Búgin Qaraǵandyda jemqorlyq qylmystarǵa qatysy bar delingen burynǵy premer-mınıstr Serik Ahmetov jáne 11 adamnyń apelásıalyq shaǵymyn qaraý boıynsha sot otyrysy ótti, - dep habarlaıdy «Qamshy» portaly.

Sottalǵandardyń qorǵaýshylary jasaǵan málimdemeler tyńdalǵan soń, prokýrorlar qorytyndy ázirleýge qosymsha ýaqyt surap, sýdıa erteńgi saǵat 15.00-ge deıin úzilis jarıalaǵan.

Búgin tańerteń bastalǵan sot otyrysyna Serik Ahmetov te, bas bostandyǵynan aıyrý jazasy kesilgen basqa tulǵalar da qatyspady. Apelásıalyq sot oytyrysyna qorǵaýshylar men bas bostandyǵynan shartty túrde aırylǵandar ǵana qatysty.

Serik Ahmetovtyń qorǵaýshysy Nıkolaı Lesnık eks-premerdiń ózine taǵylǵan aıyptarmen esh kelispeıtinin, alaıda, Qaraǵandy oblysynyń ákimi, premer-mınıstr laýazymynda júrgende birqatar laýazymdy tulǵalardyń búdjet qarjysyna qol salǵanyn qadaǵalaı almaǵandyǵyn moıyndaıtynyn aıtty.

«Meniń qorǵaýymdaǵy S. Ahmetov Elbasynyń artqan senimin aqtamaımyn dep esh oılamaǵan. Sondyqtan, ol bolǵan jaǵdaıǵa baılanysty jaýapkershilikten qashpaıdy jáne bolǵan jaǵdaıǵa baılanysty kinási baryn moıyndaıdy, oǵan shyn qynjylady», - dedi N. Lesnık.

«Bizdiń qorǵaýymyzdaǵy S. Ahmetov Qaraǵandy oblysynyń ákimi, sondaı-aq, premer-mınıstr laýazymyn atqarǵan kezde jekelegen tulǵalardyń Qaraǵandy oblysy aýmaǵynda jasalǵan zańsyz áreketteri saldarynan memleket múddesine materıaldyq shyǵyn kelgenin tolyq baqylaı almaǵanyn jáne soǵan jol bergenin moıyndaıdy», - dedi ol.

Al, Qaraǵandy oblysynyń burynǵy ákimi Baýyrjan Ábdishevtiń qorǵaýshysynyń sot zalyna B. Ábdishevti aldyrtý týraly ótinishin sot qanaǵattandyrmaı tastady.

3 jyl merzimge sottalǵan taǵy bir sheneýnik, Qaraǵandy oblysy ákiminiń orynbasary bolǵan Ǵabıt Muhambetovtyń qorǵaýshysy sýdıadan Ǵ. Muhambetovtyń kámlettik jasqa tolmaǵan bes balasy baryn, áıeli altynshysyna taǵy júkti ekenin eskerýdi surady.

Keshe birqatar aqparat quraldarynda S. Ahmetovtyń dostary men týystary memleketke keltirilgen shyǵyn dep baǵalanǵan 2,2 mlrd teńgeni qazynaǵa aýdarǵany týraly jazǵan bolatyn.