QHR-nyń iri aýylsharýashylyq treıderimen jasalǵan kelisimge sáıkes, bıyl 2 myń tonna ósimdik maıyn Qytaıǵa jetkizý kózdelip otyr, - dep habarlaıdy «Qamshy» portaly «Atameken» UKP baspasóz qyzmetine silteme jasap.

Qazaqstandyq ósimdik maıyn óndirýshiler qytaılyq kásipkerlermen iskerlik qarym-qatynas ornata alady. Mundaı kelisimge QR «Atameken» UKP-nyń  otandyqaýylsharýashylyǵy ónimderin óńdeý úshin,  Qytaı kompanıalaryn strategıalyq ınvestor retinde tartý maqsatynda júrgizgen kelissózderdiń barysynda qol jetti. Atalmysh joba «100 naqty qadam» Ult jospary aıasynda júzege asyrylmaq.

Eki jaqty seriktestik nátıjesinde otandyq taýar óndirýshiler men  «Sıan» Indýstrıaldy korporasıasynyń birlesken jumysy bastaldy. Bul kompanıa QHR-daǵy Shensı aımaǵynyń aýylsharýashylyǵy ındýstrıasyndaǵy úzdik kásiporyn bolyp sanalady jáne dándi-daqyldar men maı óndirisi salasyna arnaıy mamandandyrylǵan. Kompanıanyń jeke saýda-logıstıkalyq jelisi, qoıma ǵımaraty jáne 1,5 myń saýda núktesi bar. Eki jaqty seriktestiktiń nátıjesinde qazaqstandyq azyq-túlik óndirýshiler óz ónimderin kórshi eldiń alyp naryǵyna shyǵarýǵa múmkindik aldy. Sebebi, Qazaqstan ónimderi tabıǵı dámimen, joǵary sapalylyǵymen jáne qoljetimdi baǵasymen erekshelenip, Qytaı naryǵynda  suranysqa ıe bolyp otyr.

Al «Atameken» UKP otandyq jáne qytaılyq kásipkerlerge strategıalyq seriktester izdeýge, qazaqstandyq taýardy eksporttaýǵa jáne tasymaldaýda kezdesetin máselelerdi sheshýge kómektesedi. Ulttyq palatanyń atalmysh jobasy ekijaqty kelissózder júrgizý kezeńinen bastap, ónimderdi jetkizý jáne taratý  kezeńine deıin baqylap, kedergilerdi eńserýdi qarastyrady.

Nátıjesinde otandyq maı zaýyttarynan 2 000 tonna ónimbiryńǵaı temir jol konteınerlerimen tasymaldanady. Aıta ketý kerek, buryn maı Qytaıǵa tek shıkizat kúıinde jetkiziletin. Maıly daqyldardy óńdep, ósimdik maıyn óndirý kólemin arttyrý otandyq kásiporyndarǵa qosymsha tabys ákeledi, jańa jumys oryndaryn ashýǵa kómektesedi. Atalǵan joba boıynsha Raps maıyn óndiretin  Aqmola oblysyndaǵy «Agrimer-Astyk» JSHS men kúnbaǵys maıyn shyǵaratyn  SHQO-daǵy «Seı-Nar» JSHS  maı ónimderin óndirý men óńdeýge jáne alynǵan ónimderdi Qytaıǵa eksporttaýǵa múmkindik aldy.

Eskeretin jaıt, maı ónimderin jetkizý barysynda transporttyq tasymal  problemalary  jıi ushyrasady.  Naqtyraq aıtqanda, zaýyttardyń óndiris jáne tehnologıalyq qýaty konteınerlerge maı júkteýge jetpeıdi. Buryn maı júkteý temir jol sısternalary arqyly iske asatyn. Alaıda qazaqstandyq óndirýshiler bul problemany arnaıy maı tasymalyna arnalǵan konteıner-fleksıtank maı quıý beketterindegi oryndardy qaıta jabdyqtaý arqyly sheshken bolatyn.

Qazirgi tańda Almatyda 88 konteınerden turatyn quram jasaqtalyp, QHR satyp alǵan maı ónimderin jetkizýge daıyn tur.

Sondaı-aq, «Aıszúı» kompanıasy «Almaty ónim» JSHS-men kondıterlik ónimderdi tasymaldaý jóninde kelisimshart jasady. Ónimniń alǵashqy legi jetkizildi, qytaı tutynýshylarynyń arasynda úlken suranysqa ıe jáne sátti tasymaldanýda.

Qytaıdyń «Aıszúı» óndiristik tobymen seriktestikti nyǵaıtý maqsatynda «Atameken» UKP Soltústik Qazaqstan oblysyndaǵy  maı óndirisi men dándi daqyldardy óńdeıtin quny 58 mln dollardy quraıtyn  eki jaqty ınvestısıalyq jobanyń maquldanýyna qol jetkizdi. Qurylys jumystary osy jyly bastalady. Zaýyttyń qýaty jyl saıyn 36 myń tonna ósimdik maıy men 25 myń tonna kúnjara óndirýge jetedi dep boljanýda.

Mundaı tıimdi seriktestik elimizdiń aýyl sharýashylyǵy salasyn jáne otandyq óndirýshilerdi jańa bıikterge kóteretini sózsiz.