Qytaıdan keletin qazaqtar sottylyq týraly anyqtamany ózi turǵan eldi mekenniń polısıa bólimshelerinen ala alady, - dep habarlaıdy «Qamshy» portaly. Bul týraly Dúnıejúzi qazaqtary qaýymdastyǵy uıymdastyrý bóliminiń meńgerýshisi Botagóz Ýatqan jarıa etti.
Qytaıdan keletin qazaqtarǵa buǵan deıin azamattyq alý úshin sottylyǵy týraly anyqtama usynýǵa mindettelgen bolatyn. Ol anyqtamany alýdyń tetikteri men tártibinen beıhabar bylaıǵy jurt birshama qıyndyqtarǵa tap boldy. Sonymen qatar, oralmandardy zeınetaqymen qamtý máselesine qatysty da basy ashylmaǵan jaǵdaıattar jetkilikti bolatyn. Osy máselege oraı Dúnıejúzi qazaqtary qaýymdastyǵy el Úkimetine, İshki ister, Syrtqy ister mınıstrlikterine, basqa da ókiletti memlekettik organdarǵa hat joldaǵan eken. Atalǵan hatqa alǵash bolyp QR Densaýlyq saqtaý jáne áleýmettik damý mınıstrligi jaýap qatypty.
Mınıstrliktiń jaýap hatynda:
«...múddeli ortalyq memlekettik organdarmen birlese qarap, kelesini habarlaıdy.
«QR İİM-niń QR-ynda turaqty turýǵa ruqsat alýy úshin QHR azamattarynyń sottylyǵy/sottylyǵynyń joqtyǵy týraly anyqtamaǵa qatysty suraýyna QR-daǵy QHR Elshiliginiń bergen jaýabyna sáıkes atalǵan anyqtamany jeke tulǵanyń talaby boıynsha onyń turǵylyqty jerindegi polısıanyń ýchaskelik bólimsheleri beredi. Jáne onyń bekitilgen birkelki úlgisi joq.
Elshilik usynylǵan anyqtama kúmándik týdyratyn bolsa onyń túpnusqasyn rastap berýge daıyn ekendigin habarlaǵan.
QHR-nyń zańnamasyna sáıkes /resmı aýdarmany SİM bergen/ qytaılyq azamattarǵa pasport rásimdeý, olar sot sheshimine sáıkes jazasyn ótep jatqan jaǵdaıda ǵana ruqsat berilmeıdi («Pasport berý tártibi týraly» 2006 j. 29 sáýirdegi QHR Zańynyń 13 b). Qytaı azamattaryna «eger tulǵanyń jazasy ótelmegen bolsa, elden shyǵýǵa tıym salynýy múmkin» («Kirý jáne shyǵý máselelerin basqarý týraly» 2012j .30 maýsymyndaǵy QHR Zańynyń 12 b).
Osylaısha, Qytaı zańnamasy sottalmaǵan nemese buryn sotty bolǵan azamattardyń shet elge shyǵýyn shektemeıdi. Bul zańnama jergilikti ult ókili bolyp sanalmaıtyn azamatqa da ortaq.
Qytaıda sottylyǵy týraly anyqtamany jergilikti polısıa organy beredi.
Qorytyndylaı kele, turaqty turýǵa ruqsat alý úshin qajetti qujattar tiziminen tulǵanyń sottylyǵy týraly anyqtamany alyp tastaý qylmystyq elementterdi baqylaý múmkindigine qaýip týǵyzady dep esepteımiz.
QR-nyń aýmaǵynda turaqty turatyn sheteldikter men azamattyǵy joq adamdardy, oralmandardy zeınetaqymen qamsyzdandyrý QR-nyń zańnamasyna sáıkes QR-nyń azamattarymen birdeı sharttarda júzege asyrylady
Eger, oralman, sheteldik nemese azamattyǵy joq adam TMD-na qatysýshy memleketterdiń biriniń azamaty bolyp tabylǵan jaǵdaıda, onda olarǵa 1992 jylǵy 13 naýryzdaǵy TMD –na qatysýshy memleketter azamattarynyń zeınetaqysymen qamsyzdandyrý salasyndaǵy quqyqtaryna kepildik berý týraly Kelisimniń normalary qoldanylady.
Osy Kelisim Kelisimge qatysýshy memleketterdiń sheńberinde oryn aýystyrǵan jaǵdaıda zeınetaqymen qamsyzdandyrý máselelerin retteıdi, sebebi ol memleketterde zeınetaqymen qamsyzdandyrý aýmaqtyq prınsıp boıynsha júzege asyrylady. Osy Kelisim qazirgi kezde de qoldanylady.
Odan basqa, qazirgi tańda EAEOtyń múshe memleketteriniń ýákiletti memlekettik organdary EAEO múshe memleketteriniń arasyndaǵy zeınetaqymen qamyzdandyrý salasyndaǵy yntymaqtastyq týraly Kelisimdi daıyndaý jumystaryn júrgizýde», – delingen.
