqstan medısınalyq zerthanalyq dıagnostıka qaýymdastyǵynyń (QMZDQ) IV Halyqaralyq Kongresi ótti. Eki kúndik jıynǵa Reseı, AQSH, Fransıa jáne Qazaqstannyń barlyq aımaqtarynan kelgen medısınalyq kásibı bilim berý salasyndaǵy mamandar qatysty, - dep habarlaıdy «Qamshy» portaly.

«Zamanaýı zerthanalyq medısına: zerthanalyq taldaýdyń ınovasıalyq tehnologıalary jáne olardy Qazaqstanda klınıkalyq qoldanýdyń jańa múmkindikteri» degen ataýmen bastaý alǵan konferensıa otyrysynyń negizgi ózegi zerthana qyzmetkerlerin daıarlaýdaǵy kásiptik jáne bilim berý standarttaryn ázirleý máselesi tóńireginde órbidi.

Ál-Farabı atyndaǵy QazUÝ, Nazarbaev ýnıversıteti men S.D. Asfendıarov atyndaǵy QazUMÝ-dan kelgen qatysýshylar elimizde medısına salasynyń mamandaryn daıarlaıtyn úzdik oqý oryndarynyń biri bolǵandyqtan, óz tájirıbelerin ortaǵa salýǵa daıyn ekendikterin jetkizdi. Sonymen qatar, Reseı medısınalyq zerthanalyq dıagnostıka qaýymdastyǵy (RMZDQ) prezıdenti D.B.Saprygınniń sálemdemesin alyp kelgen osy mekemeniń vıse-prezıdenti Aleksandr Gılmanov zamanaýı zerthanalyq medısına máselesi eki elde de uqsas jaǵdaıda ekenine nazar aýdartty. «Biz, Qazaqstanmen jemisti jumys atqaryp kelemiz. Belgili salalarda qordalanǵan máseleler az emes. Olardy ortaqtasyp, birigip sheshken durys», – dedi profesor Aleksandr Gılmanov. Eldiń túkpir-túkpirinen jáne shetelden kelgen bıomedısına jáne zerthanalyq dıagnostıka salasynyń ǵylymı qyzmetkerleri konferensıa jumysy barysynda tájirıbe almasyp, jańadan engizilgen ınovasıalyq tehnologıalar týraly birsypyra málimetterden qulaǵdar boldy.

Qurylǵanyna 5 jyl tolǵan QMZDQ atalmysh is-sharany jyl saıyn ótkizýdi dástúrge aınaldyrǵan. Bıylǵy jıynnyń QazUÝ bazasynda uıymdastyrylýy jáne úzdik ýnıversıtetterdiń jetekshi ǵalymdarynyń qatysýy, ǵylymnyń jańa túrleri men bıomedısınanyń jańa býyn zerthana mamandaryn halyqaralyq standarttar negizinde daıyndalýy Qazaqstanda bıomedısına salasynyń damýyna jańa serpin men tyń ıdeıalar bereri haq.