Erejesiz jekpe-jekten Qytaıda ótken halyqaralyq týrnırde eki qazaqtyq jekpe-jegi biraz sózbolǵanyn bilemiz. Alańǵa shyqqan qos qazaq Aıbek Nurseıit pen Ǵabıt Turhanbek bir-birine qol jumsaýǵa batpaı júrip aldy. Tóreshi eki sportshyny qyzyl kártishke berip, alańnan shyǵarǵan bolatyn. Sol eki sportshynyń biri Aıbek Nurseıit Azattyqqa qarsylasymen nege durystap tóbelespegenin aıtyp berdi, - dep habarlaıdy «Qamshy» portaly.

​Azattyq: – Áleýmettik jelide taraǵan vıdeoda beınelengen jarys qaı kezde ótip edi?

Aıbek Nurseıit: – Jarys 5 naýryzda Shanhaı mańyndaǵy shaǵyn qalada ótti. Bul jarysqa barý meniń josparymda bolmaǵan. Bes-alty kún qalǵanda jarysqa barýy tıis sportshylardyń biri qatyspaıtynyn aıtyp, onyń ornyna men baratyn boldym. 70 kılogramm salmaqta tórt adam shyqtyq. Men fransıalyq Maıkl Dýboısty, qytaılyq qazaq Ǵabıt Turǵanbek ýkraınalyq sportshyny jeńdi. Osylaısha ekeýmiz fınalǵa shyqtyq. Ǵabıt ekeýmiz bir-birimizdi tanımyz. Ol Almatyǵa kelip, bir aıdaı bizben birge jattyǵý jasap ketken.

Azattyq: – Ǵabıt ekeýlerińizdi «fınalda sporttyq erejege saı jekpe-jek ótkizbeı, judyryqtaspaı júrip aldy» dep synaǵan oqyrmandar da bar? Oǵan qandaı jaýap aıtar edińiz?

​Aıbek Nurseıit: – Negizi men fınalǵa shyǵamyn dep oılaǵan joqpyn. Basty maqsatym fransıalyq qarsylasymdy jeńý boldy. Ǵabıt ekeýmiz bir-birimizdi jarys aldynda salmaq ólsheý sátinde kórdik. Biraq jekpe-jek aldynda «bir-birimizge judyryq jumsamaımyz» degen sıaqty kelisim bolǵan joq. Kelisim bolsa, jekpe-jekke shyqpas edik. Fınaldyq jekpe-jekke men de, Ǵabıt te qazaq ánimen shyqtyq.

Alańǵa shyqqan soń Ǵabıt soqqy jasamaı júrdi. Ǵabıttiń maǵan qoly batpaı turǵanyn birden baıqadym da, men de shabýylǵa shyqpadym. Qytaı kórermenniń aldynda qos qazaq bir-biriniń murnyn qanatyp, kózin shyǵaryp jatý jaraspaıdy degen namys boldy. Qansha aqsha berip jatsa da, qazaq ekenimizdi dáleldegimiz keldi. Jekpe-jekten keıin Ǵabıt ekeýmiz arnaıy bankette jolyǵyp, qol alystyq.

Azattyq: – Ekeýińiz qyzyl qaǵaz alyp, jarystan shettetilgen soń júlde kimge berildi?

Aıbek Nurseıit: – Jarysta arnaıy chempıondyq belbeý men qomaqty qarjy sarapqa salynǵan. Biraq ol eshkimge berilmedi. Uıymdastyrýshylar meniń fransýzben ótkizgen jekpe-jegimdi kórip, aldaǵy jarystarǵa shyǵýyma múmkindik berdi. Ǵabıtke qatysty qandaı sheshim shyǵarǵanyn aldaǵy kúnderi bilemiz. Kelesi jarys mamyrda Taldyqorǵanda ótedi. Biraq WBK tujyrymynyń prezıdenti ol jarysta meni qazaqqa qarsy shyǵarmaıtynyn aıtty.

Azattyq: – Áńgimeńizge raqmet.